Lọ wo ohun tó wà nínú rẹ̀

Lọ wo ohun yíyàn míì

Lọ wo àwọn ohun tó wà

Àwa Ẹlẹ́rìí Jèhófà

Yorùbá

Àwọn Wo Ló Ń Ṣe Ìfẹ́ Jèhófà Lóde Òní?

 Ẹ̀KỌ́ 23

Báwo Ni A Ṣe Ń Kọ Àwọn Ìwé Wa, Tí A sì Ń Túmọ̀ Wọn?

Báwo Ni A Ṣe Ń Kọ Àwọn Ìwé Wa, Tí A sì Ń Túmọ̀ Wọn?

Ẹ̀ka Ìwé Kíkọ ní Orílẹ̀-èdè Amẹ́ríkà

Orílẹ̀-èdè South Kòríà

Orílẹ̀-èdè Àméníà

Orílẹ̀-èdè Bùrúńdì

Orílẹ̀-èdè Sri Lanka

Kí a bàa lè sọ “ìhìn rere” náà fún “gbogbo orílẹ̀-èdè àti ẹ̀yà àti ahọ́n àti ènìyàn,” à ń tẹ ìwé jáde ní èdè bí ọgọ́rùn-ún méje àti àádọ́ta [750]. (Ìṣípayá 14:6) Báwo la ṣe ń ṣe iṣẹ́ bàǹtàbanta yìí? À ń lo àwọn òǹkọ̀wé wa tó wà káàkiri ayé àti àwọn atúmọ̀ èdè tó ń fi tọkàn tara ṣiṣẹ́, gbogbo wọn pátá sì jẹ́ Ẹlẹ́rìí Jèhófà.

Èdè Gẹ̀ẹ́sì la máa fi ń kọ̀wé wa ká tó tú u sí àwọn èdè míì. Ìgbìmọ̀ Olùdarí ló ń bójú tó Ẹ̀ka Ìwé Kíkọ ní orílé-iṣẹ́ wa lágbàáyé. Ẹ̀ka yìí ló ń ṣètò iṣẹ́ àwọn òǹkọ̀wé tó wà ní orílé-iṣẹ́ wa àtàwọn tó wà láwọn ẹ̀ka ọ́fíìsì wa kan. Nítorí pé ibi tó yàtọ̀ síra ni àwọn òǹkọ̀wé wa ti wá, a máa ń gbé àwọn kókó ẹ̀kọ́ tó jẹ mọ́ onírúurú àṣà ìbílẹ̀ jáde kí àwọn èèyàn láti ọ̀pọ̀ orílẹ̀-èdè lè nífẹ̀ẹ́ sí ìwé wa.

A máa ń fi ọ̀rọ̀ ránṣẹ́ sí àwọn atúmọ̀ èdè. Lẹ́yìn tá a bá ti ṣàtúnṣe sí ọ̀rọ̀ tí àwọn òǹkọ̀wé wa kọ, tá a sì ti fọwọ́ sí i, a máa ń lo kọ̀ǹpútà láti fi í ránṣẹ́ sí àwùjọ atúmọ̀ èdè káàkiri ayé, kí wọ́n lè túmọ̀ rẹ̀, kí wọ́n yẹ ìtumọ̀ tí wọ́n ṣe wò dáadáa, kí wọ́n sì rí i pé ó dùn-ún kà, ó sì bá bí wọ́n ṣe ń sọ̀rọ̀ lédè wọn mu. Wọ́n máa ń sapá láti rí i pé àwọn yan “àwọn ọ̀rọ̀ títọ̀nà tí ó jẹ́ òtítọ́” kí wọ́n bàa lè gbé ìtumọ̀ ohun tó wà lédè Gẹ̀ẹ́sì náà yọ dáadáa ní èdè ìbílẹ̀ wọn.—Oníwàásù 12:10.

Kọ̀ǹpútà ń mú kí iṣẹ́ wọn yá kánkán. A kò lè fi kọ̀ǹpútà rọ́pò àwọn òǹkọ̀wé àtàwọn atúmọ̀ èdè. Àmọ́, iṣẹ́ wọn máa ń yá tí wọ́n bá lo àwọn ìwé atúmọ̀ èdè tó wà lórí kọ̀ǹpútà, àwọn ètò kọ̀ǹpútà ti èdè kọ̀ọ̀kan àtèyí tí wọ́n fi ń ṣe ìwádìí. Àwa Ẹlẹ́rìí Jèhófà ṣe ètò ìṣiṣẹ́ kọ̀ǹpútà kan tá a pè ní Multilanguage Electronic Publishing System (ìyẹn MEPS) tó máa jẹ́ ká lè tẹ ọ̀rọ̀ ní ọgọ́rọ̀ọ̀rún èdè, kí a gbé àwọn ọ̀rọ̀ náà sẹ́gbẹ̀ẹ́ àwòrán, kí a sì ṣètò rẹ̀ sí ojú ìwé tí wọ́n máa fi tẹ̀ ẹ́.

Kí nìdí tá a fi ń ṣe gbogbo iṣẹ́ yìí, àní tí a tún ń ṣe é fún àwọn èdè tí àwọn tó ń sọ ọ́ kò ju ẹgbẹ̀rún mélòó kan? Ìdí ni pé ó jẹ́ ìfẹ́ Jèhófà pé “kí a gba gbogbo onírúurú ènìyàn là, kí wọ́n sì wá sí ìmọ̀ pípéye nípa òtítọ́.”—1 Tímótì 2:3, 4.

  • Báwo ni a ṣe ń kọ àwọn ìwé wa?

  • Kí nìdí tá a fi ń túmọ̀ àwọn ìwé wa sí ọ̀pọ̀ èdè?