Skip to content

Skip to table of contents

Kiminu—Khadulu Yitu Sadisanga Kukindama

Kiminu—Khadulu Yitu Sadisanga Kukindama

KIMINU yidi khadulu yitu vananga beni mangolo. Dedi, kheti Satana wumvanga mamoso muingi kutulula kikundi tuidi na Yave, kiminu kitusadisanga kuzimisa “madionga moso ma mbazu mamfidisanga mutu [wumbi].” (Efeso 6:16) Kiminu kitu sadisa kununga ziphasi zinneni zidi buka miongo. Yesu wukamba minlonguki miandi: ‘Beno kuba kiminu kidi buka luteti lu mutalide, beno luela kamba mongo awuwu: ‘Botuka avava,’ yenda kuna ayi wawu wela botuka.’ (Matai 17:20) Bo buidi ti kiminu yawu khadulu yilenda kindisa kikundi kitu na Yave, buboti beni kufiongunina biuvu abibi: Mbi binsundula kiminu? Buidi mayindu ma ntim’itu malenda bifisila kiminu kitu? Buidi tulenda kindisila kiminu kitu? Ayi kuidi nani tufueti ba kiminu?—Loma 4:3.

MBI BINSUNDULA KIMINU?

Kiminu kisinsundula ko to kukikinina mu mambu Kibibila kintuba. Kibila nati ‘zipheve zimbi bankikininanga [ti Nzambi widi] ayi bantitubukanga.’ (Yakobi 2:19) Diawu, mbi binsundula kiminu?

Dedi bo tuididi lufiatu ti muinya ayi builu biala tatamana, tuidi mvandi lufiatu ti zikhanu zioso zi Nzambi ziala salama

Kibibila kinsudikisa ti kuba kiminu kunsundula kuba biuma biodi. Kitheti, ‘kiminu kidi lufiatu ti mala kuiza mambu tuntedimina.’ (Ebeleo 11:1a) Boti widi kiminu, ngiewu wisi ko divuda ti mamoso Yave katuba madi makiedika ayi mala salama. Dedi, Yave wukamba basi Isaeli: ‘Valenda ba kilumbu beno luala nunga kuvonda luwawanu luami lutedi muinya ayi luwawanu luami lutedi builu, muingi kubika ba muinya ayi builu mu thangu yifuana? Ndamba! Bobuawu mvandi, vasi ko kiuma kilenda vonda luwawanu yivanga na kisadi kiami Davidi.’ (Yelemia 33:20, 21) Ngie widi boma ti valenda ba kilumbu muinya wala khambu buemonika ku diyilu ayi kukhambu bue ba meni ayi builu? Bukiedika ti ndamba. Kibila vadi minsiku mintuadisanga Ntoto muingi kudiengidila Muinya. Boti ngie wisi ko divuda mu minsiku amiomi, bukiedika ti wufueti ba divuda ti Mvangi wuvanga biuma bioso kalenda dukisa mambu kakanikisa?—Yesaya 55:10, 11; Matai 5:18.

Kimuadi, kiminu kidi ‘bivisa bikiedika bi mambu tukhambu mona.’ Kibibila kintuba ti kiminu kidi bivisa bikiedika voti biuma tukhambu mona mu meso vayi bidi bikiedika. (Ebeleo 11:1b.) Kifuani mbi kimmonisa ti tulenda kikinina mu mambu tukhambu mona? Yindulabu boti muana kilezi wu kukuvula: ‘buidi zabidi ti phemu yidi?’ Ngie wumonanga ko phemu, vayi wulenda kamba muana kilezi biuma bimmonisa bivisa ti phemu yidi, dedi—Mvumuku, biuma kunikuka mu kibila ki phemu ayi binkaka. Bo muana kankikinina ti biuma abiobi bidi bikiedika, nandi wumvisa ti tulenda kikinina mu mambu katu monanga ko. Bobuawu mvandi, kiminu kitu kifueti sikimina mu bivisi bikiedika.—Loma 1:20.

MUINGI TUBA KIMINU TUFUETI VUA NKINZA KIEDIKA

Bo buididi ti kimunu kitombulu bivisa, mutu kalenda to kuba kiminu na kuba “diela dizabila mambu ma kiedika.” (1 Timoteo 2:4) Vayi vatombulu mambu mankaka. Mvuala Polo wusonika: ‘Mu ntima muawu mwidi kiminu.’ (Loma 10:10) Mutu kalendi ko to kukikinina mu kiedika, vayi kafueti  vua kiawu nkinza mu ntima woso. Mu kuvanga mawu, buawu to kala nungina kumonisa kiminu kiandi, voti kuzingila mu phila yinkuangidika Nzambi. (Yakobi 2:20) Kheti widi bivisa bikiedika, mutu wukhambu vua nkinza kiedika, wummanganga kubika zikhadulu ziandi zimbi ayi wutombanga bibila muingi kuvanga mo katidi. (2 Petelo 3:3, 4; Yuda 18) Diawu, mu thangu yikhulu, bakana ko baboso bamona mangitukulu bakuna kiminu. (Zintalu 14:11; Yoane 12:37) Pheve yinlongo yi Nzambi yintuadisanga to kiminu mu mintima mi batu banzolanga kiedika.—Ngalatia 5:22; 2 Tesalonika 2:10, 11.

MBI BISADISA DAVIDI KUBA KIMINU KINGOLO

Mu bifuani bi batu kakuna kiminu kingolo tuantubila matedi ntinu Davidi. (Ebeleo 11:32, 33) Vayi bakana ko baboso va dikanda di Davidi baba kiminu buka nandi. Tala kifuani ki Eliabi, khomba nkulutu wu Davidi. Bo Ngoliati kafiesa dikabu di Nzambi, Davidi wunyonga beni. Vayi Eliabi wumonisa kukhambu ku kiminu, mu kutumbidila Davidi mu kunkamba ti wuba mayindu mambi. (1 Samueli 17:26-28) Vasi ko mutu wumbutukanga na kiminu, ni kutambula kiawu kuidi matata, diawu kiminu ki Davidi kiyizila mu kikundi kiandi ayi Nzambi.

Mu Minkunga 27, Davidi wumonisa mbi binsadisa kukuna kiminu kingolo. (Lutangu 1) Davidi waba yindulanga mu mamoso mammonikina ayi buidi Yave kansadisila kununga zimbeni ziandi. (Matangu 2, 3) Nandi waba vananga beni luvalu mbuongimini’andi kuidi Yave. (Lutangu 4, 6) Davidi waba dindanga lusalusu kuidi Yave mu lusambulu. (Lutangu 7, 8) Davidi mvandi waba tomba kudiatila mu nzizila zi Yave. (Lutangu 11) Kiminu kiba beni nkinza kuidi Davidi, diawu kayuvudila: ‘Khanu kuidi yidi boti yisi ko kiminu?’—Lutangu 13.

BUIDI BU KUKINDISILA KIMINU KIAKU

Ngie wulenda ba kiminu Davidi kaba. Mu kulandakana mambu nandi katuba mu Minkunga 27. Bo buididi ti kiminu kintobuluanga luzabu lukiedika, nkinza beni kulonguka Kibibila ayi bilongulu. Bo wumbuela kulonguka, buawu mvandi wunkuiza nungina kukuna khadulu ayoyi yi mbutu wu kiphevi. (Minkunga 1:2, 3) Bo wulonguka, botula thangu muingi kuyindula. Bo wunyindulanga mu mambu wuntanga, phuila yi kutonda Yave yala buelama, ayi tsatu yi kumonisa kiminu kiaku yala buelama. Ayi wala vua nkinza kumbuongimina mu zikhutukunu ayi mu kulonga matedi kivuvu kiaku kuidi bankaka. (Ebeleo 10:23-25) Mvandi, ngie wulenda monisa kiminu kiaku mu “sambilanga zithangu zioso mu [khambu] vonga.” (Luka 18:1-8) Diawu, “lusambilanga mu [khambu] vonga” kuidi Yave, mu kuba lufiatu ti nandi ‘wuku kiebanga.’ (1 Tesalonika 5:17; 1 Petelo 5:7) Kiminu kitunatanga kuvanga mambu masonga ayi bo tumvanga mambu masonga, kiminu kitu kinluta kinda.—Yakobi 2:22.

 BA KIMINU MU YESU

Va builu ava kufua, Yesu wukamba minlonguki miandi: “Luwilukila Nzambi; ayi lunguilukila [minu mvami].” (Yoane 14:1) Mawu mammonisa ti tulendi ba ko to kiminu mu Yave, vayi mvandi mu Yesu. Buidi wulenda monisina ti widi kiminu mu Yesu? Tuemmona ziphila zitatu.

Mbi binsundula kuba kiminu mu Yesu?

Yitheti, tadila khudulu buka nkhayilu yi Nzambi kuidi ngiewu. Mvuala Polo wutuba: “[Minu yinzingilanga] mu minu kioki kidi yama mu Muana wu Nzambi, mutu wowo wunzola ayi wikiyekula [naveka] mu diambu diama.” (Ngalatia 2:20) Dedi Polo, ngie wummonisanga kiminu mu Yesu mu kukikinina ti khudulu yidi luvalu mu ngiewu, yidi luaku muingi Nzambi kalemvukila masumu maku, luaku muingi ku kuvana kivuvu ki kuzinga mvu ka mvu ayi yidi mbonosono yi luzolo lulutidi lu Nzambi mu ngiewu. (Loma 8:32, 38, 39; Efeso 1:7) Ngie kuba lufiatu alolo, wala nunga kuyala mabanza maku makhambu fuana.—2 Tesalonika 2:16, 17.

Yimuadi, sambilanga kuidi Yave. Nkhayilu yi Yesu yituvana luaku lu kuba bakundi ba Nzambi. Mu kibila ki khudulu, tulenda sambila kuidi Yave “mu diana dioso muingi katumona kiadi ayi tutambula nlemvo wunsadisanga mu thangu yifuana.” (Ebeleo 4:15, 16; 10:19-22) Nsambu wunkindisanga lufiatu luitu lu kubika sumuka va ntuala Yave.—Luka 22:40.

Yintatu, tumukina Yesu. Mvuala Yoane wusonika: ‘Woso widi kiminu mu Muana widi luzingu lukalumani, vayi woso wunkambu tumukina Muana kalendi baka ko luzingu lukalumani, vayi ngazi yi Nzambi yala tatamana yandi.’ (Yoane 3:36) Yoane wutuba ti kukhambu monisa kiminu kunsundula kukhambu tumamana. Diawu muingi wumonisa ti widi kiminu mu Yesu, wufueti kuntumukina. Phila yimueka tulenda tumukina Yesu yidi mu kulandakana ‘nsiku wu Klisto,’ voti kulandakana mamoso nandi kalonga ayi katuma. (Ngalatia 6:2) Phila yinkaka tulenda monisina ti tuntumukinanga Yesu yidi mu kulandakana zithuadusulu nandi katu vananga mu nzila ‘nnanga wukuikama.’ (Matai 24:45) Ngie kutumukina Klisto, wala baka mangolo muingi kununga ziphasi zimmonikina buka kivuka kingolo.—Luka 6:47, 48.

‘LUKINDISA KIMINU KINU KISAMA’

Kilumbu kimueka, dibakala dimueka wuyamikisa kuidi Yesu: ‘Minu yidi kiminu! Tsadisa vama yintombulu kiminu!’ (Malako 9:24) Nandi wuba nkadu kiminu, vayi wuyikulula mu kukikinina ti kafueti buela kiminu. Dedi dibakala adiodi, ḿba vadi thangu tuntombilanga kubuela kiminu kitu. Dedi bo tuba muena, tufueti longuka Diambu di Nzambi ayi kufiongunina diawu. Mawu mala buela luzolo luitu mu Yave. Mvandi luzolo luitu luala buelama boti—va kimueka na zikhomba zitu tumbuongimina Yave, tunsamunanga matedi kivuvu kitu kuidi bankaka ayi tuntatamana mu nsambu. Ayi bilutidi nkinza, befu ‘kukindisa kiminu kitu kisama’, tuala tambula lusakumunu lulutidi mu ziazioso: ‘Kutatamana mu luzolo lu Nzambi’.—Yuda 20, 21.