Skip to content

Skip to table of contents

 DILONGI 49

Vadi Thangu Muingi Kusala Ayi Muingi Kuvunda

Vadi Thangu Muingi Kusala Ayi Muingi Kuvunda

“Yizanu . . . va buangu kikambulu batu ayi luvunda fioti.” MALAKO 6:31.

NKUNGA 143 Tatamana Kusala ayi Kuvingila mu Mayangi

MAMBU TUANLONGUKA *

1. Mbi batu bawombo banyindulanga matedi kisalu?

MAYINDU mbi batu va dibueti diaku badi mu matedi kisalu? Mu zitsi ziwombo batu bubu, banluta kukivana mu kisalu kena mu bilumbu bi mavioka. Batu bansalanga beni, basi ko thangu muingi kuvunda, kukala na dikanda ni kheti thangu muingi kulonguka matedi Nzambi. (Mpovi 2:23) Vayi mvandi vadi batu bakhambu tianga kusala ayi bantombanga bibila muingi babika kusala.—Zingana 26:13, 14.

2-3. Kifuani mbi Yave ayi Yesu ba tuvana matedi kisalu?

2 Yave ayi Yesu badi mayindu mafuana mu matedi kisalu. Tuisi ko divuda mu kuzaba ti Yave wunzolanga kusala. Yesu wumonisa mawu bo katuba: ‘Tat’ama widi mu kusala nate bubu, diawu minu mvama yidi mu kusala.’ (Yoane 5:17) Yindula mu kisalu kiwombo Yave kaba mu kuvanga bivevi bi zimbasi, zimbuetila ayi biuma bioso bidi va nza. Befu mvitu tulenda mona bivisa bi bivangu biandi, mu kutala biuma bimboti Nzambi kavanga bidi va ntoto. Nsoniki wu minkunga wusonika kiedika bo katuba: “Phila bisalu biaku bididi woka, a Yave; mu nduenga wuvangila bibioso. Ntoto [widi wu wala] mu bivangu biaku.”—Minkunga 104:24

3 Yesu wulandakana kifuani ki Tat’andi. Nandi wusadisa Yave kuvanga diyilu ayi wuba va khonzu’andi buka ‘nsadisi wu bivangu biandi.’ (Zingana 8:27-31) Bo kayiza va ntoto, Yesu wuvanga kisalu kimboti. Kisalu beni kiba buka bidia kuidi nandi, ayi mamoso kavanga mamonisa ti Nzambi nandi wumfila.—Yoane 4:34; 5:36; 14:10.

4. Mbi tube longuka mu kifuani ki Yave ayi Yesu mu matedi kuvunda?

 4 Mu kuzaba ti Yave ayi Yesu bansalanga beni, mansundula ti tulendi vunda ko? Ndamba. Yave kavonganga ko, diawu katombilanga ko kuvunda. Vayi Kibibila kintuba ti bo kamana kuvanga diyulu ayi ntoto, “nandi wuvunda mu kisalu kiandi.” (Esodu 31:17) Mawu mansundula ti Yave wubika theti kuvanga biuma ayi wubotula thangu muingi kunyunga biuma kavanga. Yesu mvandi wusala beni bo kaba va ntoto. Vayi nandi wubotula thangu muingi kuvunda ayi kudia na bakundi.—Matai 14:13; Luka 7:34.

5. Mbi bilenda ba phasi kuidi bisadi bi Nzambi?

5 Kibibila kinkindisa dikabu di Nzambi muingi baba batu bansalanga. Bisadi bi Yave balendi ba ko bolo, vayi bafueti sala beni. (Zingana 15:19) Muingi wununga kuzingisa dikanda diaku, ngie wufueti sala. Ayi minlonguki mioso mi Klisto badi kiyeku ki kusamuna zitsangu zimboti. Vayi kheti bobo, bafueti botulanga thangu yifuana muingi kuvundanga. Ngie wummonanga phasi kudedikisa thangu yi kusala, yi kusamuna ayi yi kuvundila? Buidi tulenda dedikisila thangu yi kusala ayi yi kuvunda?

BUIDI WULENDA DEDIKISILA THANGU YI KUSALA AYI YI KUVUNDA?

6. Buidi Malako 6:30-34, yimmonisina ti Yesu wuba mayindu mafuana mu matedi kusala ayi kuvunda?

6 Buboti beni kuba mayindu mafuana mu matedi kisalu. Ntinu Salomo wutuadusu kuidi Nzambi muingi kusonika: ‘Biabioso bidi thangu.’ Nandi wutuba ti vadi thangu muingi kuvata, kutunga, kudila, kuseva, kukina ayi kuvanga mambu mankaka. (Mpovi 3:1-8) Bukiedika, kusala ayi kuvunda bidi biuma biodi binkinza mu luzingu. Yesu wuba mayindu mafuana mu matedi kisalu ayi kuvunda. Bo baba beni kifuza mu kisalu ki kusamuna, khumbu yimueka bapostolo basa baka ko “thangu yi kudila bidia.” Yesu wuba kamba: “Yizanu, [tuendanu] va buangu kikambulu batu ayi luvunda fioti.” (Tanga Malako 6:30-34.) Khumbu zinkaka bo Yesu ayi minlonguki miandi baba tombanga kuvunda, bawu basa mavanganga ko, vayi Yesu wuzaba nkinza wu kuvunda.

7. Kibila mbi kuvisa nsiku wu kisabala wulenda kutu sadisa?

7 Khumbu zinkaka, befu boso tuntombanga kuvunda voti kuvanga bisalu binkaka. Nsiku wu kisabala Nzambi kavana basi Isaeli mu thangu yikhulu wuntubila mawu. Yave kasi tukuika ko kulandakana nsiku beni bubu, vayi kuvisa nsiku awowo, wulenda kutu sadisa kufiongunina phila tuntadilanga kisalu ayi kuvunda.

KISABALA—KILUMBU KI KUVUNDA AYI KI KUBUONGIMINA NZAMBI

8. Dedi bummonisina Esodu 31:12-15, kisabala kiba kilumbu ki kuvanga mbi?

8 Diambu di Nzambi dintuba ti, bo vavioka bilumbu bisambanu, Nzambi wubika kuvanga biuma va ntoto. (Ngenesi 2:2) Kheti bobo, nandi wunzolanga kusala. Diawu kakhidi sadila mu ziphila ziwombo. (Yoane 5:17) Dedi bo Yave kavundila mu kilumbu ki sambuadi, basi Isaeli mvawu baba nsua wu kuvundanga kadika kisabala. Kiawu kiba kidimbu kuidi Yave ayi basi Isaeli. Kiawu kiba ‘kilumbu ki kuvunda’ ayi ‘kilumbu kinlongo kuidi Yave.’ (Tanga Esodu 31:12-15.) Mu kisabala beni, ni mutu kabasa salanga ko ni muana kilezi, ni mvika ni kheti bibulu bi nzo. (Esodu 20:10) Mu phila ayoyi, dikabu di Isaeli baba lutanga kutsikika mayindu mawu mu mambu ma kiphevi.

9. Mayindu mbi makhambu fuana batu mu bilumbu bi Yesu baba mu matedi kisabala?

9 Kilumbu ki kisabala kiba kilumbu kimboti  kuidi dikabu di Nzambi. Vayi zimfumu zi binganga mu thangu yi Yesu, baba sadilanga mu phila yimbi nsiku beni wu kisabala. Bawu baba tubanga ti mu kilumbu ki kisabala mutu kalendi tumuna ko kheti mua kititi ki manya voti kubelusa mutu. (Malako 2:23-27; 3:2-5) Phila baba yindudilanga yiba disuasana na phila Nzambi kaba yindudilanga. Ayi Yesu wumonisa bivisa mu mawu.

Dikanda di Yesu baba sadilanga kisabala muingi kuvanga mambu ma kiphevi (Tala lutangu 10) *

10. Dedi bummonisina Matai 12:9-12, mbi Yesu kaba yindulanga matedi kisabala?

10 Yesu ayi minlandikini miandi baba vundanga mu kisabala, kibila baba tumamananga nsiku basi Isaeli batambula mu nzila Mose. * Vayi Yesu wumonisa mu thubulu ayi mu mavanga ti, nsiku wu kisabala wuba wufuana kibila wuba vananga batu luaku lu kumonisa mavanga mamboti muingi kusadisa bankaka. Nandi wutuba mu lufiatu: ‘nsua muidi kuvanga mamboti mu kilumbu ki kisabala.’ (Tanga Matai 12:9-12.) Yesu kasa yindulanga ko ti mutu wumvanganga mamboti ayi wunsadisanga bankaka widi mu kumanga kutumukina nsiku wu kisabala. Mavanga ma Yesu mamonisa ti nandi wuba visanga kibila kinkinza Yave kavanina nsiku awowo kuidi dikabu diandi. Kuvundanga mu kilumbu ki kisabala kuaba sadisanga basi Isaeli kutsikika mayindu mawu mu mbuongimini yi Nzambi. Yesu wuyonzuka va dikanda baba sadilanga kisabala mu mambu ma kiphevi. Tuzabidi mawu kibila Kibila kintuba ti bo Yesu kaba ku Nazaleti divula kabutukila: “Wukota mu nzo yi lukutukunu mu  lumbu [kisabala] bila bobo bu bela kifu kiandi. Wutelama mu diambu di tanga masonoko.”—Luka 4:15-19.

BUIDI NGIEWU WUNYINDUDILANGA KISALU?

11. Kifuani mbi kimboti Yesu kamona kuidi Yosefi mu matedi kisalu?

11 Yosefi wulongisa Yesu kisalu ki mabaya, vayi mvandi wunlongisa mayindu Yave kaba mu matedi kisalu. (Matai 13:55, 56) Ayi ḿba Yesu wummona kisalu kingolo Yosefi kaba vanganga lumbu ka lumbu muingi kuzingisa dikanda. Diawu tulenda visa kibila mbi Yesu kakambila minlonguki miandi: “Kisadi kifueni mu tambula mfutu’andi.” (Luka 10:7) Bukiedika, Yesu wuzaba mbi binsundula kukivana mu kisalu.

12. Matangu mbi mantubila luzingu lu Polo, ma tumonisa mambu Kibibila kintuba mu matedi kisalu?

12 Mvuala Polo mvandi wuzaba mbi binsundula kukivana mu kisalu. Kutubila matedi Yesu ayi mambu kaba longanga kuidi bankaka, kiawu kisalu kiluta ba nkinza kuidi mvuala Polo. Kheti bobo, nandi wusala muingi kuyizingisa. Zikhomba ku Tesalonika bazaba ti Polo wuba salanga “builu ayi muini” wusala mu “thovokolo ayi mu ziphasi muingi [kabika ba kizitu]” kuidi bankaka. (2 Tesalonika 3:8; Mavanga 20:34, 35) Mu mambu amomo, Polo ḿba waba tubila kisalu kaba vanganga ki kutunga zitenda voti zinzo zi ngoto. Bo kaba ku Kolinto, Polo wuba na Akila ayi Prisca bawu “baba salanga kisalu [kimueka] ki kutunga zinzo zi ngoto”. Bo katuba ti wusala “builu ayi muini”, mawu masinsundula ko ti Polo wusala mu khambu vunda. Nandi wuba bilumbu kaba vundanga, dedi kilumbu ki kisabala. Mu kilumbu akioki, nandi wuba luaku lu kulonga basi Yuda, babasa salanga ko mvandi mu kilumbu ki kisabala.—Mavanga 13:14-16, 42-44; 16:13; 18:1-4.

13. Mbi tulenda longuka mu kifuani ki Polo?

13 Mvuala Polo wutu bikila kifuani kimboti. Nandi wuba salanga, vayi mvandi wutatamana kusamuna ‘nsamu wumboti wunlongo wu Nzambi.’ (Loma 15:16; 2 Kolinto 11:23) Mvandi wukindisa bankaka kuvanga mawu. Ndandu mbi kayiza baka? Akila ayi Prisca baba bakundi bandi baba “[salanga na Polo] mu kisalu ki Klisto Yesu.” (Loma 12:11; 16:3) Polo mvandi wukamba zikhomba ku Kolinto ti bafueti “[kukiyekula] mu sadila Mfumu.” (1 Kolinto 15:58; 2 Kolinto 9:8) Ayi Yave wutuadisa Polo muingi kusonika: “Woso mutu mengi kuandi sala, buna kabika tomba bidia.”—2 Tesalonika 3:10.

14. Mbi Yesu kaba tomba kutuba mu Yoane 14:12?

14 Kisalu kilutidi nkinza mu befu bubu kidi, kusamuna ayi kuvanga minlonguki. Ayi Yesu wutuba ti minlonguki miandi bala vanga mambu malutidi kena mambu nandi kavanga! (Tanga Yoane 14:12.) Yesu kasa tomba ko kutuba ti, befu tuala vanga mangitukulu dedi bo nandi kavangila. Vayi nandi wuba tomba kutuba ti minlandikini miandi bala longa ayi bala samuna mu bibuangu biwombo, kuidi batu bawombo ayi mu thangu yiwombo, kuvioka mo nandi kavanga.

15. Biuvu mbi tufueti kuyikuvusa ayi kibila mbi?

15 Boti ngie wunsalanga muingi kubaka bu kuyizingisila, wukiyuvusa: ‘Ku kisalu kiama, yidi wuzabakana buka kisadi kimboti? Yimvanganga kisalu kiama mu thangu tutsikika na mfumu kisalu ayi yikivananga mu kiawu?’ Boti mvutu’aku mu biuvu abiobi widi ‘ngete’, buna mfumu’aku wala ba lufiatu mu ngiewu. Ayi mu kibila akioki, batu ku kisalu kiaku bala vua nkinza zitsangu zimboti. Mu kuyindula mu kisalu ki kusamuna ayi ki kulonga, wukiyuvusa: ‘Yidi wuzabakana banga mutu wukivananga mu kisalu ki kusamuna? Yinkubamanga buboti mu kuvana kimbangi kitheti? Yimfika vutukilanga batu bamvuanga  nkinza kiedika? Yinsamunanga mu ziphila ziviakana?’ Boti mvutu’aku mu biuvu abiobi widi ‘ngete’, buna ngie wala baka mayangi mu kisalu kiaku.

MAYINDU MBI WIDI MU MATEDI KUVUNDA?

16. Buidi Yesu ayi minlonguki miandi bamonisina ti baba disuasana na batu mu thangu’awu ayi mu thangu’itu?

16 Yesu wuzaba ti khumbu zinkaka nandi ayi bapostolo bandi bala tomba kuvunda. Batu bawombo mu thangu yi Yesu ayi bawombo mu bilumbu bitu, banyindulanga buka dibakala diba kimvuama Yesu katubila mu kinongo kata. Dibakala beni wuyikamba: “Vunda kuaku, dia, nua ayi mona khini.” (Luka 12:19; 2 Timoteo 3:4) nandi waba yindulanga ti biuma bilutidi nkinza mu luzingu bidi, kuvunda ayi kumona khini. Vayi Yesu ayi bapostolo bandi basa yindulanga ko ti biuma abiobi biawu bilutidi nkinza.

Kutadila kisalu ayi kuvunda mu phila yifuana, kutu sadisanga kutsikika mayindu mitu mu mambu ma kiphevi ma tutuadisanga beni mayangi (Tala lutangu 17) *

17. Mbi tufueti vanga mu thangu tuidi mu phundulu ku kisalu voti ku kikola?

17 Bubu befu tumvanganga mangolo ma kulandakana kifuani ki Yesu, mu kusadila thangu’itu bika to mu kuvunda, vayi mvandi mu kusamuna ayi mu kulandakana zikhutukunu. Befu tumvanganga mangolo muingi kusamuna ayi kulandakana zikhutukunu kibila bisalu abiobi binlongo bidi beni nkinza kuidi befu. (Ebeleo 10:24, 25) Kheti bo tuidi mu phundulu yi kisalu voti yi kikola, befu tuntatamananga kuvanga bisalu bi kiphevi. Tunlandakananga zikhutukunu zioso ayi tumbanga bakubama muingi kuvana kimbangi batu tundengana.—2 Timoteo 4:2.

18. Mbi Ntinu’itu Yesu Klisto kantomba befu tuvanga?

18 Mayangi beni kuzaba ti Ntinu’itu Yesu Klisto katudindanga ko mambu tulendi nunga ko kuvanga ayi wutu sadisanga kutadila mu phila yifuana kisalu ayi kuvunda! (Ebeleo 4:15) Yesu wuntomba befu tuvundanga, vayi wuntomba mvandi befu tusala muingi tubaka bu kuyizingisila ayi tukivana mu kisalu kinluta tuadisanga mayangi: Kisalu ki kuvanga minlonguki. Mu dilongi dinlanda tunkuiza tubila mbi Yesu kavanga muingi kutu vukisa.

NKUNGA 38 Yave Wala Kuvana Mangolo

^ Lut. 5 Kibibila kitulonga buidi tulenda bela mayindu mafuana mu matedi kisalu ayi kuvunda. Dilongi adidi dinkuiza tusadisa kufiongunina phila tunyindudilanga kisalu ayi kuvunda, mu kusadila kifuani ki kisabala dikabu di Isaeli baba landakananga kadika sabala.

^ Lut. 10 Minlonguki mi Yesu baba kinzikanga kilumbu ki kisabala. Diawu batedimina kilumbu ki kisabala kivioka muingi bamanisa kukubika dibumbi di Yesu.—Luka 23:55, 56.

^ Lut. 55 MAMBU MADI MU ZIFIKULA: Yosefi wunnata dikanda diandi ku nzo lukutukunu mu kilumbu ki kisabala.

^ Lut. 57 MAMBU MADI MU ZIFIKULA: Khomba yimueka wunsalanga muingi kuzingisa dikanda diandi, wunsadilanga thangu ka khambulu ku kisalu muingi kuvanga bisalu bi kiphevi, ayi wuntatamana kuvanga mawu bo nandi ayi dikanda diandi badi mu kuvunda.