Skip to content

Skip to table of contents

Zimbangi zi Yave

Select language Ibinda

 DILONGI 9

Luzolo ayi Busonga mu Thangu Basi Isaeli

Luzolo ayi Busonga mu Thangu Basi Isaeli

“Yave wunzolanga bululama ayi busonga. Ntoto widi wuwala luzolo luandi lungolo.”MINKUNGA 33:5.

NKUNGA 3 Mangolo Mitu, Kivuvu Kitu, Lufyatu Lwitu

MAMBU TWANLONGUKA *

1-2. (a) Mbi befu boso tuntomba? (b) Lufyatu mbi tulenda ba?

BEFU boso tuntomba batuzolanga. Ayi tuntomba ba tuvangilanga mambu masonga. Ba kukhambu kutumonisa luzolo ayi busonga, ḿba tulenda mona ti twisi ko nkinza ayi tulendi ba ko kivuvu.

2 Yave zebi ti befu tunzolanga luzolo ayi busonga. (Minkunga 33:5) Tulenda ba lufyatu ti Nzamb’itu wutuzolanga beni ayi wuntomba batuvangila mambu masonga. Tulenda mona mawu buboti bo tunyindula Nsiku Yave kavana kwidi basi Isaeli mu nzila Mose. Boti ngye widi mu kyunda kibila bankaka bakuvangilanga ko mambu mamboti ayi masonga, tala bwidi Nsiku wu Mose * wummonisina phila Yave kamvwanga nkinza dikabu dyandi.

3. (a) Dedi bunsudikisila Loma 13:8-10, mbi tulenda bakula bo tunlonguka Nsiku wu Mose? (b) Byuvu mbi tunkwiza baka mimvutu mu dilongi adidi?

3 Bo tunlonguka Nsiku wu Mose, tumbakulanga mabanza ma Tat’itu yi luzolo Yave. (Tanga Loma 13:8-10.) Mu dilongi adidi, befu twala tubila to mwa minsiku bavana basi Isaeli ayi tuntambula mimvutu mi byuvu abibi: Kibila mbi tulenda tubila ti Nsiku wuvangulu mu luzolo? Kibila mbi tulenda tubila ti Nsiku wukindisa batu kuvanga mambu masonga? Bwidi batu baba biyeku baba kubakindisanga kulandakana Nsiku? Ayi banani Nsiku wuba luta kukyeba? Mimvutu mi byuvu abyobi, milenda tubomba beni, kutuvana kivuvu, ayi kutufikika kwidi Tat’itu yi luzolo.—Mavanga 17:27; Loma 15:4.

 NSIKU WU MOSE WUVANGULU MU LUZOLO

4. (a) Kibila mbi tulenda tubila ti Nsiku wu Mose wuvangulu mu luzolo? (b) Dedi buntubila Matai 22:36-40, zithumu mbi Yesu katubila?

4 Befu tulenda tuba ti Nsiku wu Mose wuvangulu mu luzolo bila luzolo lunnatanga Yave kuvanga mamoso kamvanganga. (1 Yoane 4:8) Yave wutwadisa minsiku myoso miba mu Nsiku wu Mose mu zithumu ziwadi zinkinza—kuzola Nzambi ayi kuzola wadi yaku. (Levitiku 19:18; Deutelonomi 6:5; tanga Matai 22:36-40.) Diawu tulenda vingila ti mu 600 di zithumu zidi mu Nsiku zimmonisa dyambu ditedi luzolo lu Yave. Ndoko tutala mwa bifwani.

5-6. Mbi Yave kantomba bakwela bavanga, ayi mbi Yave kazebi? Vana kifwani.

5 Kuba wukwikama mu nnuni’aku ayi kukyeba bana baku. Yave wuntomba bakwela bakindisa luzolo luawu mwingi lukadidila mvu ka mvu. (Ngenesi 2:24; Matai 19:3-6) Kubundana nyitu na mutu wukhambu kwelana yaku didi disumu dingolo beni woso mutu kalenda vola. Mu bibila bimboti, mu kumi di zithumu, lutumu sambwadi luba tubila matedi kubundana nyitu na mutu wukhambu kwelana yaku. (Deutelonomi 5:18) Didi disumu dingolo dinlevula nsiku wu Nzambi ayi wuntwadisa kyunda kwidi mutu wukwelana yaku. (Ngenesi 39:7-9) Nkazi voti nnuni wu mutu wuvengi kitsuza kalenda ba mu kyunda mu mimvu miwombo.

6 Yave zebi bwidi bakwela bankyebilanga mutu wunkaka wukwelana yandi. Nandi waba tomba mwingi babakala ba Isaeli bakyeba buboti bakyeto bawu. Nnuni waba zolanga Nsiku, waba zolanga nkazi’andi ayi kabasa vambananga ko yandi mu mambu makhambulu nkinza. (Deutelonomi 24:1-4; Matai 19:3, 8) Vayi boti dyambu dinkinza dimonikini ayi wumbaka makani ma kuvambana yandi, nandi kafweti kumvana nkanda wu luvambanu. Nkanda beni waba kyebanga nkyeto mu mambu ma kitsuza balenda kumvunina. Ayi ava nnuni kavana nkanda wu luvambanu kwidi nkazi’andi, nandi kafweti kwenda theti kwidi bakulutu ba divula. Mu phila ayoyi, bakulutu balenda baka lwaku lu kusadisa bakwela beni kuvukisa dikwela diawu. Bo dibakala mwisi Isaeli kamvambana na nkazi’andi mu bibila bikhambu fwana, Yave khumbu zinkaka kabasa vanganga ko ni dyambu. Vayi nandi wuba monanga phila bakazi baba tovukilanga.—Malaki 2:13-16.

(Tala lutangu 7-8) *

7-8. (a) Mbi Yave katuma matata bavanga? (Tala fikula yidi va busu bu levista.) (b) Malongi mbi tulenda longuka?

7 Nsiku wummonisa mvandi ti Yave wuntomba mwingi bana baba mayangi ayi babaka nsika. Yave waba tomba matata basadisa bana bawu kukonzuka ayi kuba sadisa kuba kikundi kimboti na Nzambi. Matata, sadilanu lwaku loso mwidi mwingi kusadisa bana binu kuvisa ayi kuvwa nkinza Nsiku wu Yave ayi kulonguka kuzola wawu. (Deutelonomi 6:6-9; 7:13) Kimweka mu bibila Yave kaba fundisilanga basi Isaeli yidi phila baba tovudilanga bana bawu. (Yelemia 7:31, 33) Matata bafweti tadila bana bawu, bika ti banga kyuma bafweti vangila mambu mambi, vayi banga kyuka, voti nkhayilu wu Yave bafweti vwa nkinza.—Minkunga 127:3.

8 Malongi: Yave wummonanga phila bakwela bayikyebilanga bawu na bawu. Nandi wuntomba matata bazola bana bawu, ayi nandi wala fundisa matata mu mambu bamvangilanga bana bawu.

9-11. Kibila mbi Yave kavanina nsiku wuba kwimina kuzinina bingana?

9 Kubika zinina bingana. Mu Kumi di Zithumu, lutumu lutsuka lunkwimina kuzinina bingana voti kuba mayindu mambi mu kyuma kivwidi mutu wunkaka. (Deutelonomi 5:21; Loma 7:7) Yave wuvana nsiku mweka  wutulonga dilongi dinkinza—dikabu dyandi bafweti kyeba ntim’awu, voti mabanza ayi mayindu mawu. Nandi zebi ti mavanga mambi, mantoninanga mu mayindu ayi mabanza mambi. (Zingana 4:23) Boti mwisi Isaeli wumbika zinzinunu zimbi kukonzuka mu ntim’andi, nandi kalenda vangila bankaka mambu mambi. Buawu Ntinu Davidi kavodila disumu. Nandi wuba mutu wumboti. Vayi kilumbu kimweka, nandi wuzinina nkazi wungana. Zinzinunu zyandi zinnata kuvola disumu. (Yakobi 1:14, 15) Davidi wubundana nyitu na nkyeto wungana, wubina vuna nnuni nkyeto beni, ayi bosi wumvonda.—2 Samueli 11:2-4; 12:7-11.

10 Yave wuba zabanga boti mwisi Isaeli belevula nsiku wu kubika zinina bingana—Nandi zebi mabanza ayi mayindu mitu. (1 Lusansu 28:9) Nsiku wu kubika zinina bingana wuba monisa kwidi batu ti bafweti bika ba mayindu malenda kubanata kuvola disumu beni. Bukyedika, Yave widi Tata yi luzolo ayi ndwenga!

11 Malongi: Yave wummonanga bika to kizizi ki mutu. Nandi wummonanga mambu madi mu ntim’itu. (1 Samueli 16:7) Vasi ko ni mayindu, mabanza, voti mambu tumvanga malenda ba maswama va mesu mandi. Nandi wummona ayi wutukindisa mwingi tuba batu bamboti. Vayi nandi tidi ti befu tubakula ayi tuyala mayindu mambi ava mawu matunata kuvanga mambu mambi.—2 Lusansu 16:9; Matai 5:27-30.

NSIKU WU MOSE WUTWADISA MAMBU MASONGA

12. Mambu mbi Nsiku wu Mose wunluta tubila beni?

12 Nsiku wu Mose wutulonga ti Yave wunzolanga busonga. (Minkunga 37:28; Yesaya 61:8) Nandi wumonisa kifwani kimboti mu matedi kuvangila bankaka mambu masonga. Bo basi Isaeli baba tumukinanga minsiku Yave kabavana, nandi waba ku basakumunanga. Bo baba bayisanga zithumu zyandi zisonga ayi zisulama, bawu baba tovukanga. Bwe tala minsiku myodi mu Kumi di Zithumu.

13-14. Mu Kumi di Zithumu, mbi thumu yitheti ayi yimwadi yiba tuba, ayi bwidi kutumukina ziawu kutwadisa lusakumunu kwidi basi Isaeli?

13 Bwongimina to Yave. Mu Kumi di Zithumu, zithumu ziwadi zitheti zyaba tuba ti basi Isaeli bafweti bwongimina to Yave ayi wuba lubula matedi kubwongimina bitumba. (Esodu 20:3-6) Bakana ko Yave waba bakanga ndandu mu zithumu beni. Vayi dikabu dyandi bawu baba bakanga ndandu. Bo dikabu dyandi diba dikwikama mu nandi, bawu baba bakanga ndandu yiwombo. Bo bawu baba bwongiminanga zinzambi zi mimvila minkaka, bawu baba tovukanga.

14 Yindul’abu basi Kanani. Bawu baba bwongimina zinzambi zikhambu moyo bika kwandi Nzambi yikyedika ayi yi luzolo. Bawu bayitwadisa ziphasi ziwombo. (Minkunga 115:4-8) Mu mbwongimi’awu, bawu baba vanganga mambu mawombo ma kitsuza ayi baba vikanga bana bawu mwingi kuba vana buka minkhayilu. Bobuawu mvandi, bo basi Isaeli baba bayisanga Yave ayi kusola kubwongimina bitumba, bawu baba kuyitwadisanga ziphasi kubunda mvandi makanda mawu. (2 Lusansu 28:1-4) Batu baba biyeku babika kubwe landakana zithwadusulu zisonga zi Yave. Bawu baba sadilanga bubi biyeku biawu ayi baba tovulanga minsukami. (Yehezekeli 34:1-4) Yave wulubula basi Isaeli ti nandi wumfundisa batu bantovulanga bakyeto ayi bana basukama. (Deutelonomi 10:17, 18; 27:19) Yave wuba sakumunanga dikabu dyandi bo bawu baba tatamananga bakwikama mu nandi ayi baba vangilanga bankaka mambu masonga.—1 Mintinu 10:4-9.

Yave wutuzolanga ayi wuzebi bo twidi mu kutovuka mu mambu makhambulu masonga (Tala lutangu 15)

15. Malongi mbi tulenga longuka matedi Yave?

15 Malongi: Yave kasi ko fotu bo batu bantubanga  ti bakunsadilanga banlevula zithumu zyandi ayi bantwadisa ziphasi dikabu dyandi. Yave wutuzolanga ayi wuzebi bo tumvyokila mu mambu makhambulu masonga. Nandi wumbanga mu kyunda, kuvyoka bo ngudi kambelanga boti mwan’andi fitsombi fidi mu kutovuka. (Yesaya 49:15) Kheti kasi fika vanga ko ni dyambu, mu thangu yifwana nandi wala fundisa batu bambi mu mambu mambi bamvangilanga bankaka.

BWIDI NSIKU WUTWADUSULU?

16-18. Mu mambu mbi ma luzingu baba sadilanga Nsiku wu Mose, ayi mbi tulenda longuka mu mawu?

16 Nsiku wu Mose wuba sadulwanga mu mambu mawombo mu luzingu lu basi Isaeli, diawu diba dyambu dinkinza kwidi batu baba biyeku mu dikabu kufundisa dikabu di Yave mu busonga. Bawu baba kiyeku bika to ki kukyeba mambu matedi mbwongimini yi Yave, vayi na mambu mankaka. Tala bifwani abibi.

17 Boti mwisi Isaeli wumvonda mutu wumweka, balendi fika kumvonda ko. Bakulutu ba divula bafweti fyongunina mambu mamonikini ava kuzaba ti mutu beni bafweti kunzengila nkanu wu lufwa. (Deutelonomi 19:2-7, 11-13) Bakulutu baba fyonguninanga mvandi mambu mawombo ma luzingu lu mutu beni—mwingi kuzaba bu kuzonzila mambu. (Esodu 21:35; Deutelonomi 22:13-19) Bo bakulutu baba vanganga mambu masonga ayi basi Isaeli baba tumamananga Nsiku, baboso baba bakanga ndandu, ayi dikabu dyoso dyaba zitisanga Yave.—Levitiku 20:7, 8; Yesaya 48:17, 18.

18 Malongi: Mambu moso matedi luzingu lwitu nkinza madi kwidi Yave. Nandi wuntomba befu tuba basonga ayi tuzola beni batu bankaka. Ayi nandi wummonanga mambu tuntuba ayi tumvanganga, kheti kukhati nzo’itu, bo twidi befu veka.—Ebeleo 4:13.

19-21. (a) Bwidi bakulutu ayi mimfundisi baba kyebilanga dikabu di Nzambi? (b) Bwidi Nsiku wu Mose wuba kyebilanga batu, ayi malongi mbi tulenda longuka?

19 Yave wuba tomba kuvukisa dikabu dyambu mwingi babika vukumuka kwidi mimvila minkaka. Diawu kaba tombila bakulutu ayi mimfundisi balandakana buboti Nsiku. Vayi batu baba fundisanga dikabu basa ba ko nswa wu kutovula dikabu di Yave, vayi bafweti ba batu banzolanga busonga.—Deutelonomi 1:13-17; 16:18-20.

20 Yave wuba monanga kyadi dikabu dyandi, diawu kavanina minsiku mwingi batu babika vangilanga bankaka mambu makhambulu masonga. Dedi, Nsiku wuba tuba ti disa ba ko dyambu dimboti kuvunina mutu mambu mambi. Mutu wu bamvunina mambu kafweti zaba nani waba kumvunina mambu. (Deutelonomi 19:16-19; 25:1) Ava bamvana fotu mu mambu kavengi, va fweti ba kheti zimbangi ziwadi mwingi kumonisa bivisa ti nandi bevanga mawu. (Deutelonomi 17:6; 19:15) Mbi tulenda tuba mu matedi mwisi Isaeli bevanga  dyambu dimbi, vayi mutu mweka to be kummona? Nandi kalendi yindula ko ti basi kunfundisa ko. Yave bemona mambu kavengi. Va dikanda, matata batambula kiyeku ki kuba mfumu wu dikanda, vayi kimfumu kiawu kiba na ndilu. Mu mambu mankaka ma dikanda, bakulutu ba divula baba kiyeku ki kubaka makani ma tsuka.—Deutelonomi 21:18-21.

21 Malongi: Yave widi kifwani kimboti, bila nandi kavanganga ko mambu makhambulu masonga. (Minkunga 9:7) Nandi wunsakumunanga batu bantatamananga bakwikama mu kutumukina zithwadusulu zyandi, vayi wunsembanga batu bansadilanga bubi biyeku biawu. (2 Samueli 22:21-23; Yehezekeli 9:9, 10) Bankaka balenda vanga mambu mambi ayi kumonikina ti basimbaka ko tsembolo, vayi bo thangu Yave katsikika yala fwana, nandi wala fundisa batu beni. (Zingana 28:13) Ayi bakhambu nyonga mambi bamvanganga, bawu bela longuka ti “didi diambu di tsisi mu kubua mu mioko mi Nzambi yi moyo.”—Ebeleo 10:30, 31.

BANANI NSIKU WUBA LUTA KUKYEBA?

Mu thangu yi kuzonza mambu, vaba tombulu bakulutu kulandakana kifwani ki Yave ki kumonisa luzolo ayi busonga kwidi batu (Tala lutangu 22) *

22-24. (a) Phila batu mbi Nsiku wuba luta kukyeba, ayi mbi tulenda longuka mu matedi Yave? (b) Ndubu mbi yidi mu Esodu 22:22-24?

22 Nsiku wuba luta kyeba batu bakhambu baka bu kuyikyebila, buka, bana bakhambu matata, bakyeto bafwilu banuni ayi zinzenza. Yave wukamba mimfundisi mi basi Isaeli: ‘Ngye wulendi vingisa ko lufundusu lu nzenza, ni lu mwana wukhambu matata, ayi wulendi bonga ko mvwatu wu nkyeto wufwilu nnuni  banga thalu yi kipholo.’ (Deutelonomi 24:17) Yave wuba lutanga kumona kyadi batu bakhambu baka bu kuyikyebila va divula. Ayi nandi wala fundisa batu ba kubavangilanga mambu mambi.—Tanga Esodu 22:22-24.

23 Nsiku wuba kyebanga mvandi basi dikanda mu matedi mambu ma kitsuza, mu kukwimina ziphila zyoso zi kubundana nyitu na mwisi dikanda. (Levitiku 18:6-30) Vayi batu ba mimvila minkaka diswasana baba, bila kwidi bawu, disa ba ko dyambu dimbi kuvanga mawu, vayi dikabu di Yave baba mwena dyambu adyodi mu phila Yave kantadilanga—banga dyambu kammonanga khenene.

24 Malongi: Yave wuntomba batu boso kavana biyeku baba luzolo lungolo mu batu boso badi mu lukyebu luawu. Nandi kazolanga ko mambu ma kitsuza ayi wuntomba batu boso babaka lukyebo ayi ba bavangila mambu masonga, vayi kuluta vangila mawu kwidi bo bakhambu bu kuyikyebila.

NSIKU, “[KITSUISU] KI MAMBU MAMBOTI MOMO MANKWIZA.”

25-26. (a) Kibila mbi tulenda tubila ti luzolo ayi busonga bidi buka mvumuku ayi moyo? (b) Mbi twala tubila mu dilongi dinkwiza mu kikhuku akiki ki malongi?

25 Luzolo ayi busonga lwidi buka mvumuku ayi moyo. Va ntoto, tulendi baka ko yimweka boti yinkaka yisi ko. Bo twidi lufyatu ti Yave wutuvangilanga mambu masonga, luzolo lwitu mu nandi lumbwela konzuka. Ayi bo tunzola Nzambi ayi zithwadusulu zyandi zisonga, tunluta tomba kuzola bankaka ayi kuba vangila mambu masonga.

26 Nsiku wu Mose wusadisa basi Isaeli kuba kikundi kimboti na Yave. Vayi dikabu di Nzambi basa bwe tumukina ko Nsiku wu Mose bo Yesu kadukisa wawu, ayi wuvingisa wawu na kyuma kinkaka kilutidi. (Loma 10:4) Mvwala Polo wutubila Nsiku banga “[kitsuisu] ki mambu mamboti momo mankwiza.” (Ebeleo 10:1) Mu dilongi dinkwiza mu kikhuku akiki kyala tubila mwa mambu beni mamboti ayi nkinza wu kumonisa luzolo ayi busonga mu kimvuka ki Baklisto.

NKUNGA 109 Tuzolasananga mu Ntima Woso

^ Lut. 5 Dilongi adidi, didi ditheti mu kikhuku ki malongi manna twala tubila. Mawu ma tumonisa kibila mbi tulenda bela lufyatu ti Yave wu tukyebanga. Malongi matatu mankaka mala kwiza mu Kibanga ki Nsungi ki Ngonda Yintanu, mvu 2019. Mintu mi malongi mintuba: “Luzolo ayi Busonga mu Kimvuka ki Baklisto,” “Luzolo ayi Busonga mu Thangu Ziphasi,” ayi “Kuvana Mbombolo Kwidi bo Badi mu Ziphasi.”

^ Lut. 2 TSUDUKUSU YI BIKUMA: Kuvyoka 600 di minsiku Yave kavana basi Isaeli mu nzila Mose bantedilanga miawu banga “Nsiku,” “Nsiku wu Mose,” “Nsiku Yave kavana kwidi Mose,” ayi “zithumu.” Diawu zibuku zitheti zi Kibibila tona mu Ngenesi nate Deutelonomi bazitedilanga Nsiku. Khumbu zinkaka kikuma akyoki ba kisadilanga mwingi kutubila Masonoko moso ma Kiebeleo.

^ Lut. 60 FOTO YIDI VA THONONU: Yave waba tomba bana babaka nsika bo bankonzuka ayi bo ba kubalonga kwidi matata mawu (Tala dilongi 9, bitini bi matangu 7-8)

MAMBU MADI MU ZIFIKULA: Ngudi mweka mwisi Isaeli wunkwangalala mu kukoluka na bana bandi ba bakyeto mu thangu kankubika bidya. Ayi kumbusa, tata wunlonga mwan’andi bu kukyebila mamemi.

^ Lut. 64 MAMBU MADI MU ZIFIKULA: Bakulutu va mwelo divula, mu luzolo badi mu kusadisa mfwisi wumweka ayi mwan’andi bavangila mambu mambi kwidi nsumbisi mweka wu divula.