Lọ wo ohun tó wà nínú rẹ̀

Lọ wo àwọn ohun tó wà

Àwa Ẹlẹ́rìí Jèhófà

Yan èdè Yorùbá

 Ẹ̀kọ́ 1

Inú Wa Dùn Láti Mọ Àṣírí Kan

Inú Wa Dùn Láti Mọ Àṣírí Kan

Ǹjẹ́ ẹnì kan ti sọ ọ̀rọ̀ àṣírí fún ẹ rí? * Bíbélì sọ àṣírí pàtàkì kan. Ó pè é ní “àṣírí ọlọ́wọ̀,” nítorí pé Ọlọ́run ló ni àṣírí yẹn, àwọn èèyàn kò sì mọ̀ nípa rẹ̀. Kódà, ó wu àwọn áńgẹ́lì kí wọ́n mọ àṣírí náà. Ṣé ìwọ náà fẹ́ mọ àṣírí yìí?—

Kí lo rò pé àwọn áńgẹ́lì yìí fẹ́ mọ̀?

Ní ọ̀pọ̀ ọdún sẹ́yìn, Ọlọ́run dá ọkùnrin àti obìnrin àkọ́kọ́. Ádámù àti Éfà ni orúkọ wọn. Ọlọ́run fi wọ́n sínú ọgbà kan tó rẹwà, tó ń jẹ́ ọgbà Édẹ́nì. Ká ní Ádámù àti Éfà ti ṣègbọràn ni, àwọn àti àwọn ọmọ wọn ò bá ti sọ gbogbo ilẹ̀ ayé di Párádísè, bíi ti ọgbà tí Ọlọ́run fi wọ́n sí tẹ́lẹ̀. Wọ́n ò bá sì máa gbé títí láé nínú Párádísè. Àmọ́, ǹjẹ́ o rántí ohun tí Ádámù àti Éfà ṣe?—

Ádámù àti Éfà ṣàìgbọràn sí Ọlọ́run, ìdí nìyẹn tí àwa èèyàn kò fi sí nínú Párádísè lónìí. Àmọ́, Ọlọ́run sọ pé òun máa mú kí gbogbo ayé yìí rẹwà, inú gbogbo èèyàn á dùn, wọ́n á sì máa gbé títí láé. Báwo ni Ọlọ́run ṣe máa ṣe é? Fún ọ̀pọ̀ ọdún, àwọn èèyàn kò mọ bó ṣe fẹ́ ṣe é, torí pé àṣírí ni.

Nígbà tí Jésù wá sáyé, ó sọ fún àwọn èèyàn nípa àṣírí yìí. Ó sọ pé Ìjọba Ọlọ́run ni àṣírí náà. Jésù sọ pé ká máa gbàdúrà pé kí Ìjọba yìí dé. Torí tí Ìjọba Ọlọ́run bá dé, ó máa jẹ́ kí ilẹ̀ ayé di Párádísè tó rẹwà.

Ṣé inú ẹ dùn láti mọ àṣírí yìí?— Rántí pé, àwọn tó bá ṣègbọràn sí Jèhófà nìkan ló máa gbé nínú Párádísè. Bíbélì sọ ìtàn tó pọ̀ fún wa nípa àwọn ọkùnrin àti àwọn obìnrin tí wọ́n gbọ́rọ̀ sí Jèhófà lẹ́nu. Ṣé wàá fẹ́ mọ̀ wọ́n?— Ó dáa, jẹ́ ká sọ̀rọ̀ nípa díẹ̀ nínú wọn, àti bí a ṣe lè fara wé wọn.

^ ìpínrọ̀ 3 Nínú gbogbo ìtàn tó wà nínú ìwé yìí, wàá rí àmì dáàṣì (—) lẹ́yìn àwọn ìbéèrè kan. Á dáa kó o dánu dúró níbi tó o bá ti rí i, kí o jẹ́ kí ọmọ rẹ dáhùn ìbéèrè náà.