Skip to content

Skip to table of contents

 DILONGI 42

Yave Wala Kuvana Mangolo Muingi Wuvanga Luzolo Luandi

Yave Wala Kuvana Mangolo Muingi Wuvanga Luzolo Luandi

Nzambi, widi mu kuvanga luzolo luandi mu beno, ayi wu muvananga phuila ayi mangolo ma kuvanga mambu.’FILIPI 2:13.

NKUNGA 104 Phevi Yinlongo Nkhayilu wu Nzamdi

MAMBU TUANLONGUKA *

1. Mbi Yave kalenda vanga muingi kudukisa lukanu luandi?

YAVE kalenda kituka kioso kiuma muingi kudukisa lukanu luandi. Khumbu ziwombo Yave wukituka Nlongisi, Mbombi ayi Nsamuni. Abiobi, bidi to mua bifuani bimmonisa phila mutu Yave kayiza kituka. (Yesaya 48:17; 2 Kolinto 7:6; Ngalatia 3:8) Vayi nandi mvandi wunsadilanga batu muingi kudukisa zikhanu ziandi. (Matai 24:14; 28:19, 20; 2 Kolinto 1:3, 4) Ayi Yave kalenda vana kuidi bisadi biandi nduenga ayi mangolo bantomba mo bakituka kiosokua kiuma muingi bavanga luzolo luandi. Ayi mamoso amomo Yave kamvanganga madi kithuadi na tsundu yi dizina diandi, dedi butubila batu bankaka ba luzabu.

2. (a) Kibila mbi khumbu zinkaka tulenda bela divuda boti tsadulu tuidi va meso ma Yave? (b) Mbi tunkuiza longuka mu dilongi adidi?

2 Befu boso tutidi kuba tsadulu va meso ma Yave. Vayi ḿba bankaka balenda ba divuda boti badi tsadulu va meso mandi. Kibila mbi? Ḿba mu kibila ki phunga beka, mu mambu bammonikina mu luzingu ove mu mambu bazebi kuvanga. Voti vadi mvandi bankaka badi beni mayangi mu mambu bamvanganga ayi bamonanga ko tsatu yi kubuela konzuka mu kiphevi. Mu dilongi adidi, tuemmona buidi Yave kankubikilanga kadika mutu mu befu muingi kuvanga luzolo luandi. Bosi, tunkuiza fiongunina binongu bi Kibibila bimmonisa buidi Yave kavanina bisadi biandi—babakala ayi bakieto—phuila ayi mangolo ma kuvanga mambu. Bosi kutsuka, tunkuiza mona buidi tulenda bikila Yave ka tutuadisa.

 BUIDI YAVE KATU KUBIKILANGA

3. Dedi buntubila Filipi 2:13, buidi Yave kalenda tuvanina phuila yi kuvanga mambu?

3 Tanga Filipi 2:13. * Yave kalenda tuvana phuila yi kuvanga mambu. Buidi kalenda vangila mawu? Ḿba tuma bakula ti vadi mutu mu kimvuka wuntomba lusalusu voti diambu dinkaka difueti vangama. Voti bakulutu ba kimvuka bama tanga nkanda wufumini ku Beteli matedi tsatu yidi ku kibuangu kinkaka. Ḿba tulenda yindula, ‘mbi yifueti vanga muingi kusadisa?’ Voti tulenda tambula kiyeku kiphasi, ayi kuyindula boti tunkuiza nunga kuvanga kiawu. Voti, bo tummana kutanga matangu ma Kibibila, ḿba tulenda kuyikuvusa: ‘Buidi yilenda sadila mambu yibe longuka muingi kusadisa bankaka?’ Yave kalendi ko kutu kuika kuvanga kiosokua kiuma. Vayi bo kammona ti tutidi kusadisa bankaka, nandi kalenda tuvana phuila yi kukuenda kuntuala ayi kuvanga dioso diambu.

4. Buidi Yave kalenda tuvanina mangolo ma kuvanga mambu?

4 Yave mvandi kalenda tuvana mangolo ma kuvanga mambu. (Yesaya 40:29) Nandi kalenda sadila phevi’andi yinlongo muingi tubuela pisuka mu mambu tuzebi kuvanga. (Esodu 35:30-35) Mu nzila kimvuka kiandi, Yave kalenda kutu longisa buidi bu kuvangila bisalu. Boti wusa zaba ko buidi bu kuvangila kiyeku widi, dinda lusalusu. Diawu bika mona boma bu kudinda lusalusu kuidi Yave muingi kakuvana “lulendo lolo lulutidi ngolo.” Nandi nkua kukaba ayi wala kusadisa. (2 Kolinto 4:7; Luka 11:13) Mu Kibibila muidi bifuani biwombo bimmonisa buidi Yave kakubikila babakala ayi bakieto, ayi buidi kaba vanina phuila ayi mangolo ma kuvanga mambu. Bo tunkuiza tubila binongu abiobi, yedika kuyindula buidi Yave kalenda kusadila muingi wuvanga momawu mambu bisadi abiobi bikuikama bavanga.

MBI YAVE KAVANGA BABAKALA BANKAKA KUBA

5. Mbi tube longuka mu phila Yave katuadisila Mose?

5 Yave wuvanga Mose kuba mvukisi wu basi Isaeli. Vayi thangu mbi Yave kasadila Mose? Bukiedika ti wunsadila mu thangu Mose kaba muena ti wuba wukubama, bo kamanisa ‘ndongukulu yoso yi luzabu yi basi Ngipiti’? (Mavanga 7:22-25) Ndamba. Yave theti wubalula kimutu ki Mose ayi wunsadisa kuba mutu wu kikululanga ayi wuvumbama. (Mavanga 7:30, 34-36) Mose wulonguka kufiatila mu mangolo ma Yave kubika kuandi mu mandi. Mu kibila ki kibakala Yave kavana Mose, nandi wununga kuba va ntuala Falawo ayi kukoluka yandi. (Esodu 9:13-19) Mbi tube longuka mu phila Yave katuadisila Mose? Yave wunsadilanga batu badi zikhadulu zimboti ayi bamfiatilanga mu mangolo mandi.—Filipi 4:13.

6. Mbi tulenda longukila mu phila Yave katuadisila Balizilai muingi kasadisa Ntinu Davidi?

6 Zisekulu ziwombo kuntuala, Yave wutuadisa Balizilai muingi kakieba zitsatu zi ntinu Davidi. Mu thangu yinani, Davidi waba tina muan’andi Abisaloni. Davidi ayi dikabu diba yandi baba mona ‘nzala, phuila yi nlangu ayi baba bavonga’. Balizilai ayi babakala bankaka batula luzingu luawu va kingela muingi kubaka biuma Davidi ayi dikabu baba tomba. Kheti Balizilai wuba kiboba, nandi kasa yindula ko ti kasi ko tsadulu va meso ma Yave. Vayi, nandi wuba koko kuyalubuka ayi wusadila biuma kaba muingi kusadisa kudukisa zitsatu zi bankaka. (2 Samueli 17:27-29) Mbi tulenda longuka? Yosokua phunga tulenda ba, Yave kalenda tutuadisa muingi tusadisa zikhomba badi  mu tsatu, kheti va kibuangu kitu voti mu zitsi zinkaka. (Zingana 3:27, 28; 19:17) Khumbu zinkaka tuisi ko luaku lu kuba vadi zikhomba muingi kuba sadisa, vayi tulenda vana minkhayilu mu bisalu bimvangama mu nza yimvimba. Mu phila ayoyi, kimvuka ki Yave kinkuiza sadila minkhayilu beni muingi kusadisa zikhomba mu nza yimvimba ba kumonikina ziphasi.—2 Kolinto 8:14, 15; 9:11.

7. Buidi Yave katuadisila Simewoni ayi buidi kifuani kiandi kilenda tukindisila?

7 Simewoni wuba kiboba kikuikama waba kalanga ku Yelusalemi. Yave wunkanikisa ti ava kafua, nandi wala mona Mesiya. Lukanu alolo lukindisa Simewoni. Mimvu miwombo kumbusa nandi waba tedimina ndizulu yi Mesiya. Yave wusakumuna Simewoni mu kiminu ayi lukuikumunu luandi. Kilumbu kimueka mu thuadusulu yi phevi yilongo, Simewoni wuyenda ku tempelo. Kuawu kamuena Yesu mu butsombi buandi. Vawu Yave kayiza tuadisa Simewoni muingi kubikula matedi muana wuneni wunkuiza ba Klisto. (Luka 2:25-35) Simewoni ḿba wufua ava Yesu kutona kisalu kiandi ki kusamuna. Vayi nandi wuyangalala beni mu luaku kaba. Vayi bo kala vulubuka, Simewoni wala mona buidi luyalu lu Yesu luala tuadila lusakumunu kuidi makanda moso va ntoto. (Ngenesi 22:18) Befu mvitu tufueti vutulanga matondo mu kiosokua kiyeku Yave katu vana mu kisalu kiandi.

8. Buidi Yave kalenda kutu tuadisila dedi bo katuadisila Balinabasi?

8 Mu sekulu yitheti, dibakala dimueka bantedilanga Zozefi wuba wukubama muingi Yave kantuadisa. (Mavanga 4:36, 37) Ḿba nandi wuba zolanga kubomba bankaka, diawu mimvuala minkaka bamvanina dizina di Balinabasi, dinsundula “muana mbombolo”. Buka, bo Sawuli kayiza ba nlandikini wu Klisto, zikhomba ziwombo baba kummonanga boma. Kibila nandi wuba wuzabakana mu kuthota bimvuka bi Baklisto. Mu luzolo Balinabasi wusadisa Sawuli, ayi nandi wuvutula beni matondo mu mawu. (Mavanga 9:21, 26-28) Khumbu yimueka, zikhomba ku Antiokia yi Sili baba tomba mbombolo. Diawu bakulutu ba kimvuka ku Yelusalemi babaka makani ma kufila mutu muingi kuebatala. Zebi nani bafila? Balinabasi! Bukiedika, bawu basola buboti. Kibibila kintuba ti Balinabasi “[wutona kukindisa] batu boso muingi baba bakuikama mu Mfumu.” (Mavanga 11:22-24) Bubu, Yave kalenda tukitula ‘bana ba mbombolo’ muingi kubomba zikhomba. Dedi, nandi kalenda kusadila muingi kubomba batu babe fuilu mutu banzolanga. Voti, boti mutu widi mu kubela voti widi mu kiunda, Yave kalenda ku kutuadisa muingi wenda kuetala voti kufila nsinga mayo. Ngie wumbikanga Yave ka kutuadisa dedi bo katuadisila Balinabasi?—1 Tesalonika 5:14.

9. Mbi tube longuka mu phila Yave kakubikila Vasily muingi kuba nkulutu wumboti wu kimvuka?

9 Yave wukubika khomba mueka bantedilanga Vasily muingi kaba nkulutu wumboti wu kimvuka. Vasily wuba 26 di mimvu bo kayiza ba nkulutu wu kimvuka. Nandi kabasa yindula ko ti wuba wukubama muingi kusadisa kimvuka, kuluta zikhomba bo baba viokila mu ziphasi. Nandi wutambula khubumunu kuidi bakulutu bankaka ba kimvuka ayi wukota Kikola ki Kisalu ki Kintinu. Vasily wuvanga mangolo muingi kubuela pisuka. Dedi, nandi wusonika mu mua nkanda makani kaba tomba kudukisa. Bo kaba dukisanga makani mandi, buawu mvandi boma buandi buaba kedekukilanga. Nandi wutuba: “Mambu maba kuthulanga boma, bubu makuphananga beni mayangi. Bo Yave kakutsadisanga yibakula lutangu lufuana muingi kubomba khomba wunkieto voti wu dibakala mu kimvuka, yimbanga beni mayangi”. Zikhomba, benu mvinu lulenda baka ndandu  mu kifuani ki Vasily. Lukivana muingi Yave kalutuadisa. Benu kuvanganu mawu, Yave kalenda muvana mangolo ma kubuela kieba biyeku mu kimvuka.

MBI YAVE KAVANGA BAKIETO BANKAKA KUBA

10. Mbi Abingaili kavanga, ayi mbi ngiewu belonguka mu kifuani kiandi?

10 Khumbu yimueka, Ntinu Davidi ayi babakala baba yandi baba tina ntinu Sawuli ayi baba tomba lusalusu. Diawu badindila nkadu bidia kuidi dibakala dimueka wuba busina baba tedilanga Nabali. Bawu bamuena ti balenda dinda kuawu bidia kuidi Nabali, kibila bakieba bibulu biandi ku thandu. Vayi Nabali wuba beni buimi, ayi wumanga kuba sadisa. Davidi wudasuka beni ayi wubaka makani ma kuvonda Nabali ayi baboso baba kalanga ku nzo’andi. (1 Samueli 25:3-13, 22) Abingaili, nkazi wu Nabali wuyiza zaba mambu beni. Nandi kasa ba ko to kitoko, vayi wuba mvandi nduenga. Mu kibakala, nandi wuyenda kedengana Davidi, wufukama ayi wundinda muingi kabika vonda Nabali. Mu lukinzu, nandi wulomba Davidi muingi kabika mambu beni mu mioko mi Yave. Kukikulula ayi nduenga Abingaili kamonisa, kunyikuna ntima wu Davidi. Nandi wuvisa ti Yave nandi wufila Abingaili. (1 Samueli 25:23-28, 32-34) Abingaili wukuna zikhadulu zinsadisa kuba tsadulu va meso ma Yave. Mawu mvandi malenda monika bubu kuidi zikhomba zitu zi bakieto. Bo bankuna lukinzu ayi nduenga, Yave kalenda kuba tuadisa muingi kukindisa makanda ayi bimvuka biawu.—Zingana 24:3; Tito 2:3-5 .

11. Mbi bana bakieto ba Salumi bavanga, ayi banani banlandakananga kifuani kiawu bubu?

11 Mu zisekulu ziwombo kumbusa, Yave wusadila bana ba bakieto ba Salumi muingi kubuela mioko thungulu yi bibaka bi Yelusalemi. (Nehemia 2:20; 3:12) Kheti baba batekulu ba ntinu, bakieto abobo baba bakubama muingi kuvanga kisalu ki phasi ayi kilenda tula luzingu luawu va kingela. (Nehemia 4:15-18) Disuasana diwombo baba na babakala baba biyeku ku Tekoa, bamanga kukikulula muingi kubuela mioko mu kisalu kiaba vangama! (Nehemia 3:5) Yindula mayangi bana ba bakieto ba Salumi bamona bo thungulu yimana mu 52 di bilumbu! (Nehemia 6:15) Mu bilumbu bitu zikhomba ziwombo zi bakieto bakivananga. Bawu bankuangalalanga beni mu kubuela mioko bisalu binlongo dedi: kutunga ayi kubuongisa bibuangu bambuongiminga Yave. Mangolo, mayangi, ayi lukuikumunu lu zikhomba aziozi zi bakieto lunsadisanga kisalu kukuenda ntuala.

12. Buidi Yave kalenda kutu tuadisila dedi bo katuadisila Tabita?

12 Nkieto wunkaka wuba tsadulu kuidi Yave wuba Tabita. Kibibila kintuba ti nandi “wuba nketo wu mavanga mamboti ayi minsukami miwombo kasadisa.” (Mavanga 9:36) Tabita wuba wuzabakana buka mutu wunzolanga kukaba ayi nkua mamboti, ayi waba luta vangilanga mawu kuidi mimfuizi. Diawu bo kafua, mimfuizi miwombo badila. Vayi bo mvuala Petelo kamvulubusa, bawu bayangalala beni. (Mavanga 9:39-41) Mbi tube longuka mu kifuani ki Tabita? Befu boso, matoko voti biboba, babakala voti bakieto, tulenda vanga mawombo muingi kusadisa zikhomba zitu.—Ebeleo 13:16.

13. Kheti mu zitsoni Ruth kaba, buidi Yave kansadila ayi mbi kayiza tuba kuntuala?

13 Ruth khomba wumueka wuba beni zitsonya waba tomba kukota mu kisalu ki minsioni. Bo kaba muana kilezi, nandi waba kuendanga nzo ka nzo mu thinu muingi kukabula minkanda kuidi batu. Nandi wutuba: “Yaba zolanga beni kusamunina mu phila ayoyi”. Vayi kukoluka na batu matedi Kintinu ki Nzambi diba  diambu diphasi kuidi nandi. Kheti wuba beni zitsonya, Ruth wuyiza ba ntuami ntuala mu 18 di mimvu. Mu mvu 1946, nandi wukota kikola ki Ngiliadi ayi kuntuala wusadila ku Havaí ayi ku Japão. Yave wunsadila mu phila yi kukuitukila muingi kasamuna zitsangu zimona mu mala amomo. Vama vioka nduka 80 di mimvu kadi mu kisalu ki kusamuna, nandi wuyiza tuba: “Yave weta phana mangolo mawombo muingi yinunga zitsoni. Yidi lufiatu ti Yave kalenda sadila wosokua mutu wukunfiatilanga”.

BIKA YAVE KAKU TUADISA

14. Dedi bummonisina Kolosai 1:29, mbi tufueti vanga boti tutidi Yave katu tuadisa?

14 Tona mu thama, Yave wutuadisa bisadi biandi mu ziphila ziviakana. Abu ngiewu? Mbi Yave kalenda vanga ngie wuba? Mawu mala vangama to boti ngie widi wukubama. (Tanga Kolosai 1:29) Ngie kukivana, Yave kalenda kuvanga wuba nsamuni wu kifuza, nlongisi wumboti, mutu wumbombanga bankaka, kisadi kimboti, nkundi widi wukubama muingi kusadisa, voti kioso kiuma nandi kantomba muingi kuvanga luzolo luandi.

15. Dedi bummonisina 1 Timoteo 4:12, 15, lusalusu mbi matoko bafueti dinda kuidi Yave?

15 Abu beno matoko mueka nduka kuba bakulutu? Kimvuka ki Yave kintomba beni babakala badi bakubama muingi kuba minsadisi mi bakulutu ba kimvuka ayi kukieba biyeku binkaka. Mu bimvuka biwombo, bakulutu ba kimvuka bawu balutidi kena minsadisi mi bakulutu ba kimvuka. Boti ngie widi ditoko, buidi wumuena diyindu di kubuela kukivana mu kimvuka? Khumbu zinkaka, zikhomba zinkaka baba tubanga: “Kuba to nsamuni didi diambu dimboti kuidi minu.” Boti buawu wunyindudilanga, dinda lusalusu kuidi Yave muingi kakuvana phuila yi kukubama muingi kuba nsadisi wu bakulutu ba kimvuka ayi kakuvana mangolo ma kubuela kukivana mu kisalu kiandi. (Mpovi 12:1) Ditoko, lusalusu luaku luawu tuntomba!—Tanga 1 Timoteo 4:12,15.

16. Mbi tufueti dinda kuidi Yave, ayi kibila mbi?

16 Yave kalenda kukitula kioso kiuma muingi kudukisa lukanu luandi. Diawu, dinda mu lusambulu phuila yi kuvanga kisalu kiandi ayi dinda Yave kakuvana mangolo ngie wuntomba. Yosokua phunga widi, sadila thangu’aku, mangolo maku, nzayilu’aku ayi biuma widi muingi kukembisa Yave bubu. (Mpovi 9:10) Ngie kubaka luaku lu kubuela kukivana mu kisalu ki Yave, bika kumanga voti kuyindula ti wulendi nunga ko. Bukiedika, luaku lunneni beni kuvanga mamoso tulenda nunga muingi kuvana Tat’itu yi luzolo nzitusu kafueti tambula!

NKUNGA 127 Phila Mutu Mbi Yifueni Ba

^ Lut. 5 Ngie wutidi kubuela kukivana mu kisalu ki Yave? Ngie widi divuda boti wukhidi tsadulu kuidi nandi? Voti ngie wunyindula ti wulendi ko kukivana muingi kubuela sadila Yave? Dilongi adidi dinkuiza monisa buidi Yave mu ziphila ziwombo kalenda kuvanina phuila ayi mangolo ma kuvanga kioso kiuma muingi kudukisa lukanu luandi.

^ Lut. 3 Kheti mvuala Polo wusonika nkanda awowo kuidi Baklisto mu sekulu yitheti, minsua midi mu nkanda beni midi nkinza kuidi bisadi bioso bi Yave.