Lẹ́tà sí Àwọn Ará Kólósè 3:1-25

  • Ìwà tuntun àti ìwà àtijọ́ (1-17)

    • Ẹ sọ àwọn ẹ̀yà ara yín di òkú (5)

    • Ìfẹ́ jẹ́ ìdè ìrẹ́pọ̀ pípé (14)

  • Ìmọ̀ràn fún ìdílé Kristẹni (18-25)

3  Tó bá jẹ́ pé a ti gbé yín dìde pẹ̀lú Kristi,+ ẹ máa wá àwọn nǹkan ti òkè, níbi tí Kristi jókòó sí ní ọwọ́ ọ̀tún Ọlọ́run.+  Ẹ máa ronú nípa àwọn nǹkan ti òkè,+ kì í ṣe nípa àwọn nǹkan ti ayé.+  Nítorí ẹ ti kú, a sì ti fi ìyè yín pa mọ́ sọ́dọ̀ Kristi ní ìṣọ̀kan pẹ̀lú Ọlọ́run.  Nígbà tí a bá fi Kristi, ìyè wa,+ hàn kedere, nígbà náà, a ó fi ẹ̀yin náà hàn kedere pẹ̀lú rẹ̀ nínú ògo.+  Nítorí náà, ẹ sọ àwọn ẹ̀yà ara yín+ tó wà láyé di òkú ní ti ìṣekúṣe,* ìwà àìmọ́, ìfẹ́ ìbálòpọ̀ tí kò níjàánu,+ ìfẹ́kúfẹ̀ẹ́ àti ojúkòkòrò, tó jẹ́ ìbọ̀rìṣà.  Tìtorí àwọn nǹkan yìí ni ìrunú Ọlọ́run ṣe ń bọ̀.  Bí ẹ̀yin náà ṣe ń ṣe* nìyẹn nínú ọ̀nà ìgbésí ayé yín ti tẹ́lẹ̀.*+  Àmọ́ ní báyìí, ẹ gbọ́dọ̀ mú gbogbo wọn kúrò lọ́dọ̀ yín: ìrunú, ìbínú, ìwà burúkú+ àti ọ̀rọ̀ èébú,+ kí ẹ sì mú ọ̀rọ̀ rírùn+ kúrò lẹ́nu yín.  Ẹ má ṣe máa parọ́ fún ara yín.+ Ẹ bọ́ ìwà* àtijọ́ sílẹ̀+ pẹ̀lú àwọn àṣà rẹ̀, 10  ẹ sì fi ìwà tuntun wọ ara yín láṣọ,+ èyí tí à ń fi ìmọ̀ tó péye sọ di tuntun, kí ó lè jọ àwòrán Ẹni tó dá a,+ 11  níbi tí kò ti sí Gíríìkì tàbí Júù, ìdádọ̀dọ́* tàbí àìdádọ̀dọ́,* àjèjì, Sítíánì,* ẹrú tàbí òmìnira; àmọ́ Kristi ni ohun gbogbo, ó sì wà nínú ohun gbogbo.+ 12  Nítorí náà, gẹ́gẹ́ bí àyànfẹ́ Ọlọ́run,+ ẹ̀yin tí ẹ jẹ́ mímọ́ àti olùfẹ́, ẹ fi ìfẹ́ oníjẹ̀lẹ́ńkẹ́ ti àánú,+ inú rere, ìrẹ̀lẹ̀,*+ ìwà tútù+ àti sùúrù+ wọ ara yín láṣọ. 13  Ẹ máa fara dà á fún ara yín, kí ẹ sì máa dárí ji ara yín fàlàlà,+ kódà tí ẹnikẹ́ni bá ní ìdí láti fẹ̀sùn kan ẹlòmíì.+ Bí Jèhófà* ṣe dárí jì yín ní fàlàlà, ẹ̀yin náà gbọ́dọ̀ máa ṣe bẹ́ẹ̀.+ 14  Àmọ́, yàtọ̀ sí gbogbo àwọn nǹkan yìí, ẹ fi ìfẹ́ wọ ara yín láṣọ,+ nítorí ó jẹ́ ìdè ìrẹ́pọ̀ pípé.+ 15  Bákan náà, ẹ jẹ́ kí àlàáfíà Kristi jọba lọ́kàn yín,*+ nítorí a ti pè yín sínú àlàáfíà yẹn nínú ara kan. Torí náà, ẹ máa dúpẹ́. 16  Ẹ jẹ́ kí ọ̀rọ̀ Kristi máa gbé inú yín lọ́pọ̀lọpọ̀ nínú gbogbo ọgbọ́n. Ẹ máa kọ́ ara yín, kí ẹ sì máa gba ara yín níyànjú* pẹ̀lú àwọn sáàmù,+ ìyìn sí Ọlọ́run, àwọn orin ẹ̀mí tí à ń fi ìmoore* kọ, kí ẹ máa kọrin sí Jèhófà* nínú ọkàn yín.+ 17  Ohunkóhun tí ẹ bá ń ṣe ní ọ̀rọ̀ tàbí ní ìṣe, ẹ máa ṣe ohun gbogbo ní orúkọ Jésù Olúwa, kí ẹ máa tipasẹ̀ rẹ̀ dúpẹ́ lọ́wọ́ Ọlọ́run tó jẹ́ Baba.+ 18  Ẹ̀yin aya, ẹ máa tẹrí ba fún àwọn ọkọ yín,+ bó ṣe yẹ nínú Olúwa. 19  Ẹ̀yin ọkọ, ẹ máa nífẹ̀ẹ́ àwọn aya yín,+ ẹ má sì bínú sí wọn lọ́nà òdì.*+ 20  Ẹ̀yin ọmọ, ẹ máa gbọ́ràn sí àwọn òbí yín lẹ́nu nínú ohun gbogbo,+ nítorí èyí dára gidigidi lójú Olúwa. 21  Ẹ̀yin bàbá, ẹ má ṣe máa mú àwọn ọmọ yín bínú,*+ kí wọ́n má bàa soríkodò.* 22  Ẹ̀yin ẹrú, ẹ máa gbọ́ràn sí àwọn ọ̀gá yín* lẹ́nu nínú ohun gbogbo,+ kì í ṣe nígbà tí wọ́n bá ń wò yín nìkan, torí kí ẹ lè tẹ́ èèyàn lọ́rùn,* àmọ́ ẹ máa fòótọ́ ọkàn ṣe é pẹ̀lú ìbẹ̀rù Jèhófà.* 23  Ohunkóhun tí ẹ bá ń ṣe, ẹ ṣe é tọkàntọkàn* bíi pé Jèhófà* lẹ̀ ń ṣe é fún,+ kì í ṣe èèyàn, 24  torí ẹ mọ̀ pé ọ̀dọ̀ Jèhófà* lẹ ti máa gba ogún náà bí èrè.+ Ẹ máa ṣẹrú fún Ọ̀gá náà, Kristi. 25  Ó dájú pé ẹni tó ń ṣe àìtọ́ á gba ẹ̀san ohun tó ṣe,+ kò sì sí ojúsàájú kankan.+

Àlàyé Ìsàlẹ̀ Ìwé

Lédè Gíríìkì, por·neiʹa. Wo Àlàyé Ọ̀rọ̀.
Tàbí “ṣe rìn.”
Tàbí “nígbà tí ẹ̀ ń gbé irú ìgbé ayé yẹn.”
Ní Grk., “ọkùnrin.”
Tàbí “ìkọlà.”
Tàbí “àìkọlà.”
“Sítíánì” ń tọ́ka sí àwọn tí kò lajú.
Tàbí “ìrẹ̀lẹ̀ ọkàn.”
Tàbí “máa darí ọkàn yín.”
Tàbí “bá ara yín wí.”
Tàbí “oore ọ̀fẹ́.”
Tàbí “ẹ má sì kanra mọ́ wọn.”
Tàbí “ni àwọn ọmọ yín lára.”
Tàbí “rẹ̀wẹ̀sì.”
Ní Grk., “ọ̀gá yín nípa tara.”
Ní Grk., “kì í ṣe àrójúṣe bíi ti àwọn tó máa ń fẹ́ wu èèyàn.”
Wo Àlàyé Ọ̀rọ̀, “Ọkàn.”