Àwọn tó ń bójú tó ààbò ní pápákọ̀ òfuurufú lórílẹ̀-èdè Amẹ́ríkà sọ pé ní ọdún mẹ́wàá tó kọjá, oríṣiríṣi nǹkan tí ìjọba fòfin dè, tó lé ní àádọ́ta [50] mílíọ̀nù làwọn òṣìṣẹ́ ààbò ti gbà lọ́wọ́ àwọn èèyàn nígbà tí wọ́n fẹ́ wọnú bàlúù. Lọ́dún 2011 nìkan, iye ìbọn tí wọ́n gbà lọ́wọ́ àwọn èèyàn lé ní ẹgbẹ̀fà [1,200]. Ọ̀pọ̀ àwọn tí wọ́n gba ìbọn lọ́wọ́ wọn sọ pé àwọn gbàgbé rẹ̀ sọ́wọ́ ni.

Àwọn aláṣẹ ilé ẹ̀kọ́ ti bẹ̀rẹ̀ sí í fi nǹkan kan sára aṣọ iléèwé àwọn ọmọ, èyí tí yóò máa fi àtẹ̀jíṣẹ́ ránṣẹ́ sáwọn òbí tí àwọn ọmọ bá sá kúrò níléèwé. Àwọn òbí máa ń rí àtẹ̀jíṣẹ́ gbà tó máa sọ ìgbà tọ́mọ wọn dé iléèwé, wọ́n á sì tún rí àtẹ̀jíṣẹ́ míì gbà tó bá ṣẹlẹ̀ pé ọmọ náà fi ogún [20] ìṣẹ́jú pẹ́ dé iléèwé.

Lórílẹ̀-èdè Norway, ẹ̀sìn Ṣọ́ọ̀ṣì Luther kì í ṣe ẹ̀sìn tí ìjọba ní kí gbogbo èèyàn máa ṣe mọ́. Ìgbà àkọ́kọ́ nìyí tí Ilé Ìgbìmọ̀ Aṣòfin Orílẹ̀-èdè Norway ṣe àyípadà sí òfin tó fi dandan lé àjọṣe tó wà láàárín Ìjọba àti Ṣọ́ọ̀ṣì Luther.

Ìwádìí fi hàn pé ìdá méjì nínú mẹ́ta àwọn òṣìṣẹ́ tó wà lórílẹ̀-èdè Czech Republic ló máa ń di ọ̀ranyàn fún láti gba ìpè tó jẹ mọ́ iṣẹ́ wọn lẹ́yìn tí wọ́n bá ti kúrò níbiṣẹ́, wọ́n tún máa ń gba lẹ́tà orí Íńtánẹ́ẹ̀tì tàbí àtẹ̀jíṣẹ́ pàápàá. O ju ìdá kan nínú mẹ́ta lọ lára wọn tó máa ń fẹ́ láti rí i pé wọ́n dá èsì pa dà lẹ́sẹ̀kẹsẹ̀.

Bó tilẹ̀ jẹ́ pé oúnjẹ tí wọ́n ń mú jáde lórílẹ̀-èdè Íńdíà fi nǹkan bí ìdajì pọ̀ ju ti ogún [20] ọdún sẹ́yìn lọ, tí wọ́n sì tún ń tọ́jú mílíọ̀nù mọ́kànléláàádọ́rin [71] tọ́ọ̀nù ìrẹsì àti àlìkámà, síbẹ̀, ọ̀pọ̀ èèyàn lórílẹ̀-èdè náà ni kò rí oúnjẹ jẹ. Nǹkan bí ìdá mẹ́rin nínú mẹ́wàá àwọn oúnjẹ oníhóró tí wọ́n ń kó tọ́jú ló ń dé ọ̀dọ̀ àwọn aráàlù. Ìwà ìbàjẹ́ àti fífi nǹkan ṣòfò wà lára ohun tó fa ìṣòro wọn.