Skip to content

Skip to table of contents

Zimbangi zi Yave

Select language Ibinda

 MALONGI 5

Samueli Wutatamana Kuvanganga Masonga

Samueli Wutatamana Kuvanganga Masonga

Tona mu bulezi, Samueli waba zinganga ayi sadilanga ku Nzo yinlongo yi Nzambi, kibwangu bantu baba bwongiminanga Yave. Ngye zebi kibila Samueli kayendila kuna? Nteti, twanlonguka matedi mam’andi Hana.

Mimvu miwombo mivyoka, Hana waba tombanga kubuta mwana, angi ḿbutu wuba wuzibama. Diawu kadindila Yave lusadusu mu nzila yi lusambulu. Nandi wukanikisa Yave ti na kubuta mwana, wala mvana mwingi kazingila ayi kasadila Yave ku nzo’andi yinlongo. Yave wutambudila ǹsambu’andi. Nandi wubuta mwana wu dibakala ayi wumvana dizina Samueli. Bo kadukisa mimvu mi 3 voti mi 4, Hana wuvanga ma kakanikisa, wunata mwan’andi Samueli mwingi kasadila Nzambi ku nzo yinlongo.

Ku Nzo yinlongo yi Nzambi ku kayenda, wudenga Eli nganga Nzambi nkulutu wuba kuna, na bana bandi babwadi. Bawu mvawu baba salanga banga zinganga zi Nzambi. Dedi bo tuma longukila kumbusa, Nzo yinlongo yi Nzambi kiba kibwangu ki kubwongimina Nzambi ayi baboso baba zingilanga kuna, bafweti ba bantu bamvanganga masonga. Angi bana ba Eli baba vanganga mambu ma nkembu masonga. Ayi Samueli waba monanga mambi moso baba vanganga. Samuel, waba vanganga mambu ma nkambu masonga dedi bana ba Eli?—Ḿve, nandi waba vanganga mambu masonga, dedi bo matata mandi banlongisila.

Mu mbwenu’aku, Eli nkanu mbi kavanga mu bana bandi?— Nandi nkanu wuba semba ayi kuba kukisa kusadila ku nzo yinlongo yi Yave. Angi Eli kasa vanga ko mawu, ayi Yave wufwemina Eli na bana bandi. Buawu Yave kabakila makani ma kubunga Eli na bana bandi.

Samueli wuvanga ma Yave kaǹtuma ayi wuzabikisa mawu Eli

Bwilu buǹkaka bo Samueli kaba leka, nandi wuyuwa mbembo yi muntu waba tela: ‘Samueli!’ Samueli wuyenda va ba Eli kibila kabanzila ti Eli waba kuǹtelanga ayi wukamba Eli: Minuk’awu. Angi Eli wumvutudila: ‘Minu yisa kutela ko.’  Mawu mamonikina nkumbu wadi. Diawu Eli kakambila Samueli ti na kube kuwa mbembo beni yi kuǹtela ǹtulu wuǹtatu, muna katuba: ‘Yave, mfumu yoluka kwaku, ka minu yi kukuwa’ ayi Samueli mawu kavanga. Buawu Yave wukamba Samueli: ‘Kamba Eli ti minu yiǹkwiza bunga dikanda dyandi mu kibila ki mambu mambi bamvanga.’ Mu mbwenu’aku, diba dyambu dilwelu kwidi Samueli kuzabikisa Eli maǹkamba Yave?— Ḿve. Samueli wuba boma, angi wuvanga ma Yave kaǹtuma. Mamoso Yave katuba mamonika. Eli na bana bandi babwadi bafwa.

Samueli ǹtungulu wumboti mu befo. Nandi waba vanganga masonga, nketi baǹkaka baba vanganga ma nkambu masonga. Bo ngyewu? Wuǹkwiza landakananga ǹtungulu’andi mu kuvanganga masonga? Ngye kumavanga, wala bika Yave Nzambi mu mayangi ayi matata maku.

TANGA MU KIBIBILA KYAKU

  • 1 Samueli 2:22-26; 3:1-21