Òun Náà Ni!

Bí ẹ̀dà Ilé Ìṣọ́ tó wà fún ìkẹ́kọ̀ọ́ ṣe rí báyìí ti yàtọ̀ sí ti tẹ́lẹ̀, kó lè túbọ̀ fà ẹ́ mọ́ra kó sì lè mú kó o túbọ̀ gbádùn kíkẹ́kọ̀ọ́ òtítọ́ ṣíṣeyebíye tó wà nínú Ọ̀rọ̀ Jèhófà.—Sm. 1:2; 119:97.

Ó ti pé ọdún mẹ́rin báyìí tá a ti bẹ̀rẹ̀ sí í tẹ àwọn ẹ̀dà Ilé Ìṣọ́ méjì ọ̀tọ̀ọ̀tọ̀. Ọ̀kan jẹ́ ẹ̀dà tá à ń fi sóde, ìkejì sì wà fún gbogbo àwa Ẹlẹ́rìí Jèhófà àti àwọn tá à ń kọ́ lẹ́kọ̀ọ́ Bíbélì tí wọ́n sì ń tẹ̀ síwájú nínú ẹ̀kọ́ wọn.

Arákùnrin kan tó ti ń sin Jèhófà látọjọ́ pípẹ́ sọ bí ọ̀rọ̀ ṣe rí lára rẹ̀ nígbà tó ka ẹ̀dà Ilé Ìṣọ́ àkọ́kọ́ tó wà fún ìkẹ́kọ̀ọ́, ó ní: “Nígbà tí mo kà á, mo rí i pé ó ti lọ wà jù, ọ̀rọ̀ inú rẹ̀ sì wọ̀ mí lọ́kàn. Bí ìwé ìròyìn náà ṣe ṣàlàyé kínníkínní nípa àwọn òtítọ́ iyebíye tó wà nínú Bíbélì wọ̀ mí lọ́kàn gan-an ni. Ẹ ṣeun lọ́pọ̀lọpọ̀ fún ìpèsè àgbàyanu yìí.” Arákùnrin mìíràn kọ̀wé pé: “Ńṣe ni mo máa ń fojú sọ́nà fún lílo àkókò tó pọ̀ láti kẹ́kọ̀ọ́ ẹ̀dà tó wà fún ìkẹ́kọ̀ọ́ yìí, mo sì tún máa ń lo Ìwé Mímọ́ ní Ìtumọ̀ Ayé Tuntun.” A lérò pé ojú tí ìwọ náà fi wò ó nìyẹn.

Gẹ́gẹ́ bí ẹ ṣe mọ̀, látọdún 1879 la ti ń tẹ ìwé ìròyìn Ilé Ìṣọ́, ẹ̀mí Jèhófà àti ìbùkún rẹ̀ nìkan ló sì lè mú kí irú iṣẹ́ ńlá bẹ́ẹ̀ ṣeé ṣe. (Sek. 4:6) A ti yí èèpo ẹ̀yìn ìwé ìròyìn náà pa dà ní ìgbà mélòó kan láàárín ọdún mẹ́tàléláàádóje [133] tá a ti ń tẹ̀ ẹ́ jáde. Lọ́dún 2012, a ó máa fọwọ́ ya àwòrán ibi tí ẹnì kan ti ń jẹ́rìí sára èèpo ẹ̀yìn ẹ̀dà Ilé Ìṣọ́ kọ̀ọ̀kan tó wà fún ìkẹ́kọ̀ọ́. Àwòrán aláwọ̀ mèremère yìí á máa rán wa létí iṣẹ́ tí Ọlọ́run gbé lé wa lọ́wọ́ pé ká máa jẹ́rìí kúnnákúnná nípa Ìjọba Jèhófà. (Ìṣe 28:23) Ní ojú ìwé kejì, ẹ máa rí fọ́tò tá a ya àwòrán rẹ̀ sí ẹ̀yìn ìwé ìròyìn náà, ẹ ó sì rí àlàyé ṣókí tó sọ ohun tó ń ṣẹlẹ̀ nínú àwòrán náà àti ibi tó ti ṣẹlẹ̀. Látìgbà yìí lọ, èyí a máa rán gbogbo wa létí pé àwọn èèyàn Jèhófà ń wàásù ìhìn rere “ní gbogbo ilẹ̀ ayé tí a ń gbé.”—Mát. 24:14.

Àwọn ohun mìíràn wo ló tún yí pa dà nínú ìwé ìròyìn náà? A ti gbé àpótí àtúnyẹ̀wò wá sí ìbẹ̀rẹ̀ àpilẹ̀kọ kọ̀ọ̀kan tó wà fún ìkẹ́kọ̀ọ́. Èyí á jẹ́ kó o rí àwọn kókó pàtàkì tó yẹ kó o fi sọ́kàn tó o bá ń ka àpilẹ̀kọ náà tàbí tó o bá ń kẹ́kọ̀ọ́ rẹ̀. Àmọ́ ṣá o, àwọn olùdarí Ìkẹ́kọ̀ọ́ Ilé Ìṣọ́ á máa lo àwọn ìbéèrè wọ̀nyí láti ṣe àtúnyẹ̀wò àpilẹ̀kọ náà lẹ́yìn tí ìkẹ́kọ̀ọ́ Ilé Ìṣọ́ bá ti parí. Ẹ óò kíyè sí i pé àlàfo etí ìwé ìròyìn náà ti fẹ̀ sí i, àwọn nọ́ńbà ojú ìwé àti ti ìpínrọ̀ sì túbọ̀ hàn ketekete.

Gẹ́gẹ́ bá a ṣe ṣàlàyé rẹ̀ nínú ẹ̀dà tó wà lọ́wọ́ yín yìí, a ti fi apá tuntun kan kún àwọn àpilẹ̀kọ tí ìwé ìròyìn yìí yóò máa gbé jáde, èyí tí a pè ní “Látinú Àpamọ́ Wa.” A ó máa fi àpilẹ̀kọ yìí ṣàlàyé àwọn ìṣẹ̀lẹ̀ pàtàkì nínú ìtàn àwa Ẹlẹ́rìí Jèhófà òde òní. Nínú àpilẹ̀kọ tá a pè ní “Wọ́n Yọ̀ǹda Ara Wọn Tinútinú,” a ó máa gbé ìrírí ohun tó ṣẹlẹ̀ sí àwọn ará jáde lẹ́ẹ̀kọ̀ọ̀kan. Àpilẹ̀kọ náà á máa ṣe àlàyé tó ṣe kedere nípa ìdùnnú, ìtẹ́lọ́rùn àti ayọ̀ táwọn ará lọ́kùnrin àti lóbìnrin ní nígbà tí wọ́n lọ sìn níbi tá a ti nílò àwọn oníwàásù Ìjọba Ọlọ́run púpọ̀ sí i.

A nírètí pé wàá túbọ̀ máa gbádùn àkókò tó o fi ń kẹ́kọ̀ọ́ Ọ̀rọ̀ Ọlọ́run bó o ṣe ń lo ìwé ìròyìn yìí.

Àwa Òǹṣèwé

[Àwòrán tó wà ní ojú ìwé 3]

1879

[Àwòrán tó wà ní ojú ìwé 3]

1895

[Àwòrán tó wà ní ojú ìwé 3]

1931

[Àwòrán tó wà ní ojú ìwé 3]

1950

[Àwòrán tó wà ní ojú ìwé 3]

1974

[Àwòrán tó wà ní ojú ìwé 3]

2008