Skip to content

Skip to table of contents

Zimbangi zi Yave

Select language Ibinda

 DILONGO 96

Yesu Wusola Sawuli

Yesu Wusola Sawuli

Sawuli wuba mwisi Loma wubutukila ku Talisi. Nandi wuba Mfalisi ayi wuzaba beni minsiku mi basi Yuda. Vayi nandi waba lendanga baklisto. Nandi mvandi waba kukanga baklisto mu zi nzo ziawu mwingi kubanata ku buloku. Bo nkangu batu bavonda nlandikini Stefano mu mamanya, Sawuli kasa vanga ko ni kyuma.

Sawuli wuba beni kimbeni mu baklisto, buawu kaba tombila kukanga baboso kubika to bo baba zingilanga ku Yelusalemi. Waba tomba mvandi kukanga baklisto baba ku divula di Damasi ayi wuyuvula Nganga Nzambi ti kalenda kwandi kwenda kuna mwingi kuba kanga. Thangu Sawuli kaba fikama divula beni, mwinda wu ngolo wulesuka mu meso mandi, ayi wubwa va tsi. Sawuli wuyuwa mbembo yituba: ‘Sawuli, mu kibila mbi wulembo ndandikina?’ Sawuli wunyuvula: ‘Nani ngyewu?’ Nandi wiza tuba: ‘Minu Yesu. Minu yitidi ngye wenda ku Damasi, kuawu wala zabila ma fweti vanga.’ Muna thangu beni, Sawuli wufwa meso, ayi batu bansimba mu koko mwingi kumvitisa ku divula di Damasi.

Ku Damasi kube kalanga nlandikini wuba kiminu kikinda baba tanguninanga Ananiasi. Yesu wumonikina Ananiasi mu kimona meso ayi wunkamba: ‘Yenda ku nzo yi Yuda mu zila yi lubakala, ayi bila Sawuli.’ Ananiasi wiza tuba: ‘Minu yinkuwanga beni matedi nandi! Nandi lembu tomba fidisa baklisto baboso mu buloku!’ Vayi Yesu wumvutudila: ‘Yenda kwidi nandi. Bila minu yima sola Sawuli mwingi kalonga zitsangu zimboti mu zi tsi ziwombo.’

Ananiasi wuyenda vaba Sawuli ayi wunkamba: ‘Sawuli khomb’ami, Yesu nandi ma kumfila mwingi yiza zibula meso maku.’ Mu thangu beni, Sawuli wutona kumona. Sawuli wubwela longuka matedi Yesu ayi wuyiza ba mvandi nlandikini wu Yesu. Bo kabotama, Sawuli wutona kulonga mu zi nzo nzambi ayi baklisto banka. Wulenda yindula nganzi basi Yuda  baba mu kumona Sawuli wunlonga matedi Yesu? Bawu ba yituka: ‘Bakana nandi ko wubedi kimbeni kiwombo mu minlandikini mi Yesu ayi wuba tomba kuba tula mu buloku?’

Sawuli wulonga batu baba kalanga ku Damasi mu mimvu mitatu. Vayi ba Yuda ba wala nganzi mu nandi ayi bayiza ba mayindu ma kumvonda. Thangu zikhomba zi kimvuka bazaba mawu, bawu batinisa Sawuli. Bantula mu kiphanyi kinneni ayi bankulula mu dibulu diba mu luphangu lu divula di Damasi.

Thangu Sawuli katuka ku Yelusalemi, nandi wumeka kufikama zikhomba ziba kuna vayi bawu boma baba kummona. Nlandikini wumweka baba tanguninanga Balinabasi, wunata Sawuli kwidi bapostolo bankaka mwingi kaba monisina ti bukyedika Sawuli wubalula mavanga mandi. Muna thangu beni, Sawuli wutona kulonga zitsangu zimboti na zikhomba zi kimvuka kiba ku Yelusalemi. Buvyokila thangu, nandi wuyiza zabakana Polo.

‘Yesu Klisto wuyiza va nza mu dyambu di vukisa bankwa masumu. Mu bawu boso minu ndidi nsumuki wutheti.’​—1 Timoteo 1:15