Lọ wo ohun tó wà nínú rẹ̀

Lọ wo ohun yíyàn míì

Lọ wo àwọn ohun tó wà

Àwa Ẹlẹ́rìí Jèhófà

Yorùbá

Ìwé Ìtàn Bíbélì

 ÌTÀN 57

Ọlọ́run Yan Dáfídì

Ọlọ́run Yan Dáfídì

SÉ O rí ohun tó ṣẹlẹ̀ níbí yìí? Ọmọkùnrin tó ò ń wò yìí ti gba ọ̀dọ́ àgùntàn ọwọ́ rẹ̀ yẹn lẹ́nu béárì. Béárì gbé ọ̀dọ́ àgùntàn náà lọ ó fẹ́ pa á jẹ. Ṣùgbọ́n ọmọkùnrin yìí sá tẹ̀ lé e, ó sì gba ọ̀dọ́ àgùntàn náà lẹ́nu béárì. Ìgbà tí béárì kọjú ìjà sí ọmọkùnrin yìí, ó gbá béárì náà mú ó sì lù ú pa! Àkókò kan tún wà tí ọmọkùnrin yìí gba ọ̀kan nínú àwọn àgùntàn rẹ̀ lẹ́nu kìnnìún. O ò rí i pé onígboyà ọmọ ni, àbí bẹ́ẹ̀ kọ́? Ǹjẹ́ o mọ ọmọ yẹn?

Dáfídì nìyẹn nígbà tó wà lọ́mọdé. Ó ń gbé ní ìlú Bẹ́tílẹ́hẹ́mù. Óbédì, ọmọ tí Rúùtù àti Bóásì bí, ni bàbá bàbá rẹ̀. Ṣó o rántí Rúùtù àti Bóásì? Jésè ni bàbá Dáfídì. Dáfídì máa ń tọ́jú àwọn àgùntàn bàbá rẹ̀. Ọdún mẹ́wàá lẹ́yìn tí Jèhófà yan Sọ́ọ̀lù gẹ́gẹ́ bí ọba ni wọ́n bí Dáfídì.

Lọ́jọ́ kan, Jèhófà wí fún Sámúẹ́lì pé: ‘Mú àkànṣe òróró kó o sì lọ sí ilé Jésè ní Bẹ́tílẹ́hẹ́mù. Mo ti yan ọ̀kan nínú àwọn ọmọ rẹ̀ láti di ọba.’ Nígbà tí Sámúẹ́lì rí Élíábù tó jẹ́ àkọ́bí nínú ọmọ Jésè, ó sọ ọ́ sínú pé: ‘Dájúdájú, ẹni tí Jèhófà yàn nìyí.’ Ṣùgbọ́n Jèhófà sọ fún un pé: ‘Má wo bó ṣe ga àti bó ṣe rẹwà tó. Òun kọ́ ni mo yàn pé kó jẹ ọba.’

Nítorí náà Jésè pe ọmọ rẹ̀ Ábínádábù ó sì mú un lọ bá Sámúẹ́lì. Ṣùgbọ́n Sámúẹ́lì wí pé: ‘Rárá, ẹni yìí kọ́ ni Jèhófà yàn.’ Lẹ́yìn náà, Jésè mú Ṣámáhì ọmọ rẹ̀ wá. Sámúẹ́lì wí pé: ‘Rárá, Jèhófà ò yan eléyìí pẹ̀lú.’ Jésè mú méje nínú àwọn ọmọkùnrin rẹ̀ wá sọ́dọ̀ Sámúẹ́lì, ṣùgbọ́n Jèhófà kò yan èyíkéyìí nínú wọn. Sámúẹ́lì béèrè pé: ‘Ṣé gbogbo àwọn ọmọkùnrin tó o bí rèé?’

Jésè wí pé: ‘Èyí tó kéré jù ṣì wà. Ṣùgbọ́n ibi tó ti ń tọ́jú àwọn àgùntàn nínú pápá ló wà.’ Nígbà tó mú Dáfídì wá, Sámúẹ́lì rí i pé arẹwà ọmọkùnrin ni. Jèhófà wí pé: ‘Òun nìyí. Da òróró sí i lórí.’ Sámúẹ́lì sì ṣe bẹ́ẹ̀ gẹ́gẹ́. Ọjọ́ ń bọ̀ tí Dáfídì á di ọba Ísírẹ́lì.