Skip to content

Skip to table of contents

Zimbangi zi Yave

Select language Ibinda

 DILONGO 100

Polo ayi Timoteo

Polo ayi Timoteo

Timoteo wuba ditoko mu kimvuka ki Listila. Tat’andi wuba mwisi Ngelese, vayi mam’andi wuba mwisi Yuda. Bo kaba mwana kilezi, buawu khai’andi Loyisi ayi ngudi’andi Ewunise, batona kunlonga matedi Yave.

Bo Polo mu khumbu yimwadi kayenda mwingi kulonga mu zitsi zinkaka, nandi wuvyokila ku kimvuka ki Listila ayi wumona ti Timoteo wuba luzolo luwombo mu zikhomba ayi wuba kuba sadisanga. Polo wutumisa Timoteo mwingi kanlandakana mu kisalu ki kutala bimvuka. Mvwala Polo wukubika buboti Timoteo mwingi kaphisuka mu kisalu ki kusamuna ayi kulonga zitsangu zimboti.

Pheve yinlongo yidyatisa Polo ayi Timoteo mu bibwangu byoso bavyokila. Va bwilu bunkaka, mu ndosi mvwala Polo wulota dibakala dimweka mwisi Makedonia wuba dinda bavyokila kuna mwingi baba sadisa. Polo, Timoteo Sila ayi Luka bayenda kuna kuba longa ayi kuzibula kuna kimvuka kimona.

Ku Tesalonika divula dinkaka di Makedonia, babakala ayi bakyeto bawombo mvandi bakikinina kuba minlandikini mi Klisto. Vayi basi Yuda bankaka nsoki baba mu Polo ayi bakundi bandi. Batu beni bavanga dingumba dinneni, bayiza kanga Polo ayi bakundi bandi ayi baba nata kwidi zimfumu zi Loma. Bawu baba katendukanga: ‘Batu ababa badi zimbeni zi ntinu wu Loma!’ Polo ayi Timoteo bo bamona ti nsoki wuwombo baba kuba mona va divula beni, diawu va bwilu batinina ayi bayenda ku Belea.

Batu ku Belea, basi Yuda ayi basi Ngelese phwila yiwombo baba yi kulonguka zitsangu zimboti ayi bawombo mu bawu bayiza ba baklisto. Vayi bo bamona basi Yuda bafumina ku Tesalonika, batona dyaka kuba twadisila mambu, Polo wubotuka vana wiza kwenda ku Atene. Vayi Timoteo ayi Sila basyala ku Belea mwingi kubwela kindisa kiminu ki zikhomba. Buvyokila thangu, Polo wudinda Timoteo mwingi kavutuka ku Tesalonika ayi kasadisa zikhomba ziba kuna mwingi  bakindama mu batu baba kuba landakana beni. Polo mvandi wubwe tuma Timoteo katala ayi kakindisa bimvuka binkaka.

Polo wukamba Timoteo: ‘Baboso batidi kusadila Yave bala kuba landakana kwidi bankwa mambi.’ Timoteo wukota mu buloku mu kibila ki kiminu kyandi. Vayi nandi wuba beni mu mayangi, kibila yiba buka phila kalenda monisina luzolo lwandi kwidi Yave.

Polo wusonikina zikhomba mu kimvuka ki Filipi: ‘Yiku lufila Timoteo. Nandi wunkwiza mulongisa mbi binsundula kudyatila mu nzila yi kyedika ayi wunkwiza lukubika buboti bu kuvangila kisalu ki kusamuna.’ Polo wuba lufyatu luwombo mu Timoteo. Bawu basala va kimweka mimvu miwombo ayi bayiza ba kikundi ki ngolo.

“Bila kuisi ko mutu wunkaka kuaku, botula kaka niani, widi mayindu banga mama ayi wukulubelanga mayindu mu dyambu di mambu meno. Bila bawu boso bantombanga mamboti mawu veka vayi bika mamboti ma Yesu Klisto.”​—Filipi 2:20, 21