3 | Kẹ́kọ̀ọ́ Lára Àwọn Èèyàn Inú Bíbélì
BÍBÉLÌ SỌ̀RỌ̀ NÍPA . . . Àwọn olóòótọ́ lọ́kùnrin àti lóbìnrin tí wọ́n jẹ́ ẹni “tó máa ń mọ nǹkan lára bíi tiwa.”—JÉMÍÌSÌ 5:17.
Ohun Tó Túmọ̀ Sí
Bíbélì sọ̀rọ̀ nípa ìtàn àwọn èèyàn tí oríṣiríṣi nǹkan ṣẹlẹ̀ sí, bẹ́ẹ̀ sì rèé, kì í ṣe ìtàn àròsọ lásán. Tá a bá ka àwọn ìtàn náà, a lè rí ẹnì kan tí ọ̀rọ̀ ẹ̀ jọ tiwa tá a máa kẹ́kọ̀ọ́ lára ẹ̀.
Àǹfààní Tó Máa Ṣe Ẹ́
Gbogbo wa la máa ń fẹ́ kí ọ̀rọ̀ wa yé àwọn èèyàn. Ní pàtàkì tá a bá ní àárẹ̀ ọpọlọ. Tá a bá ka ìtàn àwọn èèyàn tí Bíbélì sọ̀rọ̀ wọn, àá rí i pé ọ̀rọ̀ tiwa àti tiwọn jọra. Ìyẹn á jẹ́ ká gbà pé ohun tó ń ṣe wá ti ṣe àwọn míì rí, ó sì máa jẹ́ ká lè fara dà á nígbà tá a bá ń ṣàníyàn láṣejù àti nígbà tá a bá ní ìdààmú ọkàn.
Bíbélì sọ ìtàn àwọn èèyàn tí wọ́n ní ìṣòro ńlá tí nǹkan sì tojú sú wọn. Ṣé o ti níṣòro kan rí tó o wá sọ pé: ‘Wàhálà yìí ti pọ̀ jù, ó ti sú mi’? Irú nǹkan bẹ́ẹ̀ ṣẹlẹ̀ sí Mósè, Èlíjà àti Dáfídì.—Nọ́ńbà 11:14; 1 Àwọn Ọba 19:4; Sáàmù 55:4.
Àpẹẹrẹ ẹnì kan tí Bíbélì sọ ìtàn ẹ̀ ni Hánà. Inú Hánà “bà jẹ́ gan-an” torí pé kò rọ́mọ bí, orogún ẹ̀ sì máa ń pẹ̀gàn ẹ̀.—1 Sámúẹ́lì 1: 6,10.
Àpẹẹrẹ míì ni ọkùnrin kan tó ń jẹ́ Jóòbù, èèyàn bíi tiwa lòun náà. Bó tiẹ̀ jẹ́ pé ìgbàgbọ́ ẹ̀ lágbára, ìgbà kan wà tí ìdààmú ọkàn bá a gan-an, tó sì sọ pé: “Mo kórìíra ayé mi gidigidi; mi ò fẹ́ wà láàyè mọ.”—Jóòbù 7:16.
Tá a bá mọ ohun táwọn èèyàn yìí ṣe láti borí èrò òdì, ó máa ran àwa náà lọ́wọ́ láti fara da àwọn ìṣòro wa.
O Tún Lè Wo
OHUN TÍ BÍBÉLÌ SỌ
Àwọn Obìnrin inú Bíbélì—Kí La Rí Kọ́ Lára Wọn?
Wo ìyàtọ̀ tó wà láàárín àwọn obìnrin rere tí Bíbélì mẹ́nu kàn àtàwọn obìnrin búburú tó ṣe ohun tí kò dáa.
