Skip to content

Skip to table of contents

“Luvutulanga Matondo mu Mambu Moso”

“Luvutulanga Matondo mu Mambu Moso”

NGIEWU widi mutu widi kifu ki kuvutulanga matondo? Befu boso tufueti yindulanga mu mawu. Kibibila kibikula ti mu bilumbu bitu, batu bawombo belasa ‘zabanga ko kuvutula matondo.’ (2 Timoteo 3:2) Ḿba ngie wumana zaba batu banyindulanga ti bafueni mu baka biabioso badi ayi baboso bafueti kuba vangila mamboti. Vayi bawu bamonanga ko nkinza wu kuvutula matondo. Ḿba ngie wunkikinina ti disi ko diambu dimboti kukala na batu abobo.

Vayi bisadi bi Yave baba kindisa: “Luzaba vutulanga matondo.” Befu tufueti “vutulanga matondo mu mambu moso” (Kolosai 3:15; 1 Tesalonika 5:18) Kuvutula matondo kulenda kutu tuadisa ndandu mu ziphila ziwombo.

BA MAYINDU MAMBOTI MU MATEDI NGIE VEKA AYI VUTULANGA MATONDO

Kuvutulanga matondo, didi diambu dinkinza dilenda kutu sadisa kuba buboti. Mutu wuntonda ayi mutu bamvutudila matondo, baba buadi bambanga mu mayangi. Kibila mbi mawu mammonikinanga? Yindula kifuani akiki: Bo mutu kadi wukubama muingi ku kusadisa, mawu mammonisa ti nandi wuku vuanga nkinza. Kuzaba mawu, kuala tutuadisanga beni mayangi. Mawu mamonikina Luti, bo Boazi kammonisina mamboti nandi wuyangalala beni mu kuzaba ti vadi mutu waba kumvuanga nkinza.—Luti 2:10-13.

Kiuma kilutidi nkinza, kidi kuvutulanga matondo kuidi Nzambi. Bukiedika, khumbu zinkaka ngie wunyindulanga mambu Nzambi ka kuvangila ayi kakhidi ku kuvangila. (Deutelonomi 8:17, 18; Mavanga 14:17) Botulanga thangu muingi kuyindula mu lusakumunu ngie ayi batu wunzolanga bama tambula. Kuvanga mawu kuala kusadisa kubuela vutulanga matondo kuidi Mvangi’aku ayi kuba lufiatu ti nandi wu kuzolanga ayi wu kuvuanga nkinza.—1 Yoane 4:9.

Bika to kuyindula mu biuma ayi lusakumunu Nzambi ka tuvananga, vayi vutulanga mvandi matondo mu mawu. (Minkunga 100:4, 5) Nsoniki wumueka wutuba: “Kuvutulanga matondo kuidi bankaka kumbuelanga mayangi mitu.”

KUVUTULANGA MATONDO KUNKINDISANGA KIKUNDI

Kuvutulanga matondo, kidi kibila kinkaka kinkinza muingi kukindisa kikundi kitu na bankaka. Befu boso tutidi ba tuvua nkinza, diawu bo wumvutula matondo kuidi mutu wu kuvangila mamboti, kikundi kinu kinluta banga kingolo. (Loma 16:3, 4) Mvandi batu bantondanga bawu banluta sadisanga bankaka. Bawu bamvuanga nkinza bo bankaka baba vangila mamboti, ayi bambanga tsatu yi kuba vangila mvandi mamboti. Bukiedika, kusadisa bankaka kuntuadisanga mayangi. Mawu madi nguizani na mambu Yesu katuba: ‘Mayangi malutidi kuidi mutu wumvana bika kuidi wuntambula’—Mavanga 20:35.

Robert Emmons, nlongisi wumueka wu kikola kinangama ku Califórnia mu matedi kuvutula matondo wutuba: “Muingi tuvutulanga matondo tufueti visa ti lusalusu lu bankaka tuntombanga. Vadi thangu, tunsadisanga bankaka ayi thangu zinkaka bawu mvawu ba tusadisanga.” Bukiedika, muingi tutatamana kuzinga ayi tubaka mayangi mu luzingu, tuntombanga lusadusu lu bankaka mu ziphila ziwombo. Dedi, balenda ku tusadisa mu kutuvana bidia voti kutu sumbila bilongo. (1 Kolinto 12:21) Mutu wuntondanga,  wummonisanga kuidi bankaka ti wumvuanga nkinza mambu ba kumvangila. Diawu buboti kuyikuvusa: Minu yimvutulanga matondo bo mutu ka kuphangila dioso diambu?

KUTONDA AYI PHIL’AKU YI KUTADILA MAMBU

Kutondanga bankaka, kidi mvandi kibila kinkaka kitu sadisanga kutsikika mayindu mitu mu mambu mamboti, kubika kuandi mambi. Kilunzi kitu ba kidedikisa banga kisosolo, kibila kiawu ki tusadisanga kutsikika mayindu mitu mu mambu madi nkinza ayi kuloza makhambulu nkinza. Ngie kubanga kifu ki kuvutulanga matondo, ngie wala luta baka biuma bimboti ayi biawu biala kusadisa kuluta vutulanga matondo. Kutsikika mayindu mu mambu mamboti kuala kusadisa kulandakana dilongi di mvuala Polo: ‘Luyangalala thangu zioso mu Mfumu.’—Filipi 4:4.

Ngie wala visa ti kuvutulanga matondo, kutu sadisanga kubika ba mayindu mambi. Phasi beni mutu wumvutulanga matondo kumona yoyawu thangu nsoki, kiunda voti kulunda nganzi. Buisi ko buawu? Mvandi batu bamvutulanga matondo, bavuanga ko beni nkinza mambu ma kinsuni. Bawu bamvuanga nkinza biuma badi ayi batombanga ko kubuela luta baka binkaka.—Filipi 4:12.

YINDULA MU LUSAKUMUNU!

Bo widi kisadi ki Yave, ḿba ngie zebi ti Satana tidi ngie wuba mu kiunda ayi wuvonga mu kiphevi, mu kibila ki ziphasi zi bilumbu bitsuka. Nandi wunkuiza zola beni kumona ngie kuba mutu wunkuananga beni ayi wuntadilanga mambu mu phila yimbi. Ngie kuba ntindu kifu akioki, batu mu kisalu ki kusamuna balasa kuwa ko zitsangu zimboti. Bukiedika, kuvutulanga matondo kuidi kithuadi na mbutu wu kiphevi yi Nzambi, dedi mayangi ayi kiminu. Dedi, befu boso tunkuangalalanga mu mamboti Yave ka tuvangilanga ayi tuidi lufiatu ti nandi wala dukisa mamoso kakanikisa mu bilumbu binkuiza—Ngalatia 5:22, 23.

Bo widi mu dikabu di Yave, ḿba ngie wulenda kikinina ti dilongi adidi dima tubila beni matedi kutonda. Kheti bobo, ngie wulenda mona phasi kutondanga ayi kutadilanga mambu mu phila yimboti. Vayi bika kuvonga, kibila ngie wulenda ba mutu wuntondanga. Buidi? Kadika kilumbu, botula thangu muingi wuyindulanga mambu moso mamboti mammonikanga mu luzingu luaku malenda kukindisa kuvutulanga matondo. Ngie kuvanga mawu, walasa mona ko phasi kuvutulanga matondo. Mu phila ayoyi ngie wala luta ba mayangi kena batu bantsikikanga mayindu mawu mu ziphasi zi luzingu. Yindula mu mambu mamboti Nzambi ayi bankaka bakuvangilanga muingi kutu kindisa. Kadika kilumbu ngie wulenda sonika mambu muadi voti matatu mabe kumonikina mu kilumbu malenda kuvanga kuvutula matondo.

Batu banlongukanga matedi mambu amomo, bantubanga ti kutonda kulenda balula phila tonzu tuitu tunsadilanga ayi kulenda ku kusadisa kuba mayindu mafuana. Mutu wumvutulanga matondo widi mutu wu mayangi. Diawu, yindula mu lusakumunu, vua nkinza mambu mammonikanga mu luzingu luaku ayi vutulanga matondo mu mawu! Bika kuyindula ti ngie wufueni mu tambula mambu moso mamboti mammonikanga mu luzingu luaku, ‘tondanga Yave kibila nandi nkua mamboti.’ Ayi “luvutulanga matondo mu mambu moso.”—1 Lusansu 16:34; 1 Tesalonika 5:18.