Lọ wo ohun tó wà nínú rẹ̀

Lọ wo ohun yíyàn míì

Lọ wo àwọn ohun tó wà

Àwa Ẹlẹ́rìí Jèhófà

Yorùbá

Ilé Ìṣọ́  |  July 2015

 KÓKÓ IWÁJÚ ÌWÉ | BÓ O ṢE LÈ BORÍ ÀNÍYÀN

Gbogbo Èèyàn Ló Ń Ṣàníyàn!

Gbogbo Èèyàn Ló Ń Ṣàníyàn!

“Oúnjẹ ni mo ni kí n lọ rà àmọ́ bisikíìtì nìkan ni mo rí lórí igbá, ó sì fi ìlọ́po ẹgbẹ̀rún mẹ́wàá [10,000] ju iye tí wọ́n ń tà á tẹ́lẹ̀. Nígbà tó fi máa di ọjọ́ kejì, kò tiẹ̀ wá sí oúnjẹ kankan mọ́.”—Paul, orílẹ̀-èdè Sìǹbábúwè.

“Ọ̀sán kan òru kan ni ọkọ mi já mi jù sílẹ̀ tó lóun ń lọ. Ọ̀rọ̀ náà dùn mí wọra. Kí lo máa wá ṣẹlẹ̀ sí èmi àti àwọn ọmọ mi?”—Janet, orílẹ̀-èdè Amẹ́ríkà.

“Nígbà tí aago ìkìlọ̀ dún, mó sáré lọ fara pa mọ́, mo sì dọ̀bálẹ̀ gbalaja, bí bọ́ǹbù ṣe ń bú gbàù-gbàù. Lẹ́yìn ọ̀pọ̀ wákàtí tí ìṣẹ̀lẹ̀ náà ti wáyé, ara mi ṣì ń gbọ̀n.”—Alona, orílẹ̀-èdè Ísírẹ́lì.

Àkókò tí àníyàn gbalẹ̀ gbòde là ń gbé, “àwọn àkókò lílekoko tí ó nira láti bá lò.” (2 Tímótì 3:1) Oríṣiríṣi ìṣòro ló ń bá wa fínra, bí ìṣòro ìṣúnná owó, ìgbéyàwó tó forí ṣánpọ́n, ogun, àìsàn gbẹ̀mígbẹ̀mí àtàwọn àjálù tó dédé wáyé tàbí èyí táwọn èèyàn fọwọ́ ara wọn fà. Òmíràn sì máa ń dá lórí àwọn ìṣòro ara ẹni. Bí àpẹẹrẹ, àwọn míì lè máa ṣàníyàn pé, ‘Ṣé ìfúnpá mi tó ga yìí kò ní yọrí sí àrùn rọpá-rọsẹ̀?’ ‘Ǹjẹ́ inú ayé burúkú yìí náà ni àwọn ọmọ-ọmọ mi máa dàgbà sí?’

Kì í ṣe gbogbo àníyàn ló burú. A sábà máa ń ṣàníyàn tá a bá fẹ́ ṣe ìdánwò, tá a bá fẹ́ lọ ṣe ìfọ̀rọ̀wánilẹ́nuwò láti ríṣẹ́ tàbí àwọn nǹkan míì. Lóòótọ́ ó yẹ ká máa bẹ̀rù, torí ìyẹn ni kò ní jẹ́ ká kó sínú ewu, ó ṣe tán, ẹyẹ ìbẹ̀rù ló ń tọ́jọ́. Àmọ́, ewu tún wà nínú kéèyàn máa ṣe àníyàn àṣejù. Ìwádìí kan tí wọ́n ṣe lẹ́nu àìpẹ́ yìí láàárín àwọn àgbàlagbà tí iye wọn lé ní ẹgbẹ̀rún méjìdínláàádọ́rin [68,000] fi hàn pé, àníyàn díẹ̀ pàápàá lè mú kéèyàn kú ní rèwerèwe. Ìdí nìyẹn tí Jésù fi béèrè pé: “Ta ni nínú yín, nípa ṣíṣàníyàn, tí ó lè fi ìgbọ̀nwọ́ kan kún ìwọ̀n gígùn ìwàláàyè rẹ̀?” Ká sòótọ́, ńṣe ni àníyàn máa ń ké ẹ̀mí èèyàn kúrú. Abájọ tí Jésù fi gbà wá níyànjú pé: “Ẹ dẹ́kun ṣíṣàníyàn.” (Mátíù 6:25, 27) Kí la lè ṣe láti dín àníyàn kù?

Ìdáhùn sí ìbéèrè yìí ò le, ó gba pé ká máa fọgbọ́n hùwà, ká ní ìgbàgbọ́ kíkún nínú Ọlọ́run ká sì gbà pé ọ̀la ń bọ̀ wá dáa. Ó ṣeé ṣe kí a má ní ìṣòro lílekoko báyìí, àmọ́ nǹkan lè yí pa dà bírí. Ẹ jẹ́ ká wo ohun tí Paul, Janet àti Alona ṣe kí wọ́n lè borí àníyàn wọn.