Skip to content

Skip to table of contents

 DILONGI 34

Tatamana Kuba Mayangi mu Kiyeku Kimona

Tatamana Kuba Mayangi mu Kiyeku Kimona

‘Nzambi widi wusonga, kalendi zimbakana ko kisalu kinu lusala ayi luzolo lumonisa mu dizina diandi.’EBELEO 6:10.

NKUNGA 38 Yave Wala Kuvana Mangolo

MAMBU TUANLONGUKA *

1-3. Bibila mbi bilenda vanga batu badi mu kisalu ki thangu ka thangu kubalula biyeku biawu?

ROBERT AYI MARY JO basadila buka misioni mu 21 di mimvu. Matata mawu baba buadi, bayiza bakana kimbevo. Bawu batuba: “Befu tuyangalala mu kuba kieba. Vayi tuba beni mu kiunda mu kubika kibuangu tuaba zolanga.”

2 William ayi Terrie mvawu basala ku tsi yi kinzenza. Bawu batuba: “Bo tubakula ti tulendi bue vutuka ko mu kiyeku tuba mu kibila ki buvinya buitu, tudila beni. Makani mitu ma kusadila Yave ku tsi yinkaka mayiza mana.”

3 Aleksey wuba betelita wutuba: “Befu tuzaba ti zimbeni zitu baba tomba kuzibika Beteli yibe sadilanga. Vayi bo mawu mamonika mu bukiedika, befu boso tubika Beteli, mawu ma tunyongisa beni.”

4. Biuvu mbi tuembaka mimvutu mu dilongi adidi?

4 Yindula mvandi mu bivevi bi zibetelita ayi zikhomba zinkaka batambula biyeku bimona. * Bawombo mu bawu, disa ba ko diambu diluelo kubika biyeku baba zolanga. Buidi zikhomba aziozi balenda bela bavumbama bo mambu mambaluka? Mbi ngie wulenda vanga muingi kuba sadisa? Mimvutu mi biuvu abiobi milenda kutu sadisa befu boso kukolama bo mambu mambaluka.

TATAMANA KUBA WUVUMBAMA BO MAMBU MAMBALUKA

Kibila mbi didi diambu diphasi badi mu kisalu ki thangu ka thangu kubika kiyeku kiawu? (Tala lutangu 5) *

5. Mambu mbi maphasi tulenda dengana bo tumbalula kiyeku?

5 Mu kisalu ki thangu ka thangu, kuba kuandi mu kisalu ki kusamuna voti ku Beteli, tumvanganga bakundi bawombo ayi tunlongukanga  kuzola kibuangu tunsadila. Ayi tumbanga beni kiunda boti tufueti bika kiyeku kitu. Tumbanga mu phuila yi kumona zikhomba tubika ayi kutomba kuzaba buidi badidi, boti zithotolo ziawu zitu vanga kubika kiyeku tuba. (Matai 10:23; 2 Kolinto 11:28, 29) Mvandi dilenda ba diambu diphasi kukuenda ku kibuangu kinkaka, kibila tufueti kolama mu kikhulu kimona. Mawu mvandi malenda monika befu kuvutuka ku tsi tubutuka. Robert ayi Mary Jo batuba: “Tusadila ku tsi yinkaka mu mimvu miwombo, diawu, bo tuvutuka ku tsi tubutukila tuyimuena buka ti tuidi zinzenza. Ayi diba buka diambu dimona kulonga mu mbembu’itu yi buala. Befu tuaba yimuena buka batu bazimbala.” Ayi bawombo batambula biyeku bimona, kuntuala balenda monikina mambu bakhambu vingila dedi kukhambu ku zimbongo. Mawu malenda kuba vanga kukuazuka, kubika ba nsika ayi kuba mu kiunda. Mbi bilenda kutu sadisa?

Nkinza beni kukindisa kikundi kitu na Yave ayi kumfiatila (Tala bitini bi matangu 6-7) *

6. Buidi tulenda kindisila kikundi kitu na Yave?

6 Kindisa kikundi kiaku na Yave. (Yakobi 4:8) Buidi tulenda vangila mawu? Ba lufiatu ti Yave wunkuwanga minsambu miaku. (Minkunga 65:2) Minkunga 62:8 yintuba ti tufueti ‘zibula mintima minu va ntual’andi.’ Yave “wulenda vanga mu buwombo wombo viokila momo tueti lomba voti tueti yindula.” (Efeso 3:20) Yave kavanganga ko to mambu tukundinda mu nsambu. Boti tuidi mu kuviokila mu ziphasi, Yave kalenda ludika mawu mu phila tukhambu yindudila.

7. (a) Mbi biala tusadisa kutatamana bafikama kuidi Yave? (b) Dedi buntubila Ebeleo 6:10-12, ndandu mbi tuala baka befu kutatamana kusadila Yave mu lukuikumunu?

7 Kiuma kinkaka kilenda sadisa kikundi kitu na Yave kubuela kindama kidi kutanganga Kibibila kadika kilumbu ayi kuyindula mu mawu. Khomba yimueka wuba mu kisalu ki misioni wutuba: “Tatamana kuvanga mbuongimini yi dikanda ayi kukubikanga zikhutukunu dedi bo waba vangilanga mu kiyeku wuba.” Mvandi, tatamana kubuela mioko mu kusamuna zitsangu zimboti ku kimvuka kimona widi. Yave kazimbakananga ko batu bantatamananga kunsadila mu lukuikumunu, kheti basinnunga ko kuvanga mambu baba vanganga.—Tanga Ebeleo 6:10-12.

8. Buidi matangu ma 1 Yoane 2:15-17 malenda kusadisila kunata luzingu lukhambu kikhafi?

8 Nata Luzingu lukhambu kikhafi. Kawubika  mambu ma nza yi Satana ma kuvanga kubika sadila Yave. (Matai 13:22) Bika kukuwa malongi ma batu bakhambu sadilanga Yave dedi bakundi voti basi dikanda bantomba ku kusadisa mu kutuba ti wufueti baka zimbongo ziwombo muingi kubaka luzingu lumboti. (Tanga 1 Yoane 2:15-17.) Fiatila mu Yave. Nandi wunkanikisa kutu vana biabioso tuntomba mu kiphevi ayi mu kinsuni “mu thangu yifuana.”—Ebeleo 4:16; 13:5, 6.

9. (a) Dedi bummonisa Zingana 22:3, 7, kibila mbi didi diambu dinkinza kubika kotanga mu zipholo tukhambu tomba? (b) Mbi biala kutu sadisa kubaka makani mamboti?

9 Bika kudeva zimbongo boti wisi ko tsatu. (Tanga Zingana 22:3, 7.) Mbalukulu yi mambu mu luzingu luitu, malenda kutu vanga kukota mu zipholo. Muingi kubika kukota mu zipholo ziwombo, bika kusumba biuma wukhambu tomba. Bo tumviokila mu mambu ma tutatisa, dedi, kukieba mutu widi mu kubela, dilenda ba diambu diphasi kuzaba thalu yi zimbongo tunkotila kipholo. Mu mambu ma phila ayoyi, tebuka moyo ti ‘kusambila ayi kulomba’ kulenda kusadisa kubaka makani mamboti. Yave wala tambula minsambu miaku mu ku kuvana ndembama ‘yela kieba ntim’aku ayi mayindu maku.’ Mu phila ayoyi, wala nunga kuyindula buboti mu mambu wumviokila.—Filipi 4:6, 7; 1 Petelo 5:7.

10. Buidi tulenda buela bakila bakundi?

10 Tatamana kuba kikundi kimboti na bakundi ayi basi dikanda diaku. Buboti beni kukambanga bakundi bitu mabanza ayi mambu tuma viokila mu luzingu, kuluta vanga mawu kuidi batu baviokila mu mambu madedakana na mitu. Kuvanga mawu kulenda tusadisa kuba buboti. (Mpovi 4:9, 10) Bakundi wuba mu kiyeku wubika bela tatamana kuba bakundi baku. Vayi bubu, mu kiyeku kiaku kimona, ngie wufueti vanga bakundi bamona. Tebuka moyo ti muingi wubaka bakundi bamboti, ngie mvaku wufueti ba nkundi wumboti. Buidi wulenda buedila bakundi baku? Tuba lusakumunu loso wutambula kuidi Yave ayi bika bankaka bamona mayangi widi mu kusadila Yave. Bankaka mu kimvuka basinkuiza visikisa ko kibila mbi wunzodilanga kisalu ki thangu ka thangu, vayi bankaka balenda zola kifuani kiaku ayi kuiza ba bakundi baku bamboti. Vayi bika koluka beni matedi ngie veka, matedi mambu wuvanga mu kisalu ki Yave voti matedi mosokua mabanza widi makhambu fuana.

11. Mbi ngie wulenda vanga muingi dikuela diaku ditatamana mu mayangi?

11 Khumbu zinkaka, bakuela bafueti bika kisalu ki thangu ka thangu kibila nnuni voti nkazi wuyiza bua kubela. Boti mawu mamonika mu ngiewu, bika kuvana foto nnuni’aku voti nkazi’aku. Vayi boti ngiewu widi mu kubela, bika kuyivana foto mu kuyindula ti nnuni’aku voti nkazi’aku be kunyongina. Tebuka moyo ti  beno muidi ‘nsuni wumueka’ ayi mukanikisa kuidi Yave ti muala kuyikieba mu mosokua mambu mala monika. (Matai 19:5, 6) Khumbu zinkaka bakuela balenda bika kisalu ki thangu ka thangu bo nkieto kambaka buemba. Boti widi mu kuviokila mu mawu, zabikisa muan’aku ti nandi lutidi nkinza kena kiyeku wuba kumbusa. Kambanga muan’aku ti nandi widi “kiuka” ki Nzambi. (Minkunga 127:3-5) Nkamba mvandi lusakumunu wutambula mu kiyeku wuba. Mawu malenda kunsadisa mvandi kutomba kukota mu kisalu ki thangu ka thangu.

BUIDI BANKAKA BALENDA SADISILA

12. (a) Buidi tulenda sadisila zikhomba badi mu kisalu ki thangu ka thangu kutatamana mu kisalu badi? (b) Mbi tulenda vanga muingi kuba sadisa kukolama mu kiyeku kiawu kimona?

12 Buboti beni kumona mambu kimvuka ayi zikhomba ziwombo bamvanganga muingi kusadisa zikhomba badi mu kisalu ki thangu ka thangu. Bankaka banzolanga kukindisa zikhomba badi mu kisalu ki thangu ka thangu batatamana mu kisalu beni. Bankaka badi luaku lu kuba sadisa mu kinsuni. Vadi mvandi bankaka ba kivananga muingi kukieba basi dikanda diawu. Mu phila ayoyi, badi mu kisalu ki thangu ka thangu balenda tatamana kusadila ku kibuangu badi. (Ngalatia 6:2) Vadi khomba wutambudi kiyeku kimona widi mu kusadila mu kimvuka kiaku? Boti vadi, bika yindula ti mawu mamonikini kibila nandi kasa sala ko buboti voti diambu dimbi kavengi. * Vayi, vanga mamoso wunnunga muingi kunsadisa kukolama mu kiyeku kimona. Tambula khomba beni mu mioko miodi ayi ntonda mu kisalu kiandi kioso, kheti kasi bue vanga  ko mambu mawombo mu kibila ki buvinya buandi. Tomba kunzaba buboti. Ngie wulenda longuka mambu mawombo mu kifuani, nzayilu ayi nduenga kadi.

13. Lusalusu mbi wulenda vana zikhomba batambula kiyeku kimona?

13 Va thononu, zikhomba aziozi batambula kiyeku kimona balenda tomba lusalusu muingi kubaka nzo, kisalu voti biuma binkaka badi tsatu. Ḿba bawu bantomba zithuadusulu zimona muingi kuvisa mambu ma lumbu ka lumbu, dedi kufuta ziphaku. Ayi malutidi nkiza: bawu basintomba ko tuba mona kiadi vayi tuba visa. Ḿba bawu voti muisi dikanda widi mu kuviokila mu mambu ma buvinya. Voti zikhomba aziozi badi mu kiunda mu kibila ki lufua lu mutu banzolanga. * Ayi bankaka mu khambu kuba mona, ḿba khumbu zinkaka bandilanga mu kibila ki tsatu yi bakundi babika mu kiyeku baba. Thangu yiwombo yilenda vioka muingi kukolama mu mambu moso amomo bamviokila.

14. Buidi minsamuni basadisila khomba yimueka yinkieto kukolama mu kiyeku kiandi kimona?

14 Mu mua thangu ayoyi, lusalusu luaku ayi kifuani kiaku kilenda sadisa zikhomba kukolama mu luzingu lumona. Khomba yimueka yinkieto wusala mu mimvu miwombo ku tsi yi kinzenza wutuba: “Mu kiyeku yiba kumbusa, minu yaba vananga ndongukulu yi Kibibila kadika kilumbu. Vayi mu kiyeku kiama kimona yisa nunganga ko kuzibula Kibibila, ni kheti kumonisa video mu kisalu ki kusamuna. Vayi minsamuni mi kimvuka kimona yiba, baba kuthumisanga kuvutukila batu bavana kimbangi ayi kuvana ndongukulu yi Kibibila. Kumona kifuza ayi kibakala zikhomba aziozi bammonisanga mu kuvana ndongukulu yi Kibibila, kutsadisa kuba mayindu mamboti matedi kizunga kimona. Yilonguka kutona masolo mu kizunga beni. Mamoso amomo matsadisa kubue vutula mayangi yiba.”

BIKA KUVONGA

Tomba kubakula ziphila wulenda buela kuyivana mu kisalu ki kusamuna mu kimvuka kiaku kimona (Tala bitini bi matangu 15-16) *

15. Buidi wulenda bakila ndandu mu kiyeku kiaku kimona?

15 Ngie wulenda baka ndandu yiwombo mu  kiyeku kimona. Bika kuyindula ti kisalu kimbi wuvanga mu kiyeku wuba voti wusiedi ko luvalu. Tsikika mayindu maku mu phila Yave kadi mu kusadisila ayi tatamana kusamuna. Landakana kifuani ki Baklisto bakuikama mu sekulu yitheti. Bawu baba ‘samunanga zitsangu zimboti zi diambu di Nzambi’, kioso kibuangu baba banga. (Mavanga 8:1, 4) Ngie wala baka ndandu yiwombo mu kuvanga mangolo ma kutatamana kusamuna. Buka, bo bakukisa mintuami ntuala mimueka ku tsi yi kinzenza baba sadilanga, bawu bayenda ku tsi yinkaka yifikama. Ku tsi beni kuba tsatu yi minsamuni bankolukanga mbembo yi tsi baba kukisa. Mu mua zingonda zivioka, batu bawombo bakota mu mangumba bazibula mu mbembo mintuami ntuala beni baba samunanga.

16. Mbi biala kusadisa kuba mayangi mu kiyeku kiaku kimona?

16 ‘Mayangi mamfumina kuidi Yave mawu mangolo minu.’ (Nehemia 8:10, tala matangu madi va wanda mu nwt-TPO.) Bukiedika ti ḿba befu tunzolanga beni kiyeku kitu. Vayi tho yi mayangi mitu mafueti ba kusadila Yave, kubika kuandi kisalu tumvanganga. Diawu tatamana kukindisa kikundi kiaku na Yave ayi dinda nduenga, thuadusulu ayi lusalusu. Tebuka moyo ti ngie wulonguka kuzola kiyeku wuba kibila ngie wuyivana muingi kusadisa batu. Tatamana kukivana mu kiyeku kiaku kimona ayi tala buidi Yave kala kusadisila kuzola kiawu.—Mpovi 7:10.

17. Mbi tufueti tebukanga moyo mu kiyeku tuidi bubu?

17 Tebuka moyo ti befu tuala tatamana kusadila Yave mu mvu ka mvu, vayi kiyeku tuidi bubu kidi tsukulu. Mu nza yimona, ḿba befu boso tuala tambula biyeku bimona. Aleksey, tube tubila va thononu, wunkikinina ti mamoso madi mu kummonikina yidi khubumunu yi mambu mankuiza kuntuala. Nandi wutuba: “Tona muna tona, minu yizebi ti Yave widi ayi nza yimona yala kuiza, vayi kumbusa yisa ba ko beni lufiatu mu mawu. Vayi bubu, yidi kikundi kifikama na Yave ayi yimmuena ti nza yimona yambelama kukuiza.” (Mavanga 2:25) Diawu, kheti wuntambula kiyeku kimona, tatamana kukindisa kikundi kiaku na Yave. Nandi kalendi kukuekula ko. Vayi, nandi wala tatamana kuba va khozu’aku muingi kukusadisa kubaka mayangi mu kiyeku kiaku—kosokua kuma widi voti kioso kiyeku widi.—Yesaya 41:13.

NKUNGA 90 Tukindasananga Befu na Befu

^ Lut. 5 Khumbu zinkaka, zikhomba badi mu kisalu ki thangu ka thangu bantombuluanga kubika kiyeku kiawu voti kutambula kiyeku kimona. Dilongi adidi, dinkuiza tubila mambu maphasi zikhomba aziozi bandengananga ayi mbi balenda vanga muingi kukolama mu mambu mambaluka. Tunkuiza mona mvandi mbi bankaka balenda vanga muingi kuba kindisa ayi kuba sadisa. Minsua tuantubila mu dilongi adidi, milenda tusadisa befu boso kuba bavumbama bo mambu mambaluka.

^ Lut. 4 Bobuawu mvandi, bo bayiza ba bakulutu zikhomba ziwombo baba biyeku, bavana biyeku biawu kuidi zikhomba bakhidi matoko. Tala malongi “Irmãos mais velhos —Jeová dá valor à lealdade de vocês”, mu Kibanga ki Nsungi ki Ngonda Yivua, mvu 2018, ayi “Tatamana Kuba Ndembama mu Ntima Kheti bo Mambu Mambaluka”, mu Kibanga ki Nsungi ki Ngonda Yikumi, mvu 2018.

^ Lut. 12 Mu thangu zikhomba badi mu kisalu ki thangu ka thangu bantambulanga kiyeku kimona, bakulutu ba kimvuka bafueti fika fila nkanda wuntubila matedi luzingu lu kiphevi lu zikhomba mu kimvuka kiandi kimona. Kuvanga mawu kuala basadisa kufika vutuka mu kisalu ki ntuami ntuala, nkulutu wu kimvuka voti nsadisi wu bakulutu ba kimvuka.

^ Lut. 13 Tala kikhuku ki malongi “Como lidar com a dor da morte”, mu Despertai! thalu 3, mvu 2018.

^ Lut. 57 MAMBU MADI MU ZIFIKULA: Bakuela bamueka bambika kiyeku kiawu mu kisalu ki misioni ayi mu kiunda, bankanina zikhomba mu kimvuka kiawu.

^ Lut. 59 MAMBU MADI MU ZIFIKULA: Bo bavutuka ku tsi babutukila, bakuela beni bantatatama kusambila ayi bandinda lusalusu lu Yave muingi kununga mambu ma phasi bamviokila.

^ Lut. 61 MAMBU MADI MU ZIFIKULA: Mu lusalusu lu Yave, bakuela beni bamvutuka mu kisalu ki thangu ka thangu. Bawu bansadilanga mbembo balonguka mu kisalu ki misioni muingi kusamuna zinzenza bankolukanga mbembo beni ku kizunga ki kimvuka kiawu kimona.