Skip to content

Skip to table of contents

Zimbangi zi Yave

Select language Ibinda

 Kapu Kumi Sambwadi

Lwaku lu Kusambila

Lwaku lu Kusambila

“Mvangi wu diyilu ayi ntoto.” Tidi kukuwa minsambu mitu.Minkunga 115:15

NTOTO wulutidi bulwelo na diyilu dinzungidila nza yimvimba. Yave na kutala ntoto ayi batu badi mu zi tsi zyoso, nandi wuba mwenanga banga dibeta dinlangu mu dibola. (Minkunga 115:15; Yesaya 40:15) Vayi Yave wutuvwanga nkinza. Minkunga 145:18 19 yintuba: “Yave widi wufikama kuidi . . . babo bakuntelanga mu bukiedika. Niandi weti dedikisa zitsatu zi bobo beti kukinzika; weti wa yamikina kuawu ayi weti kubavukisa.” Bukyedika lwaku lunkinza beni twidi! Kibila Yave mvang’itu tidi beni tumfikama ayi kukuwa minsambu mitu. Diawu tulenda tubila ti nsambu lwaku lunneni Yave kavana mutu ka mutu.

1, 2. Kibila mbi nsambu wididi lwaku lunneni mu befu ayi kibila mbi kutomba kuzaba ma Kibibila kantuba mu matedi nsambu?

2 Yave wunkuwanga minsambu mitu, befu kundindila mu phila yifweni. Bwidi tulenda vangila mawu? Twantala mbi Kibibila kintuba mu matedi nsambu.

KIBILA MBI KUSAMBILA YAVE?

3. Kibila mbi fweti sambidilanga Nzambi?

3 Yave wuntomba ngye wunkamba mayindu ayi mabanza maku. Bwidi tuzabidi ti mawu kantomba? Tanga Filipi 4:6, 7. Yindula lwaku alulu! Mfumu yi nza yimvimba tidi ngye wunkamba mayindu ayi mabanza ma tsi ntim’aku voti mambu wummona.

4. Bwidi kusambilanga lumbu ka lumbu kulenda kindisila kikundi kyaku na Nzambi?

 4 Lusambulu lunkindisanga kikundi kitu na Nzambi. Banga bakundi bakyedika bankindasananga bo bansolula, bankambasananga mayindu ayi mambu bammonikinanga, buawu bwididi bo tunsolula na Yave mu nzila yi lusambulu. Mu Kibibila musonama mayindu ayi makani Nandi kadi mu bilumbu binkwiza. Ngye wulenda kunkamba mabanza maku lumbu ka lumbu mu lusambulu. Bo wumvangila mawu, buawu kikundi kyaku na Nzambi kimbwedila kukinda.Yakobi 4:8.

MBI TUFWETI VANGA MWINGI NZAMBI KAYUWA MINSAMBU MITU?

5. Bwidi tuzabidi ti Yave kawilukilanga ko minsambu myoso?

5 Yave, wunwilukilanga minsambu myoso? Mve. Mu thangu yikhulu Yave wukamba bana ba Isaeli: ‘Yizebi ti beno mumvanganga minsambu miwombo, angi Yilendi ko kumuwilukila, kibila myoko  minu mintengulanga menga.’ (Yesaya 1:15) Diawu befu kutomba Yave kawilukila minsambu mitu, muna tufweti ku kikenga mu dyambu tubika vanga mambu Yave kakhambu tyanga.

6. Kibila mbi tufweti bela kiminu mu Yave? Bwidi wulenda monisina kiawu?

6 Befu kutomba Yave kawilukila minsambu mitu, tufweti ba kiminu mu nandi. (Malako 11:24) Mvwala Polo wusonika “mutu kambulu minu kalendi monisa Nzambi khini ko. Bila bulutidi mboti ti woso mutu tidi fikama Nzambi kawilukila ti Nzambi widi ayi kafueti wilukila ti niandi wumfutanga batu boso bankuntombanga.” (Ebeleo 11:6) Tubika to kutuba ti twidi kiminu mu Nzambi, vayi tufweti monisa kiawu mu luzingu lwitu mu kuntumamananga.Tanga Yakobi 2:26.

Wulenda kunsambila yosokwa thangu

7 Tufweti monisa lukinzu ayi kukikulula bo tunsambila Yave. Mu kibila mbi? Yindula ngye kutomba kukoluka na ntinu voti mfumu yi tsi, mwisi ko mu lukinzu fweti kolukila yandi? Bo Nzambi Nkwa ngolo zyoso, tulendi monisa ko lukinzu lu lutidi ayi kukikulula bo tunsambila? (Ngenesi 17:1; Minkunga 138:6) Tunsambila Nzambi mu bukyedika, befu kunkamba mabanza mitu ma tsi ntima ayi kubika kavutukilanga minsambu thangu ka thangu.Matai 6:7, 8.

8. Befu kudinda Yave katusadisa mu dyosokwa dyambu, mbi binkaka tufweti vanga?

8 Bo tunsambila Yave tufweti vanga mangolo mu kusadila mambu tundinda mu lusambulu. Dedi befu kudinda Yave  katuvananga dipha di kadika lumbu voti mimvwatu, muna tubika ba bolo vayi tufweti vanga mangolo mu kuvanga kyosokwa kisalu. (Matai 6:11; 2 Tesalonika 3:10) Befu kudinda Yave katusadisa mwingi tubika kifu kimbi, muna tufweti tina zinzila zimbi zilenda kutuvangusa kuvutukila kifu beni. (Kolosai 3:5) Buawu twanfyongunina byuvu batu bankuvulanga mu matedi minsambu.

BYUVU BINKINZA BATU BANKUVULANGA MATEDI MINSAMBU

9. Nani tufweti dindanga mu nsambu? Mbi Yoane 14:6 yitulonga mu matedi minsambu?

9 Nani tufweti dindanga mu nsambu? Yesu wulongisa milandakini myandi badindanga. ‘Tat’itu widi ku Diyilu’. (Matai 6:9) Nandi mvandi wutuba: ‘Minu ndidi nzila, kiedika ayi luzingu. Vasi ko mutu wulenda kuenda kuidi Tata enati kasi viokila ko va yidi.’ (Yoane 14:6) Diawu mu dizina di Yesu to tufweti dindilanga minsambu mitu kwidi Yave. Kibila mbi tufweti sambidilanga mu dizina di Yesu? Mo Yave kavitika minsambu mitu, tufweti monisa lukinzu kwidi mutu kafila va ntoto mwingi kutukula mu masumu ayi mu lufwa. (Yoane 3:16; Loma 5:12) Yave mvandi wubyeka Yesu mwingi kaba Nganga Nzambi ayi Mfundusi.Yoane 5:22; Ebeleo 6:20.

10 Nzambi wunkwikanga tuba bafukama, batelama voti bakala mwingi kayuwa minsambu mitu? Mve. Kibibila kitulonga ti bosokwa bu tumbela bo tunsambila, Nandi kalenda kuwa, befu kuvangila mawu mu lukinzu. (1 Lusansu 17:16; Nehemia 8:6; Danieli 6:10; Malako 11:25) Kwidi  Yave, madi nkinza ma tundindila mu ntima woso. Tudindila mu mbembu yinangama, ku tsi ntima, vosokwa vama ayi yosokwa thangu, Nandi kalenda kuwa nsambu’itu.Nehemia 2:1-6.

11. Mambu mbi ngye wulenda dinda Yave mu lusambulu?

11 Mbi tulenda dinda mu nsambu? Tulenda dinda byuma byoso bidi mu luzolo lu Yave. Angi Kibibila kintuba: “Enati tutombidi diambu dimosi boso buididi luzolo luandi, niandi wukutuwilanga.” (1 Yoane 5:14) Tulenda kwitu kudinda mu nsambu, byuma bi tutedi? Ngete. Kibila kusambila Yave kufweti ba banga mutu wunkoluka na nkundi’andi. Tulenda zibudila Yave ntima mwingi kunkamba mabanza mitu ma tsi ntima. (Minkunga 62:8) Tulenda dinda phevi’andi yinlongo mwingi yitusadisa kuvanga mambu masulama. (Luka 11:13) Tulenda dinda ndwenga yi Yave yitusadisa kubaka makani mamboti bo tundengana mambu. (Yakobi 1:5) Tudindanga mvandi, nlemvu wu masumu mitu kwidi Yave. (Efeso 1:3, 7) Tufweti sambidilanga mvandi bankaka, dedi badi va dikanda ditu ayi zikhomba mu kimvuka.Mavanga 12:5; Kolosai 4:12.

12. Mbi tufweti tula va theti mu minsambu mitu?

12 Mbi tufweti tulanga va theti mu minsambu mitu? Luzolo lu Yave, luawu tufweti tula va theti. Tufweti vutulanaga matondo mu mambu mamboti katuvangilanga. (1 Lusansu 29:10-13) Tuzabidi mawu kibila, Yesu bo kaba va ntoto wulongisa minlandikini myandi bwidi busambidila. (Tanga Matai 6:9-13.) Nandi wubakamba dyambu di theti bafweti dindanga munsambu, kuzitisa dizina di Nzambi ayi kudimwena dinlongo. Yesu wutuba mvandi badindanga Kintinu ki Nzambi kiza mwingi kivanga luzolo lu Nzambi va ntoto. Befu kumana kudinda mambu mankinza Yesu katubila matedi Nzambi, bosi tulenda dinda matedi zitsatu zitu.  Kutula va theti Kintinu ki Yave mu zitsambulu zitu, phila yi kumonisina ti mawu malutidi nkinza mu luzingu lwitu.

13. Kilokolu kikwa tufweti vanga mu kusambila mwingi Nzambi kayuwa nsambu’itu?

13 Kilokolu kikwa tufweti kala mu kusambila mwingi Nzambi kayuwa nsambu’itu? Kibibila kisa zenga ko kilokolu tulenda vanga mu minsambu.  Angi vadi thangu tulenda vangila minsambu mikula ayi mikhufi. Dedi bo tundya tulenda vanga minsambu mikhufi. Khumbu zinkaka tulenda vanga minsambu mikula mu thangu tunzimbudila Nzambi ntima mwingi kunkamba mabanza mitu ove bo tumvutula matondo mu mambu katuvangilanga. (1 Samueli 1:12, 15) Tubika vanganga minsambu mikula mwigi kukimonisa va meso ma batu, dedi minlongisi mi luvunu baba vanganga minsambu mikula Yesu katubila. (Luka 20:46, 47) Yave katambulanga ko minsambu mi phila ayoyo. Vayi dyambu tufweti vanga, kunsambila mu ntima woso.

14. Khumbu zikwa tufweti sambidilanga ayi mbi tulenda longuka mu matedi Yave?

14 Khumbu zikwa tufweti sambilanga? Yave wutudinda tuyolukanga yandi thangu zyoso. Diawu Kibibila kintubila: “Lusambila,” “Lutatamana mu sambila,” “Mu sambilanga mu khambu vonga.” (Matai 26:41; Loma 12:12; 1 Tesalonika 5:17) Yave wukubama kadi mu kuwilukila minsambu mitu. Tulenda kuntonda lumbu ka lumbu mu luzolo kadi mu befu ayi mu byuma byoso katuvananga. Tulenda dinda, katukyeba, katuvana mangolo  ayi katutwadisa. Befu kuvwanga nkinza mu lwaku lu kusambila, tulenda kolukanga yandi thangu zyoso.

15. Kibila mbi tufweti vutudila “amem” ku tsuka nsambu?

15 Kibila mbi tufweti vutudila “amem” ku tsuka nsambu? “Amem” yinsundula, ti tukikinini “ngete” ove “buawu bufweni bela.” Ayi phila mvandi yimonisina mabanza mitu ma tsi ntima ti tuvitikidi mu bukyedika mambu tube dinda kwidi Nzambi mu nsambu. (Minkunga 41:13) Kibibila kibwe tuba tuvutudilanga “amem” mu mbembu yinangama ove ku tsi ntima ku tsuka nsambu wuvengi mutu wunkaka, mwingi tumonisa mvandi ti tuvitikidi mambu kabe dinda kwidi Yave mu nsambu.1 Lusansu 16:36; 1 Kolinto 14:16.

ZIPHILA NZAMBI KANTAMBUDILANGA MINSAMBU MITU

16. Bukyedika ti Yave wuntambudilanga minsambu mitu? Sudikisa.

16 Bukyedika ti Yave wuntambudilanga minsambu mitu? Ngete, wuntambudilanga. Kibibila kintuba matedi Nandi: “Ngeyo weti kuwa lusambulu.” (Minkunga 65:2) Yave wunkuwanga ayi wuntambudilanga mu ziphila ziwombo minsambu mi mafunda ma batu ba kundindilanga mu bukyedika.

17. Bwidi Yave kansadilanga zimbasi ayi zikhomba mwingi kutusadisa mu malema?

17 Yave wunsadilanga zimbasi ayi bisadi byandi va ntoto mwingi katambudila minsambu mitu. (Ebeleo 1:13, 14) Bawombo bandindanga lusadusu kwidi Yave mwingi bavisa buboti Kibibila. Mu thangu yilwelo, Zimbangi zi Yave baba tombulwanga mu zinzo mwingi kubalongisa Kyedika. Kibibila kimmonisa ti zimbasi mvawu batusadisanga mu kisalu ki kusamuna “nsamu wumboti” mu nza yimvimba. (Tanga Nzaikusu 14:6.) Yave mvandi wunsadilanga zikhomba mwingi batusadisa mu malema. Kibila befu  bawombo tumana baka lusadusu lu zikhomba mu mambu tudinda mu lusambulu kwidi Yave.Zingana 12:25; Yakobi 2:16.

Yave kalenda sadila zikhomba zinkaka mu kimvuka mwingi kutambudila minsambu mitu

18. Bwidi Yave kansadilanga phevi’andi ayi Kibibila mwingi kutambudila minsambu mitu?

18 Yave mvandi wunsadilanga phevi’andi yinlongo mwingi katambudila minsambu mitu. Befu kutomba lusadusu lwandi, Nandi wunsadilanga phevi’andi yinlongo mwingi yi tutwadisa ayi yi tukindisa. (2 Kolinto 4:7) Kibibila, phila yinkaka Yave kantambudilanga minsambu mitu. Wunsadilanga Kibibila mwingi katusadisa kuba ndwenga bo tumbaka makani. Tulenda baka lusadusu bo tuntanganga Kibibila. Yave kalenda kutusadisa mu mvutu wukhomba kamvana mu zikhutukunu zi kimvuka. Kalenda sadila bakhulutu ba kimvuka mwingi batukindisa mu malongi ma Kibibila.Ngalatia 6:1.

19. Kibila mbi khumbu zinkaka Yave kakhambu fika tambudilanga minsambu mitu?

19 Ḿba tulenda kuyikuvusa: ‘Kibila mbi Yave kakhambu fika tambudilanga minsambu myama?’ Fweti zaba ti Nandi zebi thangu kafweti tambudila mambu wukundinda. Kibila zebi byuma tuvwidi nkinza. Khumbu zinkaka kambikilanga thangu mwingi kamona lufyatu twidi mu Nandi. Ayi ti tuntomba lusadusu beni vo ndamba. (Luka 11:5-10) Khumbu zinkaka Yave wuntambulanga minsambu mitu mu phila tube khambu sila kivuvu. Tulenda dinda lusadusu mu mambu ma phasi tummona mwingi Yave katuvana mangolo ma kukindimina mu ziphasi beni.Tanga Filipi 4:13.

20. Kibila mbi tufweti sambilanga Nzambi thangu zyoso?

20 Bukyedika lwaku lunneni beni twidi kufikamanga Yave mu lusambulu! Tulenda ba lufyatu ti nandi wutuwilukilanga. (Minkunga 145:18) Buna bu tunzibudila Nzambi ntim’itu mu lusambulu, buawu buna kikundi kitu mu Nandi kimbwedila kukinda.