Twanlonguka matedi mwana wumweka wu ditoko wuvukisa luzingu lu ngudi’andi nkazi. Nandi wuba mwana nkazi wu Polo. Twisa zaba ko dizina dyandi kibila disa sonama ko mu Kibibila vayi tuzebi ti wumonisa mangolo mu mambu kavanga. Ngyewu, tidi kuzaba ma kavanga?—

Polo wuba mu buloku ku Yelusalemi. Baǹtudila mu buloku kibila wusamuna matedi Yesu. Babakala baǹkaka babasa tyanga ko Polo, diawu batombila kumvangila mambu mambi. Bawu batuba: ‘Ndokwanu tudinda mfumu masodi mwingi katuma masodi banata Polo kunzo yi lufundusu. Befu twaǹswama mu ndeko nzila, mwingi tuvanga mambu mambi Polo bo kamvyoka!’

Mwana nkazi wu Polo wuyiza zaba mabanza mawu mambi. Zebi mbi kavanga? Nandi wuyenda ku buloku kuba Polo ayi wuǹkamba mamoso kayuwa. Mu ntangu beni, Polo wuǹkamba kazabikisa mawu kwidi mfumu masodi. Mu mbwenu’aku diba dyambu di lwelo Mwana nkazi wu Polo kukamba mfumu masodi mambu beni?—Disa ba dyambu di lwelo ko mu mwana nkazi wu Polo, kibila mfumu masodi wuba muntu wuluvalu. Vayi Mwana nkazi wu Polo wumonisa mangolo mu kukamba mfumu masodi mambu beni.

Mfumu masodi wuzaba ma kuvanga. Nandi wu nkupika nanga 500 di masodi mwingi bakyeba Polo! Mo mu bwilu beni nandi wuba kamba mwingi banata Polo ku Sezale. Babakala beni baba miǹtima mimbi, bavonda Polo?— Mambu baba tomba kuvanga basa be mavanga ko. Ove mabanza mawu mafuba.

Mbi wulenda longuka mu mambu amomo?— Ngye wulenda ba mangolo dedi Mwana nkazi wu Polo. Befu boso zingolo tuǹtombilanga mwingi tusolula na bantu baǹkaka mu matedi Yave. Ngyewu, wala ba mangolo mwingi kukindama mu kusolula na bantu mu matedi Yave?— Ngye kumavanga wala vukisa myela mi bantu.