Skip to content

Skip to table of contents

 DILONGO 87

Bidya bi Tsuka bi Yesu

Bidya bi Tsuka bi Yesu

Kadika mvu basi Yuda baba vanganga nkungi wu Pasika mu kilumbu 14 mu Ngondi yi Nisa. Baba vangilanga nkungi beni mwingi kutebuka moyo kilumbu Yave kaba kula mu buvika ku Ngipiti ayi kaba nata ku Ntoto Kaba Kubikila. Mu mvu 33, Yesu ayi minlonguki myandi, bakemba nkungi wu Pasika ku khati nzo yimweka ku Yelusalemi. Bo bamanisa kudya, Yesu wiza tuba: ‘Wumweka mu benu, we kuphakusa’. Bawu bayituka ayi bayuvula: ‘Buna nani?’ Yesu wuvutula: ‘Mutu nono yemvana dipha didi’. Wiza vana kitini ki dipha kwidi Yuda Isikalioti. Muna thangu beni, Yuda wiza telama ayi wubasika kwandi.

Bo Yuda kabasika, Yesu wiza bonga dipha, wusambila ayi wubukuna dyawu. Wiza vana kwidi minlandikini myandi. Ayi wuba kamba: ‘Dyanu dipha adidi, kibila diawu dinsundula nyitu’ama yemvana mu kibila kinu’. Wubonga mvandi mwa vinu, wusambila ayi wiza vana kwidi minlonguki myandi. Wiza tuba: ‘Nwanu vinu ayiyi, kibila yawu yinsundula menga mami ndye mvana mwingi mubaka nlemvo wu masumu minu. Minu ndilukanikisa ti benu lwela ba Mintinu ku diyulu. Vanganganu mawu kadika mvu mwingi lumbambukilanga moyo.’ Nate bubu minlandikini mi Yesu bamvanganga mawu kadika mvu mu kubambuka moyo mo Yesu kavanga mu befu. Zebi bwidi bantedilanga lukutukunu beni Yesu kavanga? Bidya Bimfumu va Masika ma Bwilu.

 Bo bamanisa, minlonguki mi Yesu batona kuyambila voti kuvutasana baveka nani wuluta nkinza. Vayi Yesu wubakamba: ‘Woso lutudi nkinza mu benu, muna bika kakituka denga mwana kilezi ayi woso tidi kutuma kafweti ba kisadi ki bankaka.’

‘Yesu wubakamba dyaka: ‘Benu mwidi bakundi bama. Yima lukamba mambu moso Tat’ami katidi yi lukamba. Fyoti fisyedi mwingi yivutuka kwidi Tat’ami ku diyilu. Benu kumonasananga luzolo, buawu batu bela zabila ti lwidi minlonguki myama. Diawu benu lufweti zolasananga dedi bo minu yi muzodilanga.’

Bo kamana kubakamba mawu, Yesu wudinda mu nsambu kwidi Yave mwingi kakyeba minlonguki myandi myoso ayi kaba sadisa basala va kimweka mu ngwizani. Yesu mvandi wusambila mwingi batu mu nza yimvimba bazaba dizina di Yave. Zebi mbi bavanga bo babasika ku khati nzo baba? Bawu bayimbila minkunga kwidi Yave. Vayi thangu yiba fikama mwingi bakanga Yesu.

‘Bika kumona boma, ngewu nkangu wu mamemi! Kibila Tat’inu mweni khini mu kuluvana kimfumu.’​—Luka 12:32