Skip to content

Skip to table of contents

 DILONGI 8

Kibila Mbi Tufweti Vutudilanga Matondo?

Kibila Mbi Tufweti Vutudilanga Matondo?

“Luzaba vutulanga matondo.”KOLOSAI 3:15.

NKUNGA 46 Tukutonda Yave

MAMBU TWANLONGUKA *

1. Bwidi dibakala mwisi Samalia Yesu kabelusa kamonisina ti wuvwa nkinza mambu bamvangila?

KUMI di babakala baba mu kyunda. Ayi basa ba ko kivuvu ti kuntwala balenda bwe ba buvinya bumboti. Vayi kilumbu kimweka, bawu bamona ku kinanu Yesu, Nlongi Wumboti. Bawu bayuwa ti Yesu wuba belusa zimbela ziwombo, ayi baba lufyatu ti nandi kalenda kubabelusa. Diawu batendukila beni: ‘Yesu, nlongisi, wutufwila nlemvo!’ Ayi kumi dyoso di batu babeluka. Bukyedika, baboso bayangalala beni mu mamboti Yesu kabamonisina. Vayi wumweka mu bawu kasa kwangalala ko to mu mamboti Yesu kamvangila, nandi wumonisa ti wuvwa nkinza * mambu Yesu kamvangila mu kumvutudila matondo. Dibakala beni dibelusu wuba mwisi Samalia, vayi nandi wuzitisa Nzambi ‘mu mbembo yinangama.’—Luka 17:12-19.

2-3. (a) Kibila mbi khumbu zinkaka tulenda zimbakana kuvutula matondo? (b) Mbi tunkwiza tubila mu dilongi adidi?

2 Dedi dibakala mwisi Samalia, befu mvitu tutidi kuvutulanga matondo kwidi batu ba tuvangilanga mamboti. Khumbu zinkaka, tulenda zimbakana kuvutula matondo mu mamboti ba tuvangilanga.

3 Mu dilongi adidi, tunkwiza tubila kibila mbi didi dyambu dinkinza kwidi befu kuvutulanga matondo mu mambu tuntuba  ayi tumvanga. Tunkwiza longuka bifwani bi batu Kibibila kintubila bavutula matondo ayi bakhambu vutula matondo. Bosi tunkwiza tubila ziphila tulenda monisina ti tumvutudilanga matondo.

KIBILA MBI TUFWETI VUTUDILANGA MATONDO?

4-5. Kibila mbi tufweti vutudilanga matondo?

4 Yave widi kifwani kimboti kwidi befu mu matedi kuvutula matondo. Phila yimweka kamvangilanga mawu yidi mu kusakumunanga batu ba kunkwangidikanga. (2 Samueli 22:21; Minkunga 13:6; Matai 10:40,41) Ayi Kibibila kitukindisa mwingi ‘tulandakana kifwani ki Nzambi, dedi bana ba luzolo.’ (Efeso 5:1) Befu tutidi kulandakana kifwani ki Yave, akyoki kiawu kibila kilutidi nkinza tufweti vutudilanga matondo.

5 Tala kibila kinkaka tutidi kuvutudilanga bankaka matondo. Kuvutula matondo kwidi buka bidya bimboti—binluta ba lweki bo wunkabila bankaka. Befu tunkwangalalanga beni bo tunzaba ti bankaka bamvutulanga matondo mu mambu tumvanganga. Bo tumvutula matondo, tumvanganga bankaka kukwangalala. Mutu wu tumvutula matondo wunzaba ti mangolo kavengi ma kutusadisa, voti kutuvana kyuma tuntomba masi ko maphamba. Mu kibila akyoki, kikundi kitu na mutu tuvutudi matondo kimbwela kindama.

6. Kithwadi mbi kuvutula matondo kidi na maçã mavangulu mu wola?

6 Kuvutula matondo mfunu beni kwidi. Kibibila kintuba: ‘Dedi zi maçã zi wola mu zindonga zi palata, buawu mvandi bwididi dyambu ditubulu mu thangu yifwana.’ (Zingana 25:11) Yindul’abu bwidi maçã mamboti bavangila mu wola ayi palata malenda bela! Ayi yindula phila malenda bela luvalu! Bwidi wala bela ngye kutambula nkhayilu ayoyo? Matondo wumvuntula kwidi bankaka  malenda ba beni luvalu. Yindula mambu amama: Maçã mavangulu mu wola malenda kadidila mimvu miwombo. Bobuawu mvandi, matondo wumvutulanga kwidi batu malenda tebukulu moyo kwidi bantambula yawu mu luzingu luawu loso.

BAWU BAVUTULA MATONDO

7. Dedi buntubila Minkunga 27:4, bwidi Davidi ayi minsoniki minkaka mi minkunga bamonisina ti baba vutulanga matondo?

7 Bisadi biwombo bi Nzambi bavutula matondo. Wumweka mu bawu widi Davidi. (Tanga Minkunga 27:4.) Nandi wuvwa beni nkinza mbwongimini yikyedika ayi tulenda mona mawu mu mambu kavanga. Nandi wuvana byuma byandi biwombo bi luvalu mwingi batunga tempelu. Nkunu wu Asafi bavutula matondo mu kusonika minkunga, voti minkunga mi nzitusu. Mu nkungi mweka, bawu batonda Nzambi ayi bayituka beni mu ‘bisalu bimboti’ bi Yave. (Minkunga 75:1) Bukyedika, Davidi ayi nkunu wu Asafi baba tomba kumonisa kwidi Yave ti bawu baba vutudila beni matondo mu lusakumunu loso batambula kwidi nandi. Wulenda yindula ziphila wulenda landikinina kifwani ki bisadi abyobi bi Yave?

Mbi nkanda wu Polo kwidi basi Loma wutulonga matedi kuvutulanga matondo? (Tala bitini bi matangu 8-9) *

8-9. Bwidi mvwala Polo katondila zikhomba zi bakyeto ayi zi babakala, ayi mambu mbi mayiza monika?

8 Mvwala Polo wuba vwanga nkinza zikhomba zyandi zi bakyeto ayi zi babakala ayi wumonisa mawu mu phila kaba batanguninanga. Nandi wuba vutulanga matondo kwidi Nzambi mu bawu mu minsambu myandi. Mvandi wumonisa ti wuba kubavwanga nkinza bo kasonika matedi bawu. Mu buku yi Loma 16:1-15, Polo wutubila 27 di mazina ma Baklisto. Polo wutebukila moyo Prisca ayi Akila ‘batula luzingu luawu va kingela’ mu kibila kyandi, ayi mvandi wutubila Fobe buka ‘nsadisi wu bawombo’ kubunda mvandi Polo. Nandi wutonda zikhomba zi babakala ayi zi bakyeto.

9 Polo wuzaba ti zikomba zyandi zyoso baba batu basumuka, vayi bo kaba mana kusonika nkanda kwidi basi Loma, nandi wuluta tubila zikhadulu ziawu zimboti. Yindul’abu khindusulu zikhomba beni babaka bo bayuwa mambu Polo kasonika matedi kimvuka. Mambu amomo, mavanga kikundi kiawu na Polo kibwela kinda. Ngye wumvutulanga matondo mu mambu mamboti zikhomba mu kimvuka bantubanga ayi banvanganga?

10. Mbi tulenda longuka mu phila Yesu katondila minlandikini myandi?

10 Mu minkanda myandi kwidi bimvuka binkaka ku Ásia Menor, Yesu wuvutula matondo kisalu milandikini myandi bavanga. Dedi mu tsangu kafila kwidi basi Tiatila, nandi wutonina mu mambu amama: “[Yizebi] mavanga maku ayi luzolo luaku, [kiminu] kiaku, kisalu kiaku, mvibudulu’aku ayi mavanga maku matsuka maviokidi momo matheti.” (Nzaikusu 2:19) Yesu kasa tuba ko to phila kisalu kyaba bwelimina, vayi mvandi wubatonda mu kibila ki zikhadulu ziba sadisa kuvanga mambu mamboti. Kheti Yesu wusemba bankaka ku Tiatila, nandi wutona ayi wumanina malongi mandi mu khindusulu. (Nzaikusu 2:25-28) Yindula kiyeku Yesu kadi banga mfumu wu bimvuka byoso. Khanu kalendi tutonda ko mu kisalu tukumvangilanga. Kheti bobo, nandi wututondanga. Kidi kifwani kimboti kabikila kwidi bakulutu ba kimvuka!

BAWU BASA VUTULA KO MATONDO

11. Dedi bummonisina Ebeleo 12:16, bwidi Esau kaba tadilanga mambu ma kiphevi?

11 Kyadi ayi kyunda, bila batu bankaka Kibibila kantuba basa vutula ko matondo. Dedi kifwani ki Esau, kheti matata mandi baba zolanga ayi kinzikanga Yave, nandi kabasa vwanga ko nkinza mambu ma kiphevi. (Tanga  Ebeleo 12:16.) Bwidi kamonisina mawu? Esau mu khambu yindula, wusumbisa kikulutu kyandi kwidi khomb’andi wu kilezi Yakobi, mu kibila ki mwa lulonga lu mbizi. (Ngenesi 25:30-34) Bosi, Esau wunyonga beni mu kibila ki makani kabaka. Vayi nandi kasa vwa ko nkinza lwaku kaba, diawu kakhambu bela kibila mwingi kunyonga bo kakhambu tambula lusakumunu lu kikulutu kyandi.

12-13. Bwidi basi Isaeli babika kubwe vutudilanga matondo kwidi Yave, ayi mambu mbi mayiza monika?

12 Basi Isaeli baba bibila biwombo mwingi kuvutulanga matondo. Yave wubavukisa mu buvika ku Ngipiti mu kutwadisa Kumi di Bimangu. Nzambi kavukisila dikabu di isaeli mu kutulula masodi moso ma Falawo ku Ḿbu Wubenga. Basi Isaeli batonda beni, diawu bayimbila nkunga wu ndungunu mwingi kuzitisa Yave. Vayi bawu batatamana kuvutulanga matondo?

13 Bo basi Isaeli baba vyokila mu mambu mamona, bawu bafika zimbakana mambu moso mamboti Yave kabavangila. Bawu babika kubwe vutudila Yave matondo. (Minkunga 106:7) Bwidi? ‘Nkangu woso wu basi Isaeli batona kunyungutina Mose ayi Aloni’—vayi bawu baba nyungutina Yave. (Esodu 16:2, 8) Yave wuba beni kyunda bo dikabu dyandi babika kubwe vutulanga matondo. Diawu kakanikisa ti nkangu woso wu basi Isaeli baba zingila mu thangu yinani bela mana kufwa ku thandu, kubotula kwandi Yosua ayi Kalebi. (Zintalu 14:22-24; 26:65) Ndoko tumona bwidi tulenda bika landikinina bifwani abyobi bimbi, vayi kulandakana binkaka bimboti.

VUTULANGA MATONDO BUBU

14-15. (a) Bwidi bakwela balenda monisina ti bakivwanga nkinza? (b) Bwidi matata balenda longila bana bawu kuvutulanga matondo?

14 Va dikanda. Dikanda dyoso dimbakanga ndandu boti kadika mutu mu bawu wumvutulanga matondo. Bakwela bamvutulanga matondo mu mambu kadika mutu mu bawu kamvanganga, bambwelanga kuba bafikama. Bawu bamonanga ko phasi kuzimbakana zinzimbala zi kadika mutu. Nnuni wumvutulanga matondo mu mambu nkanzi’andi kamvanganga, kamonanga ko to mambu mamboti kantubanga voti kamvanganga, vayi ‘wuntelamanga ayi wukuntondanga.’ (Zingana 31:10, 28) Ayi nkyeto widi ndwenga wunzabikisanga nnuni’andi mbi nandi kanluta zolanga mu nandi.

15 Matata, bwidi mulenda longila bana binu kuvutulanga matondo? Tebuka moyo ti bana  baku bala luta landakananga mambu wuntuba ayi wumvanga. Diawu vananga kifwani kimboti mu kuvutulanga matondo bo bana baku bakuvangila dyoso kwa dyambu. Longa bana baku kuvutulanga matondo bo bankaka ba kubavangila dyoso dyambu. Sadisa bana baku bavisa ti bafweti vutulanga matondo mu ntima woso, ayi mambu bantuba malenda kwangidika bankaka. Buka, mwana nkyeto wumweka bantedilanga Clary wutuba: “Mam’ami wutona kukonzula bana batatu naveka bo kaba 32 di mimvu. Bo yiba 32 di mimvu, yimona ti disa ba ko dyambu dilwelu kwidi nandi bo kaba 32 di mimvu. Diawu yinkamba ti yimvutulanga beni matondo mu mambu moso kavanga mwingi kutukonzula. Nandi wukhembi ti mambu mami madi mamboti kwidi nandi, ayi bo kanyindulanga mawu, ntim’andi wunkwangalalanga beni.”

Longa bana baku kuvutulanga matondo (Tala lutangu 15) *

16. Vana kifwani kimmonisa ti kutonda bankaka kulenda kuba kindisa.

16 Mu kimvuka. Befu tunkindisanga zikhomba zitu bo tuba vutulanga matondo. Buka, Jorge widi 28 di mimvu ayi widi nkulutu kimvuka, wuyiza ba beni kubela. Nandi kasa nunga ko kwenda mu zikhutukunu mu ngonda yimweka. Kheti bo katona kubwe kwendanga mu zikhutukunu, nandi kabasa nunga ko kuvanga biyeku binkaka mu kimvuka. Jorge wutuba: “Yaba mona ti yisi ko tsalulu mu kibila ki mambu yaba khambu nunga kuvanga ayi bo yaba khambu nunga kuvanga biyeku byami bi kimvuka. Vayi kutsuka lukutukunu lumweka, khomba mweka wukhamba: ‘Yikuvutula beni matondo mu kifwani kyaku kimboti, kiawu kinsadisanga beni dikanda dyama. Ngye wulendi yindula ko phila tuba zodilanga malongi wuba vanganga mu kimvuka mu mimvu mima vyoka. Mawu mankindisanga kiminu kitu.’ Minu yiyangalala beni ayi yitona kudila. Mambu kakhamba, mawu yaba tomba kukuwa.”

17. Dedi buntubila Kolosai 3:15, bwidi tulenda vutudila Yave matondo mu byabyoso katukabilanga?

17 Kwidi Nzamb’itu wunkabanga. Yave wutuvananga bidya biwombo bi kiphevi. Dedi mambu tunlongukanga mu zikhutukunu, mu bilongulu bitu, ayi mu zikhondi zitu zi mayo. Ngye wumana kuwa dilongi mu kimvuka, kutanga mwa dilongi mu levista voti kumona video mweka ayi kutuba: Mambu amama mawu yaba tomba kukuwa’? Bwidi tulenda vutudila Yave matondo? (Tanga Kolosai 3:15.) Phila mweka yidi mu kuntonda mu nzila lusambulu mu minkhayilu myoso katukabilanga.—Yakobi 1:17.

Kudyodisanga Nzo yi Kintinu yidi phila yimboti yi kumonisa ti tumvutulanga matondo (Tala lutangu 18)

18. Mu ziphila mbi tulenda monisina ti tumvwanga nkinza Nzo’itu yi Kintinu?

 18 Mvandi tumvutulanga matondo kwidi Yave bo tundyodisa kibwangu tukumbwongiminanga. Befu tundyodisanga kadika thangu Nzo yi Kintinu ayi batu bansadilanga bisengu bintyamunanga mbembu ayi zivideo bansadilanga biawu buboti mwingi bibika vavuka. Bo tuntatamana kudyodisa Zinzo zi Kintinu, ziawu zyala kadidila mu mimvu miwombo ayi zyalasa tombulu ko zimbongo ziwombo mwingi kuziludika. Mu phila ayoyi, bala luta sadila zimbongo mwingi kutunga ayi kubwongisa Zinzo zinkaka zi Kintinu mu nza yimvimba.

19. Mbi wulenda longuka mu kifwani ki nsungi mweka wu divula ayi nkazi’andi?

19 Kwidi batu bansalanga beni mu kibila kitu. Bo tumvutula matondo, mambu tuntuba malenda sadisa mutu wunkuwa boti widi mu kuvyokila mu mambu maphasi. Tala kifwani ki nsungi mweka wu divula ayi nkazi’andi. Bo bamana kusamuna, bawu bavutuka ku nzo. Yiba thangu kisivu ayi kyozi kiwombo kiba, diawu nkyeto’andi kaladila na nzaku’andi. Kilumbu kinkaka va meni, nandi wukamba nnuni’andi ti kabasa bwe nunga ko kutatamana mu kisalu kiawu. Mu meni beni, nkanda mweka wufumina ku filiali, bafila kwidi nandi. Mu nkanda beni bantonda mu kisalu kyandi ayi lukwikumunu kammonisanga. Mu nkanda beni batuba ti bazebi ti didi dyambu diphasi kadika sabala kuzinga mu bibwangu bivyakana. Nnuni’andi wutuba: “Nandi wuyangalala beni mu nkanda bamfila ayi kabasa bwe tubanga ko ti wutidi kubika kisalu kitu. Mu thangu ziphasi, nandi wu kukhindisanga yitatamana boti mu kyunda yidi.” Bakwela abobo batatamana mu kisalu ki nsungi wu divula mu 40 ma mimvu.

20. Mbi tufweti kwedikanga kuvanga kadika kilumbu ayi mu kibila mbi?

20 Kadika kilumbu tufweti vanganga mangolo mwingi kuyitondanga mu mambu tuntuba ayi tumvanga. Mambu tuntuba ayi tumvanga malenda ba mawu mutu wunkaka kalenda tomba kukuwa mwingi kanunga ziphasi kandengana mu nza yiwedi batu bakhambu vutulanga matondo. Ayi bo tumvutulanga matondo, befu twala baka bakundi balenda zinga yitu mvu ka mvu. Bilutidi nkinza, befu twala landakananga Tat’itu Yave, wunzolanga kukaba.

NKUNGA 20 Wuvana Yesu Mwan’aku Wumweka to

^ Lut. 5 Mbi tulenda longuka mu matedi Yave, Yesu ayi dibakala wuba bwazi mu matedi kuvutulanga matondo? Mu dilongi adidi tunkwinza tubila bifwani abibi ayi binkaka. Tunkwinza tubila mvandi kibila mbi didi dyambu dinkinza kuvutulanga matondo ayi tunkwiza mona ziphila mbi tulenda vangila mawu.

^ Lut. 1 TSUDUKUSU YI BIKUMA: Kuvwa nkinza kunsundula kuzaba luvalu lu kyuma voti luvalu mutu kadi. Kikuma beni kilenda sundula mvandi mabanza makyedika ma kuvutula matondo.

^ Lut. 55 MAMBU MADI MU ZIFIKULA: Badi mu kutanga nkanda wu mwala Polo kafila kwidi kimvuka ki basi Loma; Akila, Priska, Fobe ayi bankaka bankwangalala kukuwa mazina mawu.

^ Lut. 57 MAMBU MADI MU ZIFIKULA : Ngudi mweka wunsadisa mwan’andi kuvutula matondo mu kifwani kimboti khomba mweka yinkyeto weka kiboba kammonisanga.