Skip to content

Skip to table of contents

 DILONGI 7

Befu Tunzolanga Beni Yave Tat’itu yi Luzolo

Befu Tunzolanga Beni Yave Tat’itu yi Luzolo

‘Befu tunzolanga bila nandi wutuama kutuzola.’1 YOANE 4:19.

NKUNGA 3 Mangolo Mitu, Kivuvu Kitu, Lufiatu Luitu

MAMBU TUANLONGUKA *

YAVE wutu tumisa muingi tuba mu khati dikanda diandi. Bukiedika ayoyi yidi thumusunu yimboti! Batu badi mu dikanda beni, bakivana kuidi Nzambi ayi badi kiminu mu nkhayilu yi khudulu yi Yesu. Dikanda ditu didi beni mayangi, kibila tuidi luzingu lumboti bubu, ayi kivuvu ki kuzinga mvu ka mvu.

1-2. Kibila mbi ayi buidi Yave kazibudila nzila muingi tuba mu khati dikanda diandi?

2 Muingi kumonisa luzolo kadi mu befu, Yave wuvana muan’andi muingi kafua mu kibila kitu, mawu mazibula nzila muingi tuba mu khati dikanda diandi. (Yoane 3:16) Diawu Kibibila kintubila ti befu tusumbu mu ‘thalu yiwombo.’ (1 Kolinto 6:20) Mu nzila khudulu beni, Yave wutuvana luaku lu kuba kikundi kifikama ayi nandi. Luaku lunneni tuidi kutedila Mutu wulutidi zangama mu nza yimvimba Tat’itu. Ayi dedi bo tulongukidi mu dilongi dibedi, Yave widi Tata yilutidi.

3. Biuvu mbi tulenda kuyikuvusa? (Tala mvandi dibaya “Bukiedika ti Yave wuku phuanga nkinza?”)

3 Dedi nsoniki wumueka wu Kibibila, befu mvitu tulenda kuyikuvusa: “[Buidi yilenda] futila Yave mu mamboti mandi moso kuidi minu?” (Minkunga 116:12) Bukiedika, tuisi ko bu kuvutudila Yave mamboti moso katu vangilanga. Vayi luzolo kadi mu befu, lutu vanganga kunzola. Mvuala Yoane wusonika: ‘Befu tunzolanga bila nandi wutuama kutuzola.’ (1 Yoane 4:19) Mu ziphila mbi tulenda monisina kuidi Tat’itu yi diyilu ti befu tukunzolanga?

TATAMANA WUFIKAMA KUIDI YAVE

Tummonisanga ti tunzolanga Yave, bo tumfikama kuidi nandi mu nsambu, bo tukuntumukina ayi bo tunsadisa bankaka muingi banzola (Tala bitini bi matangu 4-14)

4. Dedi bo bummonisina Yakobi 4:8, kibila mbi tufueti vangila mangolo ma kufikama Yave?

4 Yave wuntomba befu tumfikama ayi tuyolukanga yandi.  (Tanga Yakobi 4:8.) Nandi wutu kindisa: “Lutatamana sambila.” Kheti Yave widi mambu mawombo kafueti vanga, nandi widi wukubama thangu zioso muingi kutu kuwa. (Loma 12:12) Diawu befu mvitu tufueti tanganga Kibibila, bilongulu ayi kuteka matu mu zikhutukunu, kibila kuvanga mawu mala tusadisa kukuwa ayi kuzaba buboti Yave. Dedi bo kinkundi ki muana ayi tata kinluta banga kingolo ba kuba kifu ki kukolukanga, bobuawu mvandi, befu kukolukanga na Yave tuala luta kumfikama.

Tala lutangu  5

5. Mbi wufueti vanga muingi Yave kakikinina minsambu miaku?

5 Yindula buidi Yave kantadilanga minsambu miaku. Tebuka moyo ti Yave wuntomba ngie wuzibula ntim’aku kuidi nandi mu nsambu. (Minkunga 62:8) Diawu tufueti kuyikuvusa: ‘Minsambu miama, mimmonikinanga buka mambu mabongulu mu mua buku voti madi mabanza mami ma tsi ntima?’ Befu tuzebi ti ngie wunzolanga beni Yave, ayi wutidi kukindisa kinkundi kiaku ayi nandi. Muingi mawu masalama wufueti kolukanga yandi kadika kilumbu. Zabikisa Yave mabanza maku ma tsi ntima. Dedi mambu ma kutuadisa mayangi ayi ma kutula kiunda. Ba lufiatu ti nandi kalenda kusadisa.

6. Mbi tufueti vanga muingi tutatamana bafikama kuidi Tat’itu yi Diyilu?

6 Muingi tutatamana bafikama kuidi Tat’itu yi diyilu, tufueti ba kifu ki kuntondanga. Befu tunkikinina mambu nsoniki wu minkunga katuba: “A Yave, Nzambi’ama, ngeyo wuvanga biuma [biwombo bi kukuitukila]; ayi [mabanza maku madi mu befu]. Kuisi ko mutu wulenda [dedakana na ngiewu]. Enati thidi ku mayolukila ayi ku matubila; mawu mawokidi ngolo muingi [yima samuna]!” (Minkunga 40:5) Befu tutubanga ko to ti tuntondanga Yave, vayi tummonisanga mawu mu thubulu ayi mu mavanga mitu. Mawu mammonisa disuasana tuidi na batu bankaka mu thangu ayiyi. Befu tunzingilanga mu nza yiwedi batu bakhambu vutulanga matondo mu mamoso Nzambi kaba vangilanga. Mawu mammonisa ti tuidi mu kuzingila mu “bilumbu bitsuka.” (2 Timoteo 3:1, 2) Befu tuisintomba ko kuba kifu akioki!

7. Mbi Yave kantomba befu tuvanga, ayi kibila mbi?

7 Matata basintomba ko bana bawu baba kithatu bawu yi bawu, vayi baba bakundi. Bobuawu mvandi, Yave wuntomba bana bandi boso baba bakundi. Kibila luzolo tuidi mu zikhomba zitu, lummonisa ti tuidi Baklisto bakiedika. (Yoane 13:35) Befu tunkikinina mambu nsoniki wu minkunga katuba: ‘Lutala, phila yimboti ayi kitoko kuidi zikhomba mu thangu banzingila va kimueka mu kithuadi.’ (Minkunga 133:1) Bo tunzola zikhomba zitu zi babakala ayi zi bakieto, befu tummonisanga Yave ti tukunzolanga. (1 Yoane 4:20) Mayangi beni kuba mu khati dikanda ‘bamvangasananga mamboti ayi bammonisanga kiadi kuidi badi yawu.’—Efeso 4:32.

MONISA LUZOLO MU KUTUMAMANA

Tala lutangu 8

8. Dedi bummonisina 1 Yoane 5:3, kibila mbi kitheti kitu vanga kutumukina Yave?

8 Yave wuntomba bana batumukina matata mawu, ayi tidi mvandi befu tuntumukina. (Efeso 6:1) Befu tufueti kuntumukina kibila nandi Mvang’itu, Tho yi luzingu luitu ayi Tata yilutidi nduenga mu babaso. Kiuma kitheti kitu vanga kutumukina Yave, kidi luzolo tuidi mu nandi. (Tanga 1 Yoane 5:3.) Kheti tuidi bibila biwombo muingi kutumukina Yave, nandi katu kuikanga ko kuvanga mawu. Yave wutu vana luaku lu kusola, diawu kankuangalalanga bo tunsola kuntumukina mu kibila ki luzolo tuidi kuidi nandi.

9-10. Nkinza mbi widi kuzaba zithuadusulu zi Yave ayi kutumukina ziawu?

 9 Matata bantomba bana bawu baba nsika. Diawu bantsikikilanga zithuadusulu muingi kuba kieba. Bo bana bantumukina zithuadusulu aziozi, bawu bammonisanga ti bamfiatilanga ayi bankinzikanga matata mawu. Diawu, nkinza beni befu mvitu kuzaba ayi kutumukina zithuadusulu zi Tat’itu yi diyilu. Bo tumvanga mawu, befu tumbakanga ndandu ayi yidi phila tummonisina kuidi Yave ti tukunzolanga ayi tukunkinzikanga. (Yesaya 48:17, 18) Vayi batu bammanganga kulandakana zithuadusulu zi Yave, bantovukanga.—Ngalatia 6:7, 8.

10 Bo tunzingila mu phila yinkuangidika Yave, befu tumbakanga lukiebo mu mambu malenda bivisa kilunzi kitu ayi kikundi kitu na Yave. Yave zebi bilutidi mu befu. Khomb’itu bantedilanga Aurora, wunzingilanga ku E.U.A wutuba: “Minu yizebi ti bo yintumukina Yave, luzingu luama lunluta banga lumboti.” Befu boso tuzebi ti mawu madi makiedika. Yindul’abu ndandu wubaka mu kutumukina zithuadusulu zi luzolo Yave katuvana.

11. Buidi nsambu wutu sadisilanga?

11 Kusambila ku tusadisanga kutumumamana, kheti khumbu zinkaka tommona phasi kuvanga mawu. Befu boso bo tuidi batu ba masumu, diawu khumbu zinkaka tummuenanga phasi kutumukina Yave. Vayi kheti bobo tufueti vanga mangolo muingi tubika nyongisa ntim’andi. Ntinu Davidi wudinda kuidi Nzambi: “Bika wuphana Pheve yi luzolo lumboti muingi  [yikutumukina].” (Minkunga 51:12) Denise, widi ntuami ntuala, wutuba: “Khumbu zinkaka, bo yimmonanga phasi kutumukina thuadusulu yimueka yi Yave, minu yinsambilanga muingi kaphana mangolo ma kuvanga mambu masulama.” Diawu, tulenda ba lufiatu ti Yave wuntambulanga minsambu mi phila ayoyi.—Luka 11:9-13.

SADISA BANKAKA MUINGI BAZOLA TAT’ITU

12. Dedi buntubila Efeso 5:1, mbi tufueti vanga?

12 Tanga Efeso 5:1. Befu tuidi ‘bana ba luzolo’ ba Yave, diawu tumvanganga mamoso muingi kulandakana kifuani kiandi. Befu tunlandakananga zikhadulu ziandi mu kumonisa luzolo, mamboti ayi kulemvukilanga bankaka. Bo batu bakhambu sadilanga Yave bammona zikhadulu zitu zimboti, bawu balenda tomba kulonguka matedi nandi. (1 Petelo 2:12) Matata mansadilanga Yave, bafueti kieba bana bawu dedi bo Yave ka tukiebilanga. Bo bamvanga mawu, bana bawu bala tomba mvawu kuba kikundi na Tat’itu yi luzolo.

Tala lutangu 13

13. Kibila mbi tufueti monisina kibakala?

13 Muana wunzolanga beni kunyemisa tat’andi ayi wunkuangalalanga beni kutubila matedi nandi. Bobuawu mvandi, befu tunyemisanga Tat’itu yi diyilu Yave ayi tutidi kuzabikisa bankaka matedi nandi. Mu mintima mitu, befu tuidi mabanza dedi mo Ntinu Davidi kasonika: “Muel’ama wela kiniemisa mu Yave.” (Minkunga 34:2) Ḿba tulenda ba zitsoni kutubila matedi Yave. Vayi kibila mbi tufueti monisina kibakala? Kibila Yave wunkuangalalanga beni  bo tunkoluka matedi nandi na batu bankaka, kibila buawu bawu mvawu bambakila luaku lu kulonguka matedi Yave. Tuidi lufiatu ti Yave wala tuvana kibakala tuntomba. Ayi dedi bo nandi kasadisila baklisto mu sekulu yitheti, nandi wala tusadisa.—1 Tesalonika 2:2.

14. Kibila mbi kinkiza tuidi muingi kusamuna zitsangu zimboti?

14 Yave kasi ko luvasu, ayi nandi wunkuangalalanga bo tummonisanga luzolo kuidi bankaka, mu khambu tadila tsi babutukila. (Mavanga 10:34, 35) Phila yilutidi tulenda monisina luzolo kuidi bankaka, yidi kuba zabikisa zitsangu zimboti. (Matai 28:19, 20) Ndandu mbi batu balenda baka mu zitsangu aziozi? Batu ba tukuwa balenda baka luzingu lumboti bubu ayi luzingu lu mvu ka mvu mu bilumbu binkuiza kuntuala.—1 Timoteo 4:16.

KUZOLA TAT’ITU KUNTUADISANGA MAYANGI

15-16. Bibila mbi tuidi muingi kuba mu mayangi?

15 Yave widi Tata yi luzolo ayi nandi tidi dikanda diandi dizingila mu mayangi. (Yesaya 65:14) Kheti tumviokilanga mu ziphasi, tuidi bibila biwombo muingi kukuangalala bubu. Buka, tuidi lufiatu ti Tat’itu yi diyilu wutu zolanga beni ayi tuidi nzayilu yi Diambu Diandi, Kibibila. (Yelemia 15:16) Befu tuidi mu khati dikabu didi batu banzolanga Yave, banzolanga zithumu ziandi ayi ba kizolanga bawu na bawu.—Minkunga 106:4, 5.

16 Tulenda tatamana kuba mu mayangi kibila tuidi kivuvu ti luzingu luala luta ba lumboti mu bilumbu binkuiza. Tuzebi ti thangu yiluelu yisiedi muingi Yave kabunga bankua mambi ayi mu nzila Kintinu kiandi wala balula ntoto Paladizu. Tuidi kivuvu ti bafua bala vulubuka ayi bala zinga yitu va kimueka. (Yoane 5:28, 29) Bukiedika, yala ba thangu yi mayangi! Ayi bilutidi nkinza, befu tuidi lufiatu ti thangu yiluelu yisiedi muingi batu boso ku diyilu ayi va ntoto bavana Tat’itu yi diyilu lulendu, nkembo ayi nzitusu kafueni mu tambula.

NKUNGA 12 Yave, Nzambi Yilutidi Zangama

^ Lut. 5 Befu tuzebi ti Tat’itu Yave wutu zolanga beni, ayi wutu tumisa muingi tuba mu khati dikanda diandi. Mambu amomo, matu vanganga befu mvitu kunzola. Buidi tulenda monisina luzolo kuidi Tat’itu? Dilongi adidi, dinkuiza monisa mambu tulenda vanga.