Lọ wo ohun tó wà nínú rẹ̀

Lọ wo ohun yíyàn míì

Lọ wo àwọn ohun tó wà

Àwa Ẹlẹ́rìí Jèhófà

Yorùbá

Ìgbàgbọ́ Òdodo Ló Máa Mú Kó O Ní Ayọ̀

 APA 1

Ǹjẹ́ Ọ̀rọ̀ Wa Jẹ Ọlọ́run Lógún?

Ǹjẹ́ Ọ̀rọ̀ Wa Jẹ Ọlọ́run Lógún?

ÌṢÒRO pọ̀ ní ayé òde òní. Ogun, onírúurú ìjábá, àìsàn, àìrí owó gbọ́ bùkátà, ìwà ìbàjẹ́ àtàwọn nǹkan láabi mìíràn ń han àìmọye èèyàn léèmọ̀. Ó ṣeé ṣe kí ìwọ pàápàá ní àwọn nǹkan tí o ń ṣe àníyàn lé lórí. Ta ló máa ràn wá lọ́wọ́? Ǹjẹ́ ọ̀rọ̀ wa tiẹ̀ jẹ ẹnì kankan lógún?

Ìfẹ́ tí Ọlọ́run ní sí wa pọ̀ ju ìfẹ́ tó ń mú kí abiyamọ máa ṣìkẹ́ ọmọ ọwọ́ rẹ̀

Ó dájú pé ọ̀rọ̀ wa jẹ Ọlọ́run lógún gan-an. Ó sọ nínú Ìwé Mímọ́ rẹ̀ pé: “Aya ha lè gbàgbé ọmọ ẹnu ọmú rẹ̀ tí kì yóò fi ṣe ojú àánú sí ọmọ ikùn rẹ̀? Àní àwọn obìnrin wọ̀nyí lè gbàgbé, síbẹ̀, èmi kì yóò gbàgbé [rẹ].” *

Ǹjẹ́ o ò rí i pé ọ̀rọ̀ yìí fini lọ́kàn balẹ̀ gan-an? Àní, ìfẹ́ tí Ọlọ́run ní sí wa pọ̀ gan-an ju ìfẹ́ tó ń mú kí abiyamọ máa ṣìkẹ́ ọmọ ọwọ́ rẹ̀ lójú méjèèjì, bẹ́ẹ̀ sì rèé, abiyamọ kì í fi ọ̀rọ̀ ọmọ rẹ̀ ṣeré. Ọlọ́run kò ní pa wá tì láé! Kódà, ó tiẹ̀ ti ṣèrànlọ́wọ́ kan fún wa lọ́nà ìyanu. Ìrànlọ́wọ́ wo nìyẹn? Ó ti jẹ́ ká mọ ohun tí yóò máa fún wa ní ayọ̀, ìyẹn sì ni ìgbàgbọ́ òdodo.

Tó o bá ní ojúlówó ìgbàgbọ́, ìyẹn á máa fún ọ ní ayọ̀. Irú ìgbàgbọ́ bẹ́ẹ̀ yóò jẹ́ kó o lè yàgò fún ọ̀pọ̀ ìṣòro, yóò sì jẹ́ kó o lè borí àwọn ìṣòro tí kò ṣeé yẹ̀ sílẹ̀. Ó tún máa jẹ́ kó o sún mọ́ Ọlọ́run, ọkàn rẹ yóò sì máa balẹ̀ pẹ̀sẹ̀. Ìgbàgbọ́ òdodo sì máa gbé ọ dé ọgbà ìdẹ̀ra, ìyẹn Párádísè (Alujanna), níbi tó o ti máa ní ìyè ayérayé!

Àmọ́, kí ni ìgbàgbọ́ òdodo? Báwo lo ṣe lè ní irú ìgbàgbọ́ yìí?

^ ìpínrọ̀ 4 Wo Aísáyà 49:15 nínú Ìwé Mímọ́.

Mọ Púpọ̀ Sí I

ÌRÒYÌN AYỌ̀ LÁTỌ̀DỌ̀ ỌLỌ́RUN!

Kí Nìdí Tí Ọlọ́run Fi Fàyè Gba Ìwà Ibi àti Ìjìyà?

Báwo ni ìwà ibi ṣe bẹ̀rẹ̀, kí sì nìdí tí Ọlọ́run fi fàyè gbà á títí di báyìí? Ṣé ìyà máa dópin láé?

OHUN TÍ BÍBÉLÌ SỌ

Ṣé Ọlọ́run Ló Fa Ìyà Tó Ń Jẹ Aráyé?

Ìpọ́njú lè bá ẹnikẹ́ni, títí kan àwọn tí Ọlọ́run ṣojú rere sí pàápàá. Kí nìdí?