Lọ wo ohun tó wà nínú rẹ̀

Lọ wo ohun yíyàn míì

Lọ wo àwọn ohun tó wà

Àwa Ẹlẹ́rìí Jèhófà

Yorùbá

Jí!  |  March 2015

 OJÚ ÌWÒYE BÍBÉLÌ

Mesaya

Mesaya

Bíbélì sọ tẹ́lẹ̀ pé Mèsáyà máa wá sáyé láti wá dá àwọn èèyàn sílẹ̀ lọ́wọ́ àìsàn, ìyà àti ikú. Ṣé Jésù Kristi ni Mèsáyà náà?

Báwo ni àwọn èèyàn ṣe máa dá Mèsáyà náà mọ̀?

Àsọtẹ́lẹ̀ Bíbélì fi hàn pé ọ̀nà méjì ọ̀tọ̀ọ̀tọ̀ ni Mèsáyà náà máa gbà wá. Àkókò tó máa kọ́kọ́ fara hàn sì máa jìnnà sí ìkejì. * Èèyàn ni Mèsáyà náà máa jẹ́ nígbà tó bá kọ́kọ́ wá. Kí àwọn èèyàn lè dá a mọ̀ tó bá dé, àwọn tó kọ Bíbélì sọ tẹ́lẹ̀ nípa ìgbésí ayé rẹ̀ àti nípa iṣẹ́ ìwàásù rẹ̀. Kódà, “Jíjẹ́rìí Jésù” ni àwọn àsọtẹ́lẹ̀ Bíbélì dá lé.—Ìṣípayá 19:10.

Àwọn nǹkan tí Jésù ṣe nígbà tó wà láyé jẹ́ ìtọ́wò lásán lẹ́gbẹ̀ẹ́ ohun tó máa ṣe gẹ́gẹ́ bí ẹ̀dá ẹ̀mí alágbára

OHUN TÍ BÍBÉLÌ SỌ

Bíbélì sọ nípa Mèsáyà náà pé . . .

Gbogbo àwọn àsọtẹ́lẹ̀ yìí àtàwọn míì tó wà nínú Bíbélì ló ṣẹ sí Jésù lára. Yàtọ̀ síyẹn, Jésù tún jí òkú dìde, ó sì wo àwọn aláìsàn sàn. Àwọn nǹkan wọ̀nyí jẹ́ ẹ̀rí pé lóòótọ́ Jésù ni Mèsáyà náà. Bákan náà, àwọn nǹkan wọ̀nyí tún jẹ́ kó dá wa lójú pé gbogbo àwọn àsọtẹ́lẹ̀ tí Bíbélì sọ nípa ohun tí Jésù máa ṣe lọ́jọ́ iwájú máa ṣẹ. (Lúùkù 7:21-23; Ìṣípayá 21:3, 4) Lẹ́yìn tí Jésù jíǹde, ó jókòó sí “ọwọ́ ọ̀tún” Ọlọ́run, ó ń dúró de ìgbà tó máa parí iṣẹ́ rẹ̀ gẹ́gẹ́ bíi Mèsáyà.—Sáàmù 110:1-6.

“Nígbà tí Kristi bá dé, kì yóò ṣe àwọn iṣẹ́ àmì tí ó ju èyí tí ọkùnrin yìí ti ṣe, àbí yóò ṣe bẹ́ẹ̀?”Jòhánù 7:31.

 Báwo ni Mèsáyà ṣe máa parí iṣẹ́ rẹ̀?

Àwọn Júù nígbà ayé Jésù rò pé ńṣe ni Mèsáyà náà máa gba àwọn lọ́wọ́ àwọn ará Róòmù, á sì dá ìjọba pa dà fún Ísírẹ́lì. (Ìṣe 1:6) Ó ṣe díẹ̀ kí àwọn ọmọlẹ́yìn Jésù pàápàá tó lóye pé ọ̀run ni Jésù ti máa parí iṣẹ́ rẹ̀ gẹ́gẹ́ bí i Mèsáyà nígbà tó bá pa da di ẹ̀dá ẹ̀mí alágbára tó ń ṣàkóso látọ̀run.—Mátíù 28:18.

OHUN TÍ BÍBÉLÌ SỌ

Nígbà tí Mèsáyà bá fara hàn lẹ́ẹ̀kejì . . .

Jésù parí iṣẹ́ tó kọ́kọ́ ṣe gẹ́gẹ́ bí i Mèsáyà, ó sì máa parí ìkejì náà. Torí náà, àwọn tó bá gbọ́n gbọ́dọ̀ máa fiyè sí ọ̀rọ̀ rẹ̀ torí òun fúnra rẹ̀ sọ pé: “Èmi ni ọ̀nà àti òtítọ́ àti ìyè.”—Jòhánù 14:6.

“Ní àwọn ọjọ́ rẹ̀, olódodo yóò rú jáde, àti ọ̀pọ̀ yanturu àlàáfíà títí òṣùpá kì yóò fi sí mọ́. Òun yóò sì ní àwọn ọmọ abẹ́ . . . dé òpin ilẹ̀ ayé.” Sáàmù 72:7, 8.

^ ìpínrọ̀ 5 Ọ̀rọ̀ náà “Mèsáyà” wá látinú èdè Hébérù. Ìtumọ̀ kan náà ló ní pẹ̀lú ọ̀rọ̀ náà “Kristi” tó wá látinú èdè Gíríìkì.—Jòhánù 1:41.

^ ìpínrọ̀ 7 Àsọtẹ́lẹ̀ náà wà nínú ẹsẹ Bíbélì àkọ́kọ́, ìmúṣẹ rẹ̀ sì wà nínú ẹsẹ Bíbélì kejì.