Skip to content

Skip to table of contents

Zimbangi zi Yave

Select language Ibinda

 KYUVU 1

Minu Yidi Nani?

Minu Yidi Nani?

NKINZA MBI KUYIKUVUSA

Kuyizaba ngye veka ayi mambu wunkikininanga, malenda kusadisa kubaka makani ma ndwenga bo wumonokono ziphukumunu.

MBI WULENDA VANGA?

Yindula kifwani akiki: Carina widi mu kuvyokisa nkungi wudya ayi wunwa, bo va vyoka kumi di minutu wuyuwa mbembo yi mutu kazebi.

“Mbi wunsala akuku?”

Carina bo kabaluka kumbusa, wumona nkundi’andi Jéssica na mintutu myodi mi malavu mizibuka. Jéssica wumvana ntutu wu malavu, bosi wunkamba: “Hum, wantuba ti wunwanga ko malavu?”

Carina wuntomba kumanga vayi Jéssica bo kadi nkundi’andi wu luzolo, kasintomba ko kannata bubi ayi zebi mvandi ti Jéssica mutu wumboti. Carina wuyindula, ‘boti nandi wunnwa, minu mvama yilenda kwama kunwa vasi ko dyambu dimbi. Ah, ntutu kwandi wumweka to yinnwa. Ayi mawu masi ko buka zitsunga voti bilongo bimvunzulanga ntu.’

Boti ngyewu Carina, khanu mbi wuvanga?

YINDULA

Mwingi wubaka makani mamboti mu mambu amomo, ngyewu fweti kuyizaba. Mansundula kukifyongunina mu ntim’aku ti mambu wuntomba kuvanga mawu mafweni mu luzingu lwaku voti ndamba. Ngye kuba luzabu alolo, wulendi bwe bikila ko bankaka banatisa luzingu lwaku.​—1 Kolinto 9:26, 27.

Bwidi wulenda bakila mangolo? Kuvutula byuvu abibi, yilenda ba thonono yimboti.

Mutu wukizebi buboti, widi banga nti widi zinganzi zikota beni mu ntoto, bivuka banlembakananga

 1 MAMBU MBI YIDIDI MANGOLO?

Ngye Kuzaba mambu wididi mangolo, wala bwela ba lufyatu mu ngyeveka.

KIFWANI KI KIBIBILA: Mvwala Polo wusonika: “Ndisi [zaba ko koluka buboti] vayi nzayilu yidi yama. (2 Kolinto 11:6) Mu ndwenga Polo kaba mu matedi Kibibila, nandi wukindama bo bankaka babanthota. Ayi kasa bikila ko mvandi mambu mambi babantubila ma vongisa makani mandi.​—2 Kolinto 10:10; 11:5.

WUKIYINDULA: Sonika va wanda fisu voti kyoso kwa kisalu wuzebi kuvanga mu luzingu lwaku.

Sonika khadulu yimboti widi dedi. (Ngye, wumvwanga bankaka nkinza? wisi ko bwimi? widi mutu wu lufyatu? wumvitilanga mu thangu?)

2 MAMBU MBI YIDIDI YILEBAKANA?

Buka nsinga widi ngolo wulenda tabukila vama va lwala, mawu malenda monika ngye kubikila khadulu yimbi yi yadila luzingu lwaku.

KIFWANI KI KIBIBILA: Mvwala Polo wuzaba mambu mbi kabela wulebakana diawu kasonikina: “Bila ku tsi’ama ntima, khini ndieti mona mu Mina mi Nzambi. Vayi Mina minkaka ndieti mona mu binama biama; mina miomi mieti nuanisa mina mi diela diama ayi mieti ku khitula mvika wu mina mi masumu madi mu binama biama.”​—Loma 7:22, 23.

WUKIYINDULA: Kifu mbi wuntomba kununga mu luzingu lwaku?

 3 MAKANI MBI YIDI?

Bwisi ko buvungisi ayi kusakinina zimbongo, kumaka mu taxi yeka dinda mutu wunnata yawu mudyengilanga kwandi vama vamweka ti gasolina yoso yimmana mu dikalu?

Mbi tulenda longuka? Makani mansadisanga mutu kazaba ma kuvanga mu luzingu. Makani mvandi madi buka mutu wuzebi kuma kankwenda ayi nzila kafweti vyokila mwingi kavitila kuna.

KIFWANI KI KIBIBILA: Polo wusonika: “Diawu bo yindumanga zithinu, kadi sia ti mu phamba.” (1 Kolinto 9:26) Mawu, mammonisa ti mvwala Polo kasa bika ko byuma bi nza binatisa luzingu lwandi, vayi wutsikika makani mu mambu kafweti sadila mu luzingu.​—Filipi 3:12-14.

WUKIYINDULA: Sonika va wanda mambu matatu wuntomba kuvanga kutona bubu ti mvu wunkwiza.

4 MAMBU MBI YINKIKININANGA?

Mutu wukizebi buboti, widi banga nti widi zinganzi zikota beni mu ntoto, bivuka banlembakananga

Kukhambu lufyatu mu makani maku, mbonosono ti wisa yizaba ko buboti ngyefeka ayi wala vukumuka mu zinzila zi bankaka dedi lungwenu wumbaluka ndimbu.

Ngye kuba lufyatu mu makani wumbaka ayi mu khambu landakana mambu bankaka bamvanga, wala ba nsika mu luzingu lwaku.

KIFWANI KI KIBIBILA: Mu bu mwana, mbikudi Danieli wusadila makani mandi bo katumamana minsiku mi Nzambi kheti mu kukhambu ba va kimweka na dikanda. (Danieli 1:8) Bo kama sadila nandi wumonisa lukwikumu mu makani mandi. Danieli wuzingila mu makani mandi.

WUKIYINDULA: Mambu mbi ngye wuntelanga mana? Wuntelanga mana mu Nzambi? Mu kibila mbi? Mbi bikuvangusa kukikinina ti Nzambi widi?

Ngye widi lufyatu ti zithumu zisonga zi Nzambi zididi mwingi zi kusadisa? Mu kibila mbi?

Mu mambu moso mazaba​—ngye tidi kuba dedi dyeza dimvevumuka voti dedi nti widi na zinganzi zi kota mu ntoto phemo kanlembakananga? Ngye kuba lufyatu mu makani wumbaka, muna wala ba dedi nti tundedikisa ayi mala kusadisa kuvutula mvutu mu kyuvu akiki, Minu Yidi Nani?