Skip to content

Skip to table of contents

Zimbangi zi Yave

Select language Ibinda

 DILONGO 98

Baklisto Batyamuka mu Bibwangu Biwombo

Baklisto Batyamuka mu Bibwangu Biwombo

Bapostolo batumamana nswa Yesu kabavana wu kutyamuna zitsangu zimboti mu ntoto woso. Mu mvu 47 mu thangu yi Yesu, zikhomba baba kalanga ku Antiokia bafila Polo ayi Balinabasi mwingi balonga. Polo ayi Balinabasi bayenda ayi balonga mu bibwangu biwombo dedi Azia, Delebe, Listila ayi Ikone.

Polo ayi Balinabasi balonga mambu matedi Klisto kwidi batu boso, balonga bisina ayi bakhambulu zimbongo, matoko ayi biboba. Mu kisalu beni bavanga, bawombo bakikinina kyedika kitedi Klisto. Mu thangu Polo ayi Balinabasi balonga Selengio Paulu mfumu divula di Sipeli, ndoki yimweka waba tomba kuba kandikila. Vayi Polo wukamba ndoki beni: ‘Yave kasi ko ku khonzo’aku.’ Muna thangu, ndoki beni wiza fwa meso. Mfumu yi divula di Sepeli bo kamona mambu amomo, wisa kikinina kuba nlandikini wu Yesu.

Polo ayi Balinabasi balonga mu bibwangu byoso, bawu balonga nzo ka nzo, mu zinzila, ayi mu zinzo zi zikhutukunu. Mu thangu babe vyoka divula di Listila, bawu ba belusa dibakala dimweka wubela malu tona kabutuka. Batu bo bamona kimangu beni, baba tomba kubwongimina voti kuzitisa Polo ayi Balinabasi buka zinzambi. Vayi bawu baba kamba: ‘Zitisanu Nzambi! Bila befo twidi batu buka benu!’ Mu thangu beni, basi Yuda bayiza vana ayi batona kutubila Polo ayi Balinabasi bubi. Bawu bakuba Polo mamanya ayi bambasisa ku nganda divula di Sipeli. Vayi Polo kasa fwa ko! Mu thangu beni, bakhomba bayiza mwingi bansadisa ayi bannata dyaka ku divula di Sipeli. Bosi Polo wuvutuka ku Antiokia.

Mu mvu 49 mu thangu yi Yesu, Polo wubasika mu khumbu yi mwadi mu kisalu ki kulonga. Nandi wuvutukila theti zikhomba kalonga ku  khonzo yi Azia, bosi wutyamuna zitsangu zimboti mu zitsi zi Europa. Nandi wuyenda ku Atene, Efeso, Filipi, Tesalonika ayi bibwangu binkaka. Sila, Luka ayi ditoko bantanguninanga Timoteo, bayenda ayi Polo. Bawu basadila va kimweka mwingi kuzibula ayi kukindisa bimvuka. Bosi Polo wukala theti ku Kolinto mvu wumweka ayi ndambu mwingi kukindisa zikhomba. Nandi wulonga ayi wusonika minkanda kafila mu bimvuka biwombo. Nandi mvandi wuba vanganga biteva kaba sumbisanga. Bosi wubwe vutuka ku Antiokia.

Mu mvu 52 mu thangu yi Yesu, Polo wubasika mu khumbu yintatu mwingi kalonga. Nandi wutona kulonga ku khonzo yi Azia, wutombuka ku Filipi bosi wukuluka ku Kolinto. Polo wukala ku Efeso bilumbu biwombo, waba longanga zitsangu zimbote, wubelusa batu ayi wukindisa kimvuka. Nandi mvandi wuba kwendanga lumbu ka lumbu va nganda yi kikola mwingi kulonga batu. Bawombo bayuwa malongi beni ba balula mavanga. Bo kamana longa zitsangu zimbote mu bibwangi biwombo, bosi wisa vutuka ku Yelusalemi.

“Yendanu, lukitula batu ba zitsi zioso minlonguki miami.”​—Matai 28:19