Skip to content

Skip to table of contents

Zimbangi zi Yave

Select language Ibinda

 DILONGO 83

Yesu Wulikila Nkangu Batu

Yesu Wulikila Nkangu Batu

Ava Pasika yi mvu 32, bapostolo bavutuka mu kisalu ki kusamuna. Bawu baba beni bavonga. Diawu Yesu kabakila makani ma kuba nata mu dikumbi ti ku Betezayida mwingi bavunda nkadu. Vayi bo dikumbi dituka va disimu, Yesu wubakula ti nkangu batu wuba kubalandakana. Nandi wubetomba kukala nafeka ayi minlandikini myandi, vayi wuvanga mangolo mu kusadisa batu beni. Nandi wubelusa baba bela ayi wulonga batu kilumbu kyoso matedi Kintinu ki Nzambi. Bo bwisi buba kwila, bapostolo bayiza kwidi nandi ayi bankamba: ‘Batu boso bobo, ḿba nzala bammona. Mbote wuba kamba benda kuawu mwingi batomba bidya.’

Yesu wubakamba: ‘Kibila mbi bafweti kwendila, wubavananu bidya!’ Bapostolo bayuvula Yesu: ‘Wuntomba twendi bwingi tuba sumbila mapha badya?’ Wumweka mu bapostolo babe tangininanga Filipi, wutuba: ‘Twisi ko zimbongo ziwombo mwingi kusumba mapha mafweti dya nkangu wu batu boso.’

Yesu wuyuvula: ‘Mbi bidi yitu mwingi kudya?’ Andele wutuba: ‘Mapha matanu to madi yitu ayi mfu wadi. Vayi zilendi fwana ko.’ Yesu wutuba: ‘Twalanu mapha ayi zifu beni.’ Nandi wukamba bapostolo ba kubika batu beni mu mangumba ma 50 ayi 100 li batu. Bosi Yesu wubonga mapha ayi zimfu beni, wuvumbula meso ku yilu ayi wusambila. Bo kamana sambila, wutambika mapha ayi zimfu beni kwidi bapostolo mwingi bakabila nkangu batu beni. Baba 5.000 di babakala, bakyeto ayi bana  balezi, badya bidya beni ayi bayukuta. Bosi bapostolo bakongola bidya bisobila, mwingi bi bika bungana ayi babaka 12 di biphani. Bukyedika, maba mangitukulu manneni. Bakana buawu ko?

Batu bayangalala beni ayi baba tomba kubyeka Yesu ntinu. Vayi Yesu wuzaba ti yisa ba ko thangu Yave kafweti kumbyeka buka ntinu. Yesu wukamba batu ba vutuka mu zinzo zyawu ayi wukamba bapostolo bandi basabuka ku disimu dinkaka di ḿbu Ngalili. Bawu bamaka mu dikumbi ayi Yesu wuyenda va mbata mongo nafeka. Kibila mbi? Mwingi kasambila Tat’andi ku diyilu. Wummona, Yesu wuba kifu ki kusambila, kheti bisalu biwombo biba yandi bi kuvanga!

“Lusala, bika sia ti mu diambu di bidya bieta bola vayi mu diambu di bidya biobi binzingilanga nate mu luzingu lukalumani, biobi Muana Mutu kela kuluvana.”​—Yoane 6:27