Skip to content

Skip to table of contents

Zimbangi zi Yave

Select language Ibinda

 MALONGI 6

Davidi kasa ba ko boma

Davidi kasa ba ko boma

Mbi wumvanganga bo ti boma widi?—Ḿba ngyewu weta dinda lusadusu kwidi tata voti mam’aku. Angi vadi muntu wuǹkaka wulenda kusadisa. Nandi lutidi mangolo mu bantu boso. Ngyewu zebi nani tuǹtubila?— Buawu, Yave. Twaǹlonguka matedi mwana ditoko dimweka Kibibila kaǹtubila, baǹtedilanga Davidi. Nandi wuzaba ti Yave kalenda kuǹsadisa mu mamoso, diawu kankambu bela boma.

Tona mu bumwana, Davidi banlongisa kwidi matata mandi kuba luzolo mu Yave. Mawu masadisa Davidi kunkambu ba boma nketi mu byuma biǹkaka bilenda kuǹsusula. Davidi wuzaba ti Yave ǹkundi’andi ayi wulenda kuǹsadisa. Kilumbu kiǹkaka bo kaba vunga mamemi, nkosi yimweka yimonika vana, wubwila mwana dimemi mu munu! Zebi mbi kavanga? Nandi wuduma kumbusa nkosi beni ayi wuvonda yawu mu fizika! Bo kilumbu kiǹkaka wulusu katomba vonda mamemi, nandi wuvonda yawu! Mu mbwenu’aku nani zabizi wusadisa Davidi?— Nyinga, Yave.

Nkumbu yiǹkaka Davidi wutomba mangolo mwingi ka kindama. Basi Isaeli baba mu mvita na Bafilistea. Disodi di mweka di Filistea diba dibakala dizangama beni baba tanguninanga Ngoliati. Ngoliati beni waba seva masodi ma Isaeli ayi Yave. Vayi masodi moso ma Isaeli, baba boma buwombo mu Ngoliati. Nandi wufyesa Isaeli ti, vasi ko muntu wulenda nunga va meso mandi. Bo Davidi kayuwa mawu, nandi wuvutudila Ngoliati: ‘Tala, minu yiǹwana yaku! Yave wukunsadisa, ayi minu yi kuǹunga!’ Ngye wummwena ti Davidi wumonisa mangolo?— Ngete, nandi wumonisa beni mangolo. Ngyewu tidi kuzaba mbi biyiza monika kuǹtwala?

Davidi wubonga mamanya matanu ayi fizika yi bamvondilanga zinuni. Ayi wuyenda kanwanisa Ngoliati. Bo Ngoliati kamona Davidi, wuǹlenza ayi wuǹseva kibila kaba mwana ditoko. Angi Davidi wuǹkamba: ‘Ngyewu mu mbedi wuǹkwiza nwanina yama, angi minu yi  kukwizila mu dizina di Yave!’ Bo kamana kutuba mawu, nandi wutula dimanya mu fizika, bo kafikama va ba Ngoliati, wuǹkuba dimanya mu nzila yi fizika. Dimanya beni diyenda va mbulu yi Ngoliati! Ngoliati wu bwa va nsi ayi wufwa! Basi Filistea bamona boma ayi batina. Bwidi mwana ditoko dedi Davidi kanungina kuvonda Ngoliati?— Yave wusadisa Davidi, ayi Yave wulutidi mangolo na Ngoliati!

Davidi kasa ba ko boma kibila wuzaba ti Yave wala kuǹsadisa.

Mbi wulenda longuka mu kinongo ki Davidi?— Yave lutidi mangolo mu bantu boso. Nandi ǹkundi’aku. Diawu ngye kuba boma nkumbu ziǹkaka, zaba ti Yave wulenda kusadisa wuba mangolo!

TANGA MU KIBIBILA KYAKU

  • Minkunga 56:3, 4

  • 1 Samueli 17:20-54