Skip to content

Skip to table of contents

 DILONGI 31

“Tuvonganga ko”!

“Tuvonganga ko”!

“Diawu diodi, tuvonganga ko.”2 KOLINTO 4:16.

NKUNGA 128 Kindama ti Kuna Tsuka

MAMBU TUANLONGUKA *

1. Mbi Baklisto badi mu kuduma bafueti vanga muingi batambula mfutu?

BAKLISTO badi mu kuduma zithinu mu nzila yi luzingu. Boti mu thama tutona kuduma voti bosi tutonini, befu boso tufueti tatamana kuduma zithinu nati tuntuka va ndilu voti nati tuntambula mfutu. Dilongi mvuala Polo kavana Baklisto ku Filipi dilenda tukindisa mvandi kubika kuvonga. Bo Baklisto ku Filipi batambula nkanda wuba dilongi Polo kaba vana, bankaka mu bawu baba sadila Yave mu mimvu miwombo. Bawu baba duma mu phila yifuana, vayi Polo wuba tebula moyo diambu dimueka dinkinza: Muingi batuka va ndilu, bawu bafueti tatamana kuduma mu lukuikumunu. Polo waba tomba basi Filipi balandakana kifuani kiandi ayi ‘kuvanga mangolo muingi kutambula mfutu.’—Filipi 3:14.

2. Kibila mbi dilongi Polo kavana basi Filipi dituka mu thangu yifuana?

2 Dilongi Polo kavana Baklisto ku Filipi dituka mu thangu yifuana. Kibila tona va thononu kimvuka, bawu baba viokila mu zithotolo. Mamoso matona mu mvu 50 T.K, bo Nzambi kakamba Polo ‘kenda ku Makedonia.’ (Mavanga 16:9) Bo Polo ayi Sila batuka kuna, bawu bazaba nkieto wumueka bantedilanga Lidi. Nandi ‘waba kuwa’ zitsangu zimboti ayi “[Yave] wuzibula ntim’andi.” (Mavanga 16:14) Vasa vioka ko beni thangu, Lidi ayi baboso baba kalanga ku nzo’andi bayiza botama. Vayi Nkadi’ampemba kasa viasa ko mioko. Babakala ba divula bakokumuna Polo ayi Sila vantuala zimfumu zi luyalu ayi baba vunina mambu ti bawu badi mu kutuadisa divunza ku divula. Mu kibila akioki, Polo ayi Sila baba suva khuba ayi baba tula mu buloku, bosi baba vana nsua muingi babotuka ku divula. (Mavanga 16:16-40) Vayi bukiedika ti bawu bavonga? Ndamba! Vayi mbi zikhomba zi kimvuka kimona bavanga? Bawu mvawu bakuikama! Bukiedika, bawu babaka khindusulu mu kifuani kimboti Polo ayi Sila baba bikila.

3. Mbi Polo kavisa, ayi biuvu mbi tuantubila mu dilongi adidi?

3 Polo wuba makani ma kukhambu vonga. (2 Kolinto 4:16)  Nandi wuvisa ti muingi katambula mfutu’andi, vaba tombulu kutatamana kusadila Yave nati ku tsuka luzingu luandi. Mbi tulenda longuka mu kifuani ki Polo? Bifuani mbi bi kiminu mu bilumbu bitu bimmonisa ti tulenda kuikama kheti bo tumviokila mu ziphasi? Ayi buidi kivuvu tuidi mu bilumbu binkuiza kilenda tusadisila kuba bakubama muingi kubika vonga?

MBI TULENDA LONGUKA MU KIFUANI KI POLO

4. Kheti mu mambu moso kaba monikina, buidi Polo katatamana kuvanga luzolo lu Yave?

4 Mu thangu kasonika nkanda kuidi basi Filipi, Polo wumonisa ti waba tsikika mayindu mandi mu kusadila Yave. Nandi wuba ku buloku ku nzo yimueka ku Loma ayi kasa ba ko luaku lu kubasika muingi kusamuna. Diawu kaba vaninanga kimbangi batu baba kuiza kummonanga ayi kusonikina minkanda bimvuka biba kinanu. Bobuawu mvandi bubu, mu kibila ki buvinya, vadi zikhomba ziwombo basiala bue nunga ko kubasika ku nzo muingi kuesamuna. Kheti bobo, bansadilanga thangu’awu muingi kuvana kimbangi batu bankuiza batalanga. Ayi bansonikanga minkanda mi khindusulu kuidi batu bakhambu banga ku nzo bo tunsamuna mu nzo ka nzo.

5. Dedi buntubila Filipi 3:12-14, mbi bisadisa Polo kutatamana kusadila Yave?

5 Polo kasa bika ko nzingulu voti zimzimbala kavanga kumbusa, zimvanga kubika sadila Yave. Dedi bo naveka katubila, “kuzimbakana mambu momo madi kumbusa” diba diambu dinkinza muingi kutsikika mayindu mu “mambu momo madi ku ntual’ama.” (Tanga Filipi 3:12-14.) Khanu biuma mbi bibina vukumuna Polo? Kitheti, ava kuzaba kiedika Polo wubaka ndandu yiwombo mu luzingu kuvioka bawombo mu basi Yuda. Vayi Polo waba tadilanga biuma bioso buka ‘tsodo.’ (Filipi 3:3-8) Kimuadi, nandi kasa bika ko zithotolo katuadisa Baklisto zimvutula mbusa mu kisalu kiandi kuidi Yave. Kintatu, nandi kasa yindula ko ti kafueti bika kusadila Yave kibila mavanga mawombo mu kisalu kiandi. Polo wuvanga mambu mawombo mu kisalu ki kusamuna kheti bantula mu buloku, bansuva khuba, bankuba mamanya, kheti bo kamonikina bivuka ayi thangu zinkaka wukhambu bidia ayi mimvuatu. (2 Kolinto 11:23-27) Kheti mu mambu moso kanunga kuvanga ayi mu ziphasi zioso kamonikina, Polo wuzaba ti kafueti tatamana kukivana mu kisalu ki Yave. Befu mvitu tufueti ba momawu mayindu Polo kaba.

6. Biuma mbi tubika kumbusa tufueti vanga mangolo ma kuzimbakana?

6 Buidi tulenda landikinina kifuani ki Polo ayi “kuzimbakana mambu momo madi kumbusa”? Bawombo mu zikhomba zitu, banuana nzingu wu kuzimbakana masumu bavola kumbusa. Boti mawu widi mu kuviokila, wulenda tona ndongukulu yi Kibibila yi ngie veka mu matedi nkhayilu yi khudulu yi Yesu. Bo wunlonguka, yindula mu matedi mambu amomo ayi nata mawu mu nsambu. Mawu mala kusadisa kununga mayindu makhambu fuana voti ma kukivana foto. Ngiewu wala bika kukivana foto mu masumu Yave kaku lemvukila. Yindula dilongi dinkaka tulenda longuka matedi Polo. Zikhomba ziwombo babika bisalu biaba kuba vananga zimbongo ziwombo muingi kubuela mioko kisalu ki Kintinu. Boti buawu, phila yimueka tulenda “[zimbakana] mambu momo madi kumbusa” yidi mu kukhambu tsikika mayindu mitu mu mambu mabina tuvana zimbongo ziwombo kumbusa. (Zintalu 11:4-6; Mpovi 7:10) “Mambu momo madi kumbusa” mvandi malenda sundula biuma bimboti tuvanga mu kisalu ki Yave ayi zithotolo tununga kumbusa. Bukiedika, kuyindula phila Yave katu sakumunina ayi katu sadisila mu mimvu mima vioka yidi phila yi kukindisila kikundi kitu ayi nandi. Vayi tulendi viasa ko mioko mu  kuyindula ti tumavanga mafueni kuidi Yave.—1 Kolinto 15:58.

Bo wunduma mu nzila yi luzingu, kawubika ni kiuma ki kuvuvikisa, vayi tsikika mayindu maku mu mfutu (Tala lutangu 7)

7. (a) Dedi bummonisina 1 Kolinto 9: 24-27, mbi tufueti vanga muingi tununga kutambula mfutu? Fuanikisa.

7 Polo waba visanga buboti mambu Yesu katuba: ‘Vanganu mangolo.’ (Luka 13:23, 24) Polo wuzaba ti buka Yesu, nandi kafueti vanga mangolo nati ku tsuka. Diawu kafuanikisila luzingu lu Baklisto bubu, buka bawu banduma zithinu. (Tanga 1 Kolinto 9:24-27.) Mutu wunduma zithinu wuntsikikanga mayindu mandi muingi kutuka mu ndilu ayi kabikanga ko ni kiuma kumvunzikisa. Buka, batu bandumanga zithinu balenda viokila mu nzila bansumbisanga biuma bilenda kuba vunzikisa. Wulenda yindula mutu wunduma vayi wuntelama theti muingi kumona biuma bansumbisa? Bukiedika ti na kuvanga mawu, kasinkuiza nunga ko kutuka va ndilu. Bobuawu mvandi, befu tuidi mu kuduma mu nzila yi luzingu, tulendi bika ko biuma binkaka bi tuvunzikisa. Tufueti vanga mambu Polo kavanga: kutsikika mayindu mitu mu mfutu ayi kuvanga mangolo muingi kununga. Yawu to phila tulenda tambudila mfutu!

BUIDI TULENDA TATAMANA KUSADILA YAVE KHETI BO TUMVIOKILA MU ZIPHASI

8. Mambu mbi matatu tuantubila?

8 Mambu mawombo malenda tuvanga kudekula kifuza kitu mu thangu tunduma mu nzila yi luzingu. Tuantubila mambu matatu: (1) didi bo mambu makhambu vangama mu phila tumvingila, (2) kuba balebakana mu kibila ki bununu ayi (3) bo tumviokila mu zithotolo mu mimvu miwombo. Kumona phila zikhomba banungina mambu amomo kulenda tusadisa mvitu kununga.—Filipi 3:17.

9. Buidi mambu makhambu vangama mu phila tumvingila malenda dekudila kifuza kitu?

9 Mambu makhambu vangama mu phila tumvingila. Befu boso tuidi mu kutedimina mu mayangi mambu moso mamboti Yave kakanikisa. Mayindu amomo masi ko mambi. Bo Habakuki kaba tomba kumona tsukulu yi mambu moso mambi ku Yuda, Yave wunkamba: ‘Tatamana kuvingila.’ (Habakuki 2:3) Vayi khumbu zinkaka tulenda mona buka ti mambu tuntedimina madi mu kukala kisina muingi kusalama. Mawu malenda dekula kifuza kitu ayi kutu bika mu kiunda. (Zingana 13:12) Mu mvu 1914, zikhomba  zinkaka basolo bamonikina mambu amomo. Bawombo baba yindulanga ti bankuenda ku diyilu muna mvu beni. Vayi buidi bayiza bela bo mambu beni makhambu monika?

Mambu Royal ayi Pearl baba tedemina mu mvu 1914 masa salama ko, vayi bawu batatamana bakuikama mu mimvu miwombo kuntuala (Tala lutangu 10)

10. Mambu mbi bakuela bamueka bavanga mu thangu mambu makhambu vangimina mu phila baba vingila?

10 Tala kifuani ki Royal ayi Pearl Spatz, bakuela bamueka bakuikama baviokila mu mambu amomo. Royal wubotama mu mvu 1908, bo kaba 20 di mimvu. Nandi wuba lufiatu ti nkadu waba khambu muingi kukuenda ku diyilu. Diawu mu mvu 1911 bo kadinda Pearl mu makuela, nandi wunkamba: “Ngie zebi mambu mbi mala monika mu mvu 1914. Boti kukuela tunkuelana, buna tuvanga mawu mu nsualu!” Bo batuka mu mvu 1914, bawu basa bue kuenda ko ku diyilu. Vayi bukiedika ti mambu amomo mavanga bakuela abobo kuvonga kuduma mu nzila yi luzingu? Ndamba, kibila kusadila Yave kiawu kiuma kiluta ba nkinza mu bawu, kubika kuandi kutambula mfutu. Royal ayi Pearl baba makani ma kutatamana kuduma mu lukuikumunu. Ayi mawu bavanga mu luzingu luawu loso nati bayiza fua bo vavioka mimvu miwombo kuntuala. Bubu tuma fikama mu thangu Yave kala vedisa dizina diandi mu mambu moso bakumvuninanga. Mu mayangi tumvingila thangu Nzambi kala monisa ti luyalu luandi luawu lulutidi ayi bo kala dukisa mambu moso kakanikisa. Ba lufiatu ti mambu amomo mala salama mu thangu naveka Yave katsikika. Nati mawu mela monika, tatamana kukivana mu kisalu ki Nzambi ayi kawubika mambu makhambu vangama mu phila wumvingila kudekula kifuza kiaku.

Kheti mu bununu, Arthur Secord (widi ku koko ku lukieto) wuba makani ma kukuikama. (Tala lutangu 11)

11-12. Kibila mbi tufueti tatamana kusadila Yave kheti tuisi ko buvinya bumboti voti tueka binunu? Vana kifuani.

11 Kuba balebakana mu kibila ki bununu. Mangolo mawombo manyitu mantombuluanga kuidi batu bandumanga zithinu. Vayi masi ko mawu mantombulu muingi kutatamana kukonzuka mu kiphevi. Kibila zikhomba zitu ziwombo bammonisanga kifuza ayi lukuikumunu kheti bo beka binunu voti basiedi ko buvinya bumboti. (2 Kolinto 4:16) Tala kifuani ki Khomba Arthur Secord. * Masadila ku Beteli mu 55 di mimvu, vayi bo kayiza ba 88 di mimvu, nandi kasa ba ko buvinya bumboti. Kilumbu kimueka mfelimi wutuka va ndeko kika kiandi muingi kumbuka. Nandi wuntala ayi wunkamba mu luzolo: “Khomba Secord, ngie mavanga mambu mawombo kuidi Yave.” Vayi khomba Arthur, kasa tsikika ko mayindu mu mambu mavioka. Nandi wutala mfelimi beni, wuseva nkadu ayi wutuba: “Makiedika. Vayi mambu tuvanga kumbusa bakana ko mawu malutidi nkinza, vayi mambu tumvanga bubu nati mu bilumbu binkuiza mawu malutidi nkinza.”

 12 Ḿba ngyewu widi mu kusadila Yave mu mimvu miwombo, ayi bubu wummona ti buvinya buaku busiedi ko bumboti muingi kununga kuvanga mambu waba vanganga. Boti mawu widi mu kuviokila, bika kuba mu kiunda. Ba lufiatu ti Yave wumvuanga nkinza mamoso wuvanga kumbusa mu kibila kiandi. (Ebeleo 6:10) Ayi tebuka moyo ti mambu wunnunga kuvanga mu kisalu ki Yave masi ko mawu mammonisa kitezu ki luzolo widi mu nandi. Befu tummonisanga kiteso ki luzolo luitu kuidi Yave mu kuba mayindu mamboti ayi kuvanga mamoso tulenda nunga mu kisalu kiandi. (Kolosai 3:23) Yave zebi kiteso kitu ayi kalendi ko kutudinda kuvanga mambu kazebi ti tulendi nunga ko.—Malako 12:43, 44.

Anatoly ayi Lidiya Melnik bakindama mu zithotolo zioso baviokila (Tala bitini bi matangu 13)

13. Buidi kifuani ki Anatoly ayi Lidiya kitu kindisila kutatamana bakuikama kheti bo tumviokila mu zithotolo?

13 Zithotolo mu mimvu miwombo. Zikhomba zitu zinkaka bamviokila mu ziphasi ayi zithotolo mu mimvu miwombo. Buka Anatoly Melnik, * wunkalanga ku Moldávia. Nandi wuba 12 di mimvu bo banata tat’andi ku buloku bungolu ku Sibéria. Kibuangu beni kiba kuvioka 7 di bivevi di kilometro di kinanu na kibuangu kiba dikanda diandi. Bo vavioka mvu wumueka, Anatoly, mam’andi, ayi zikhaya ziandi baba nata mvandi ku Sibéria. Muingi kulandakana zikhutukunu, bawu baba kuendanga ku divula dinkaka ayi baba diatanga 30 di kilometro ku tsi kiozi kingolo muingi kutuka ku divula beni. Bosi, Anatoly wuviokisa mimvu mitatu mu buloku, ku kinanu ki nkazi’andi Lidiya ayi muan’andi wunkieto widi to mvu wumueka. Kheti mu ziphasi zioso baviokila mu mimvu mioso amiomi, Anatoly ayi dikanda diandi bakuikama mu kusadila Yave. Bubu, Anatoly widi 82 di mimvu ayi widi wumueka mu Dingumba di bakulutu ba Filiali ku tsi mueka yi Ásia Central. Dedi Anatoly ayi Lidiya, vanga mamoso wunnunga mu kisalu ki Yave ayi kindama dedi bo wuvangila kumbusa.—Ngalatia 6:9.

TSIKIKA MAYINDU MAKU MU KIVUVU WIDI MU BILUMBU BINKUIZA

14. Mambu mbi Polo kazaba ti kafueti vanga muingi kutambula mfutu?

14 Polo wuba lufiatu ti wala nunga kusadila Yave nati ku tsuka ayi kutambula mfutu. Buka wumueka mu Baklisto basolo, nandi wuba tedimina mu mayangi moso muingi kutambula “mfutu wu lutelo lu Nzambi.” Vayi nandi wuzaba ti muingi katambula mfutu beni, kafueti tatamana ‘kuvanga mangolo.’ (Filipi 3:14) Polo wusadila kifuani kimboti muingi kusadisa basi Filipi kutsikika mayindu mawu mu mfutu.

15. Buidi Polo kasadila kivuvu ki kukuenda ku diyilu muingi kusadisa Baklisto basolo ku Filipi kutatamana bakindama?

 15 Polo wutebula moyo Baklisto basolo ku Filipi ti bawu bala zinga ku diyilu. (Filipi 3:20) Kibila mbi dibela diambu dinkinza kuidi bawu kutebukilanga mawu moyo? Mu thangu beni, batu bawombo baba tomba kubaka nkanda waba monisa ti badi basi Loma, kibila baba bakanga ndandu yiwombo. * Vayi Baklisto basolo baba ku khonzo Kintinu kilutidi, kiala kuba tuadisa ndandu yiwombo. Kuba muisi Loma kusa luta ba ko nkinza kena kuba muisi Kintinu ki Nzambi. Diawu Polo kakindisila basi Filipi batatamana kuzingila mu phila yifueni yi zitsangu zimboti zitedi Klisto. (Filipi 1:27.) Dedi Baklisto basolo mu thangu yinani, bubu Baklisto badi kivuvu ki kukuenda ku diyilu badi kifuani kimboti mu matedi kutatamana kuvanga mangolo muingi kutambula mfutu.

16. Kheti kivuvu kitu kidi ki kuzinga ku diyilu voti va ntoto, mbi tufueti vanga dedi buntubila Filipi 4:6, 7?

16 Tufueti tatamana kuvanga mangolo muingi kutambula mfutu, kheti kivuvu kitu kidi ki kuzinga mvu ka mvu ku diyilu voti ku paladizu va ntoto. Kheti mu mambu mawombo tuma viokila, tubika talanga kumbusa ayi kukhamba bika ni kiuma kutu vanga kubika sadila Yave. (Filipi 3:16) Boti mambu wumvingila madi mu kukala kisina muingi kusalama, voti wisi ko buvinya bumboti, ove weka kinunu, voti widi mu kuviokila mu zithotolo mu mimvu miwombo, bika ‘kuazuka mu kibila ki kioso kiuma’. Vayi zabikisa zitsatu ziaku kuidi Nzambi ayi nandi wela kuvana ndembama yilutidi wukhambu yindula.—Tanga Filipi 4:6, 7.

17. Mbi tunkuiza longuka mu dilongi dinkuiza?

17 Dedi bo mutu wunduma zithinu kanluta vangilanga mangolo bo kamfikama va ndilu, tatamana kutsikika mayindu maku mu mfutu ayi vanga mangolo muingi wutatamana kuduma mu nzila yi luzingu. Yave wutu kanikisa mambu mawombo mamboti mu bilumbu binkuiza kuntuala. Diawu, tatamana kuvanga mangolo ayi vanga mamoso wunnunga mu luaku widi. Vayi mbi tufueti vanga muingi tutatamana kuduma mu nzila yi luzingu mu khambu vonga? Dilongi dinkuiza, diala tusadisa kuzaba ‘kusuasisa mambu malutidi nkinza.’ —Filipi 1:9, 10.

NKUNGA 79 Wuba Longa Baba Bakuikama

^ Lut. 5 Kheti tueka mimvu miwombo voti ndamba mu kusadila Yave, tufueti tatamana kukonzuka mu kiphevi ayi kukuna zikhadulu zimboti buka Baklisto. Mvuala Polo wukindisa Baklisto mu sekulu yitheti babika kuvonga. Nkanda kafila kuidi basi Filipi wulenda tusadisa tutatamana bakuikama mu zithinu tunduma mu nzila yi luzingu. Dilongi adidi, dinkuiza tusadisa kumona buidi tulenda sadila mambu Polo katuba.

^ Lut. 11 Tala nongu yi luzingu yi Khomba Arthur Secord, “A minha parte no progresso da adoração correta”, mu Kibanga ki Nsungi ki Kilumbu 15 Ngonda Yitheti, mvu 1966.

^ Lut. 13 Tala nongu yi luzingu yi Khomba  Anatoly, “Aprendi a amar a Deus desde pequeno,” didi mu Despertai! yi kilumbu 22 Ngonda Yikumi, mvu 2004.

^ Lut. 15 Zikhomba bavisa buboti kifuani Polo kasadila, kibila batu baba kalanga ku Filipi baba nsua wu kuvanga mambu mankaka basi Loma baba nsua wu kuvanga.