Lọ wo ohun tó wà nínú rẹ̀

Lọ wo ohun yíyàn míì

Àwa Ẹlẹ́rìí Jèhófà

Yorùbá

Bahram àti Gulzira ìyàwó rẹ̀

OCTOBER 24, 2016
TURKMENISTAN

Ṣé Wọ́n Máa Dá Bahram Hemdemov Sílẹ̀ Nígbà Tí Ìjọba Bá Tún Ń Dá Àwọn Ẹlẹ́wọ̀n Sílẹ̀?

Ṣé Wọ́n Máa Dá Bahram Hemdemov Sílẹ̀ Nígbà Tí Ìjọba Bá Tún Ń Dá Àwọn Ẹlẹ́wọ̀n Sílẹ̀?

Ní February 2016, ìjọba orílẹ̀-èdè Turkmenistan dá ọgọ́rọ̀ọ̀rún àwọn tó wà lẹ́wọ̀n sílẹ̀, àmọ́ wọn ò dá Bahram Hemdemov sílẹ̀. Nígbà tí wọ́n dá Ọ̀gbẹ́ni yìí lẹ́bi pé ọ̀daràn ni, tí wọ́n sì rán an lọ sẹ́wọ̀n, ó pe ẹjọ́ kòtẹ́milọ́rùn àmọ́ kò tó oṣù mẹ́ta lẹ́yìn náà tí Ilé Ẹjọ́ Gíga Jù Lọ lórílẹ̀-èdè Turkmenistan fi fagi lé e. Ní August 15, 2016, agbẹjọ́rò Ọ̀gbẹ́ni Hemdemov bá a kọ̀wé sí Ìgbìmọ̀ Tó Ń Rí sí Ẹ̀tọ́ Ọmọnìyàn lábẹ́ ìdarí Ìparapọ̀ Àwọn Orílẹ̀-èdè.

Wọ́n Gbógun Ti Àwọn Ẹlẹ́rìí Jèhófà Lórí Ọ̀rọ̀ Ẹ̀sìn ní Turkmenabad

Ibi tí àwọn Ẹlẹ́rìí Jèhófà ti ń ṣe ìjọsìn ní ìrọwọ́rọsẹ̀ nínú ilé Ọ̀gbẹ́ni Hemdemov lórílẹ̀-èdè Turkmenabad ni àwọn ọlọ́pàá ti mú un ní March 2015. Ṣe ni àwọn ọlọ́pàá ya wọ ibẹ̀, wọ́n sì bẹ̀rẹ̀ sí í tú ilé náà láìní ìwé àṣẹ, wọ́n gba àwọn ohun ìní wọn, wọ́n sì ṣe gbogbo àwọn tó wà níbẹ̀ ṣúkaṣùka.

Agbẹjọ́rò Ọ̀gbẹ́ni Hemdemov sọ pé: “Àwọn ọlọ́pàá yọ Bahram Hemdemov sọ́tọ̀, kí wọ́n lè fìyà jẹ ẹ́ gidigidi torí pé wọ́n fẹ́ fi halẹ̀ mọ́ àwọn Ẹlẹ́rìí tó kù tó ń gbé ní Turkmenabad, kí wọ́n sì ṣẹ̀rù bà wọ́n.” Àmọ́ pẹ̀lú bí àwọn aláṣẹ ṣe fojú Ọ̀gbẹ́ni Hemdemov gbolẹ̀ tó, kò yẹ ìgbàgbọ́ rẹ̀.

À Ń Retí Pé Wọ́n Á Dá A Sílẹ̀

Àwọn Ẹlẹ́rìí Jèhófà retí pé ìjọba orílẹ̀-èdè Turkmenistan máa dá Ọ̀gbẹ́ni Hemdemov sílẹ̀ lẹ́wọ̀n láìpẹ́. Wọ́n máa mọrírì rẹ̀ gan-an tí Ààrẹ Gurbanguly Berdimuhamedov bá dá Ọ̀gbẹ́ni Hemdemov sílẹ̀ nígbà tó bá tún ń dá àwọn ẹlẹ́wọ̀n sílẹ̀.

Gulzira, ìyàwó Ọ̀gbẹ́ni Hemdemov àtàwọn ọmọ wọn mẹ́rẹ̀ẹ̀rin ti sàárò rẹ̀ gan-an, gbogbo wọn àtàwọn Ẹlẹ́rìí Jèhófà tó wà nílùú wọn ń retí láti pa dà rí i. Tọ̀wọ̀tọ̀wọ̀ làwọn Ẹlẹ́rìí lórílẹ̀-èdè Turkmenistan ń bẹ ìjọba pé kí wọ́n jẹ́ káwọn máa kóra jọ láti jọ́sìn ní ìrọwọ́rọsẹ̀, láìsí pé àwọn aláṣẹ ìlú ń yọ wọ́n lẹ́nu.