Skip to content

Zimbangi zi Yave

Select language Ibinda

Tidi Kwaku Kuzaba Kiedik’e?

Tidi Kwaku Kuzaba Kiedik’e?

KIEDIKA kitedi mbi’e? Kiedika kitedi biuvu bi lutidi beni nkinza batu ba nkuvulanga beni. M’ba ngiewu khe vanga biuvu buka bibi:

  • Bu kiedika kwandi ti Nzambi uku tu kiebang’e?

  • Mi m’vita ayi ziphasi ziala man’e?

  • Bwidi tu m’belanga ti tu befw’e?

  • Bafwa badi na diana ti bala be zing’e?

  • Bwidi yi fwenini ku sambidila mo Nzambi ka ngiuw’e?

  • Bwidi yi fwenini ku bakila luzingu lu zinyenzi’e?

Kwidi u lenda ku tombila mi m’vutu mu biuvu abiobi’e? Ngie kwenda mu zinzo zi banswekilanga zi buka, ma we dengana bivevi bi zi buka zi m’banza ku vana mi m’vutu. Angi, buka na buka kubayisanga yi nkaka. Zi buka zi nkaka zi m’banga nkinza mu thangu yi lwelu, vangi zi m’mananga nkinza ayi ba m’balulanga zinkaka.

Diawu, kwidi buka mweka yidi na mi m’vutu mi ku tela mana. Yawu yidi buka yi kiedika. Yesu Klistu utuba mu lusambulu kwidi Nzambi: “Diambu diaku yi kiedika.” (João 17:17) Diambu beni tu di zabidi abubu Kibibila ki Nlongu. Mu zitsielu zi nkanda zi nlandila, wa m’mona mi m’vutu mi kiedika mi Kibibila mi m’visikisa biuvu bidi ku yilu.

 Bu Kiedika Kwandi ti Nzambi Uku tu Kiebang’e?

MBI BATU BA M’VENANGA KIUVU A KIOKIO: Twidi mu kuzingilanga mu nza yi wedi mavanga ma mbi ayi yi khembu lunungu. Binganga biwombu bi nlonganga ti ziphasi zi tu m’monanga zidi mu luzolu lu Nzambi.

MBI KIBIBILA KA NLONGANGA: Kasi ko Nzambi u ntwalanga mambi. “Kinanu beni Nzambi yi kiedika mukuvanga mambi ayi Phungu tulendu mu kusadila ma kambu lunungu!” bosu bwidi mu Jó 34:10. Nzambi widi na dikani di luzolu mu batu. Diawu, Yesu ka tu longila tu sambilanga: “Tat’etu widi ku Diyilu, bika dizina diaku diba dinlonga. Bika Kimfumu kiaku kiza. Bika luzolo luaku luvangama va ntoto, banga bu lueti vangimina ku Diyilu.” (Mateus 6:9, 10) Nzambi uku tu kiebanga beni, diawu u vanga mamoso mu kunungisa dikani diandi.​—João 3:16.

Bwe tanga Gênesis 1:26-28; Tiago 1:13; ayi 1 Pedro 5:6, 7.

Mi M’vita ayi Ziphasi Ziala Man’e?

MBI BATU BA M’VENANGA KIUVU A KIOKIO: M’vita ukhidi manisanga miela mi batu ba wombu. Batu baboso badi mu kutovuka.

MBI KIBIBILA KA NLONGANGA: Nzambi u lubula thangu yi kala tula malembi va ntoto wawo. Mu Kitinu kiandi, luyalu lu diyilu, batu baboso bala sa bwe “longuka ko m’vita.” Mu diawu, bala “kitula binwanunu biawu bisengu bi ku vatilanga mbongu.” (Isaías 2:4) Nzambi wala kwiza manisa kondwa ku lunungu ayi ziphasi ziosu. Kibibila kidi mu ku kanikisa ti: “Nzambi wela fiona matsuela moso mu meso mawu ayi lufua lulendi buela ba ko; kiadi ki lufua kilendi buela ba ko, bidilu ayi ziphasi bilendi buela ba ko.”—Revelação 21:3, 4.

Bwe tanga Salmos 37:10, 11; 46:9; Miquéias 4:1-4.

Bwidi tu M’belanga ti tu Befw’e?

MBI BATU BA M’VENANGA KIUVU A KIOKIO: Binganga biwombu bi nlonganga ti mutu fwidi, widi na kiuma ki bwe zinganga. Bankaka ba nkikininanga ti bafwa balenda ku vanga badi monyo bubi ove Nzambi u nzengilanga ba nkwa mambi nkanu ayi uba filanga ku mbazu yi bulungi yi m’vu ka m’vu.

MBI KIBIBILA KA NLONGANGA: Mu lufwa, luzingu lu mutu lumeni. Tala bu ntubila Eclesiastes 9:5: “Bafwa . . . basa zaba ko ne kiuma ki m’vela.” Batu bafwa basa zaba ko ne kiuma, ne kuwa, ne kusala, balendi kutuvanga bubi ko,​—ove ku sadisa​ badi monyo.​—Salmos 146:3, 4.

Bwe tanga Gênesis 3:19 ayi Eclesiastes 9:6, 10.

 Bafwa Badi na Diana ti Bala be Zing’e?

MBI BATU BA M’VENANGA KIUVU A KIOKIO: Tu tidi ku zinga, ayi tu tidi kumona zinyenzi zi luzingu ayi baboso ba tu nzolanga. Difwanakana tu ba phwila yi ku bwe mona zi khomba zitu zi luzolu zi fwa.

MBI KIBIBILA KA NLONGANGA: Batu bawombu bafwa bala vulubuka. Yesu uvana tsilulu ti “Babo... badi mu biziami bela wila mbembo andi; bela totuka. . .” (João 5:28, 29) Mu lukanu lukhulu lu Nzambi, baboso bala vulubuka mu kinsuni, bala baka lwaku lu ku zingila ku paladisu yi ntoto. (Lucas 23:43) Mu tsilulu beni mwidi buvinya buduka ayi luzingu lu m’vu ka m’vu kwidi batu ba ntumamananga. Kibibila ki ntuba ti: “Batu basonga bela tambula tsi banga kiuka ayi bela mukalanga mu zithangu zioso.”​—Salmos 37:29.

Bwe tanga Jó 14:14, 15; Lucas 7:11-17; ayi Atos 24:15.

Bwidi yi Fwenini ku Sambidila mo Nzambi ka Ngiuw’e?

MBI BATU BA M’VENANGA KIUVU A KIOKIO: Batu mu binganga biabioso ba nsambilanga. Vangi, bawombu ba m’badilanga ti Nzambi ka yuwanga ko zi tsambulu ziawu.

MBI KIBIBILA KA NLONGANGA: Yesu u tu longa ti tu bika ku vutukilanga bikuma biobiawu mu minsambu mitu. Nandi u tuba, “Mu thangu lunsambila, lubika vutukilanga mambu banga bueti vanga Bapakanu.” (Mateus 6:7) Ti tutidi ti Nzambi ka yuwa minsambu mitu tu fweni ku sambila bosu bwidi luzolu lwandi. Diawu, tu fweti kulonguka luzolu lwandi ye ku sambila bosu bu lwididi. Ayi 1 João 5:14, ki m’visikisa: “Enati tutombidi diambu dimosi boso buididi luzolo luandi, niandi wukutuwilanga.’’

Bwe tanga Salmos 65:2; João 14:6, 14; ayi 1 João 3:22.

Bwidi yi Fwenini ku Bakila Luzingu lu Zinyenzi’e?

MBI BATU BA M’VENANGA KIUVU A KIOKIO: Batu bawombu ba m’badilanga ti zimbongu, kwenda tsangu, ove kitoku kinyitu kilenda ku bavana mayangi. Diawu, bawu bantombilanga biuma abiobio mo​—babaka nyenzi yi m’vioka.

MBI KIBIBILA KA NLONGANGA: Yesu umonisa sabi yi zinyenzi buka tuba ti: “Khini kuidi minsukami mu pheve, bila bawu bavuidi Kimfumu ki Diyilu” (Mateus 5:3) Tu lenda kubaka nyenzi yi kiedika ti befu kutomba nzila yi ku dedikisa phwila yitu yi lutidi—nzala yitu yi kiedika yi kiphevi yitedi mu kuzaba Nzambi ayi lukanu lwandi mu befu. Kiedika beni kidi mu Kibibila. Kuzaba kiedika beni kilenda ku tu sadisa ku swasisa mambu madi nkinza ayi makhembu. Befu ku kikana ti kiedika ki Kibibila ki twadisa mayindu ayi mavanga mitu, ki lenda ku tu vana luzingu lulutidi tsundu.​—Lucas 11:28.

Bwe tanga Provérbios 3:5, 6, 13-18 ayi 1 Timóteo 6:9, 10.

 Ma tu makuwa madi mwa ndambu mbonosonu yi mi m’vutu mi Kibibila mu biuvu bi bisambanu. Tidi kwaku ku zaba beni mankak’e? Ti ngiewu m’vaku widi “nkinza u kuzaba Nzambi,” tu nkikinina ti ngiewu widi nkinza u ku zaba beni. Lenda kwaku kutomba ku zaba biuvu binkaka, buka bibi: ‘Ti Nzambi u ku tu kiebanga, mu mbi ka m’bikilanga mambi ayi ziphasi mu luzingu lu batu’e? Bwidi yi lenda nyevisila luzingu lu dikanda diami’e?’ Kibibila ki m’vana mi m’vutu mi lunga ayi mi nyenzi mu biuvu abio ayi bi nkaka biwombu.

Vangi, thangu ayi batu bawombu ba tianga ko beni ku longuka Kibibila. Bawu ba kitadilanga, buka yi thama ayi yi wedi phasi mu ku visa. Tidi kwaku ba ku sadisa mo u bakula mi m’vutu midi mu Kibibil’e? Zimbangi zi Yave ba m’vananga bisadulu biodi bi lenda ku kusadisa.

Kitheti, buka O que a Bíblia Realmente Ensina? yi nsadisa batu ba khembu thangu mu biuvu biawu bi Kibibila bidi nkinza. Ki m’mwadi, ndongokulu yi Kibibila yi bobu mu zinzo. Nkundi ukala yaku, awowu unkhambu futa, zebi ku longisa Kibibila, ka lenda kwiza ku nzo aku ove vosukwa vama va tidi, mu ku longuka yaku Kibibila mu thangu yi lwelu kadi ka lumingu. Mafunda ma batu mu nza yayo, badi mu kutambula kwawu ndongukulu ayoyo. Bawombu mu bawu bakikinini mu nyenzi ti: “Tubakudi kiedika!”

Kwisi ko busina bulutidi ayi kiedika. Kiedika ki Kibibila ki tu kulanga mu mina mi bakulu, mu nzimbukusu, ayi boma bu khembu tsundu. Kiedika beni ki ku tuvana diana, tsundu yi luzingu ayi mayangi. Yesu utuba ti: “Benu mwala zaba kiedika, ayi kiedika kiala mu kula.”​—João 8:32.