Skip to content

Skip to table of contents

Zimbangi zi Yave

Select language Ibinda

 DILONGO 51

Namani ayi Mwana Nkyeto Mwisi Isaeli

Namani ayi Mwana Nkyeto Mwisi Isaeli

Sili tsi yiba kalanga mwana finkyeto mwisi Isaeli batatula ku divula diba matata mandi. Masodi ma basi Sili bayiba mwana beni. Kuma bannata, nandi wutona kusadila banga mvika ku nzo Namani, mfumu masodi ma basi Sili. Ku tsi beni, kwisa ba ko ni mutu wumweka waba bwongiminanga Yave. Nandi veka to.

Namani wuyiza bakana kimbevo ki ngolo bantanguninanga bwazi. Mwana beni fyaba tomba kusadisa mfumu’andi diawu kakambila nkazi’andi: ‘Tala, minu yizebi mutu wulenda sadisa nnuni’aku mwingi kabeluka. Ku Isaeli kwidi mbikudi wu Yave bantanguninanga Elisa. Bukyedika nandi kalenda sadisa nnuni’aku.’

Nkyeto Namani wuzabikisa nnuni’andi mambu mwana beni kankamba. Namani ziphasi zisabila ngolo, wuyenda katombula nzo yi mbikudi Elisa ku Isaeli. Namani bo kaba mfumu yinneni, waba telimina Elisa mwingi kiza ndengana ayi kasolula yandi. Vayi Elisa wutuma nsadisi’andi mwingi kakamba Namani mambu amama: ‘Yenda ti ku  mwila Yolidani ayi fweti bwama muna sambwadi di zikhumbu, mwingi wubeluka.’

Namani kasa zola ko diyindu beni. Nandi wutuba: ‘Minu yimmwena ti mbikudi wunkwiza thetika myoko ku ntu ayi kutsambidila mwingi yibeluka, vayi bwidi kabwe thumina kabwama mu mwila widi ku tsi Isaeli? Mila midi ku Sili tsi’ami, milutidi mimboti. Mbi kakhambu tubila yivutuka kuna mwingi yiyobila myawu?’ Bukyedika Namani wufwema beni ayi wuba mayindu ma kuvutuka ku nzo’andi!

Bisadi byandi bankamba: ‘A mfumu ngye veka wutubidi ti wulenda vanga dyosokwa dyambu mwingi wubeluka. Kibila mbi wukhambu vangila mambu mbikudi ka kukamba? Masi ko phasi mwingi kuvanga!’ Namani wuba yuwila ayi wuyenda ti mu mwila wu Yolidani mwingi kabwama mu nlangu sambwadi di zikhumbu dedi bo bankambila. Bo kabasika mu nlangu khumbu yi tsuka, nandi wumona mu bukyedika ti kimbevo kyandi kibeluka. Nandi wuyangalala beni ayi wuyenda mwingi kavutudila mbikudi Elisa matondo. Namani wutuba: ‘Minu bubu yima zaba ti Yave nandi to Nzambi yikyedika.’ Wulenda yindula mayangi mwana wu nkyeto wu Isaeli tube tubila va thonono kamona bo Namani kavutuka ku nzo’andi mu buvinya?

“Ngeyo wutambula nzitusu’aku mu miunu mi bana balezi ayi nate mu muinu mi bana batsombi.”​—Matai 21:16