Jeremáyà 25:1-38

  • Ìdájọ́ Jèhófà lórí àwọn orílẹ̀-èdè (1-38)

    • Àwọn orílẹ̀-èdè máa fi 70 ọdún sin Bábílónì (11)

    • Ife wáìnì ìbínú Ọlọ́run (15)

    • Àjálù láti orílẹ̀-èdè dé orílẹ̀-èdè (32)

    • Àwọn tí Jèhófà pa (33)

25  Ọ̀rọ̀ tí Jeremáyà gbọ́ nípa gbogbo àwọn èèyàn Júdà ní ọdún kẹrin Jèhóákímù+ ọmọ Jòsáyà, ọba Júdà, ìyẹn ní ọdún kìíní Nebukadinésárì* ọba Bábílónì.  Ohun tí wòlíì Jeremáyà sọ nípa* gbogbo àwọn èèyàn Júdà àti gbogbo àwọn tó ń gbé Jerúsálẹ́mù nìyí:  “Láti ọdún kẹtàlá ìjọba Jòsáyà+ ọmọ Ámọ́nì, ọba Júdà, títí di òní yìí, ọdún kẹtàlélógún rèé tí Jèhófà ti ń bá mi sọ̀rọ̀, léraléra ni mo sì ń bá yín sọ̀rọ̀,* ṣùgbọ́n ẹ kò fetí sílẹ̀.+  Jèhófà sì rán gbogbo àwọn ìránṣẹ́ rẹ̀ wòlíì sí yín, léraléra ló ń rán wọn,* ṣùgbọ́n ẹ kò fetí sílẹ̀, bẹ́ẹ̀ ni ẹ kò dẹ etí yín sílẹ̀ láti gbọ́.+  Wọ́n ń sọ pé, ‘Ẹ jọ̀wọ́, ẹ yí pa dà, kí kálukú yín kúrò nínú ọ̀nà búburú rẹ̀ àti kúrò nínú ìwà ibi rẹ̀,+ kí ẹ lè máa gbé títí láé lórí ilẹ̀ tí Jèhófà ti fún ẹ̀yin àti àwọn baba ńlá yín tipẹ́tipẹ́.  Ẹ má ṣe tẹ̀ lé àwọn ọlọ́run míì, ẹ má sìn wọ́n, ẹ má forí balẹ̀ fún wọn, kí ẹ má sì fi iṣẹ́ ọwọ́ yín mú mi bínú, àìjẹ́ bẹ́ẹ̀, ṣe ni màá mú àjálù bá yín.’  “‘Ṣùgbọ́n ẹ kò fetí sí mi,’ ni Jèhófà wí. ‘Kàkà bẹ́ẹ̀, ńṣe lẹ̀ ń fi iṣẹ́ ọwọ́ yín mú mi bínú, tí èyí sì ń fa àjálù bá yín.’+  “Nítorí náà, ohun tí Jèhófà Ọlọ́run àwọn ọmọ ogun sọ nìyí, ‘“Nítorí pé ẹ kò gbọ́rọ̀ sí mi lẹ́nu,  Màá ránṣẹ́ pe gbogbo ìdílé tó wà ní àríwá,”+ ni Jèhófà wí, “màá ránṣẹ́ sí Nebukadinésárì* ọba Bábílónì, ìránṣẹ́ mi,+ màá mú wọn wá láti gbéjà ko ilẹ̀ yìí+ àti àwọn tó ń gbé lórí rẹ̀ pẹ̀lú gbogbo orílẹ̀-èdè tó yí i ká.+ Màá pa wọ́n run pátápátá, màá sì sọ wọ́n di ohun àríbẹ̀rù àti ohun àrísúfèé àti ibi àwókù títí láé. 10  Màá fòpin sí ìró ayọ̀ àti ìró ìdùnnú láàárín wọn,+ màá sì tún fòpin sí ohùn ọkọ ìyàwó àti ohùn ìyàwó,+ ìró ọlọ àti ìmọ́lẹ̀ fìtílà. 11  Gbogbo ilẹ̀ yìí á di àwókù àti ohun àríbẹ̀rù, àwọn orílẹ̀-èdè yìí á sì ní láti fi àádọ́rin (70) ọdún sin ọba Bábílónì.”’+ 12  “‘Ṣùgbọ́n tí àádọ́rin (70) ọdún bá pé,+ màá pe ọba Bábílónì àti orílẹ̀-èdè yẹn wá jíhìn* nítorí ẹ̀ṣẹ̀ wọn,’+ ni Jèhófà wí, ‘màá sì sọ ilẹ̀ àwọn ará Kálídíà di ahoro títí láé.+ 13  Màá mú gbogbo ọ̀rọ̀ mi ṣẹ sórí ilẹ̀ náà, èyí tí mo ti sọ sí i, ìyẹn gbogbo ohun tó wà nínú ìwé yìí tí Jeremáyà sọ tẹ́lẹ̀ nípa gbogbo àwọn orílẹ̀-èdè. 14  Nítorí ọ̀pọ̀ orílẹ̀-èdè àti àwọn ọba ńlá+ á sọ wọ́n di ẹrú,+ màá sì san èrè wọn pa dà fún wọn gẹ́gẹ́ bí ìwà àti iṣẹ́ ọwọ́ wọn.’”+ 15  Nítorí ohun tí Jèhófà Ọlọ́run Ísírẹ́lì sọ fún mi nìyí: “Gba ife wáìnì ìbínú yìí ní ọwọ́ mi, kí o sì mú kí gbogbo orílẹ̀-èdè tí mo bá rán ọ sí mu ún. 16  Wọ́n á mu, wọ́n á ta gbọ̀n-ọ́n gbọ̀n-ọ́n, wọ́n á sì máa ṣe bíi wèrè nítorí idà tí màá rán sí àárín wọn.”+ 17  Torí náà, mo gba ife náà lọ́wọ́ Jèhófà, mo sì mú kí gbogbo orílẹ̀-èdè tí Jèhófà rán mi sí mu ún:+ 18  bẹ̀rẹ̀ láti Jerúsálẹ́mù àti àwọn ìlú Júdà,+ àwọn ọba rẹ̀ àti àwọn ìjòyè rẹ̀, láti sọ wọ́n di ahoro, ohun àríbẹ̀rù, ohun àrísúfèé àti ẹni ègún,+ bó ṣe rí lónìí, 19  lẹ́yìn náà, Fáráò ọba Íjíbítì àti àwọn ìránṣẹ́ rẹ̀, àwọn ìjòyè rẹ̀ àti gbogbo èèyàn rẹ̀+ 20  àti onírúurú àjèjì tó wà láàárín wọn, gbogbo ọba ilẹ̀ Úsì, gbogbo ọba ilẹ̀ Filísínì+ àti Áṣíkẹ́lónì+ àti Gásà àti Ẹ́kírónì àti àwọn tó ṣẹ́ kù ní Áṣídódì, 21  Édómù,+ Móábù+ àti àwọn ọmọ Ámónì,+ 22  gbogbo ọba Tírè, gbogbo ọba Sídónì+ àti àwọn ọba erékùṣù tó wà ní ẹ̀gbẹ́ òkun, 23  Dédánì,+ Témà, Búsì àti gbogbo àwọn tí wọ́n gé irun wọn mọ́lẹ̀ ní ẹ̀bátí,+ 24  gbogbo ọba àwọn ará Arébíà+ àti gbogbo ọba onírúurú àjèjì tó ń gbé ní aginjù, 25  gbogbo ọba Símírì, gbogbo ọba Élámù+ àti gbogbo ọba àwọn ará Mídíà,+ 26  àti gbogbo ọba àríwá, ti tòsí àti ti ọ̀nà jíjìn, ọ̀kan tẹ̀ lé èkejì àti gbogbo ìjọba yòókù tó wà lórí ilẹ̀ ayé, ọba Ṣéṣákì*+ pẹ̀lú á mu wáìnì náà lẹ́yìn wọn. 27  “Kí o sì sọ fún wọn pé, ‘Ohun tí Jèhófà Ọlọ́run àwọn ọmọ ogun, Ọlọ́run Ísírẹ́lì, sọ nìyí: “Ẹ mu, kí ẹ sì yó, ẹ bì, kí ẹ sì ṣubú, tí ẹ kò fi ní lè dìde+ nítorí idà tí màá rán sáàárín yín.”’ 28  Bí wọn ò bá sì gba ife náà lọ́wọ́ rẹ láti mu ún, kí o sọ fún wọn pé, ‘Ohun tí Jèhófà Ọlọ́run àwọn ọmọ ogun sọ nìyí: “Ẹ gbọ́dọ̀ mu ún! 29  Nítorí tó bá jẹ́ pé ìlú tí à ń fi orúkọ mi+ pè ni màá kọ́kọ́ mú àjálù bá, ṣé ẹ̀yin á wá lọ láìjìyà ni?”’+ “‘Ẹ ò ní lọ láìjìyà, nítorí màá pe idà wá bá gbogbo àwọn tó ń gbé láyé,’ ni Jèhófà Ọlọ́run àwọn ọmọ ogun wí. 30  “Sọ àsọtẹ́lẹ̀ gbogbo ọ̀rọ̀ yìí fún wọn, kí o sì sọ fún wọn pé,‘Láti ibi gíga ni Jèhófà á ti bú ramúramùÀti láti ibùgbé rẹ̀ mímọ́ ni á ti mú kí a gbọ́ ohùn rẹ̀. Á bú ramúramù mọ́ ibi gbígbé rẹ̀. Á hó yèè bíi ti àwọn tó ń tẹ àjàrà níbi tí wọ́n ti ń fún wáìnì,Á sì máa kọrin ìṣẹ́gun lórí gbogbo àwọn tó ń gbé láyé.’ 31  ‘Ariwo kan á dún títí dé ìkángun ayé,Nítorí Jèhófà ní ẹjọ́ kan pẹ̀lú àwọn orílẹ̀-èdè. Òun fúnra rẹ̀ á ṣe ìdájọ́ gbogbo àwọn èèyàn.*+ Á sì fi idà pa àwọn ẹni burúkú,’ ni Jèhófà wí. 32  Ohun tí Jèhófà Ọlọ́run àwọn ọmọ ogun sọ nìyí: ‘Wò ó! Àjálù kan ń ṣẹlẹ̀ kiri láti orílẹ̀-èdè dé orílẹ̀-èdè,+A ó sì tú ìjì líle jáde láti ibi tó jìnnà jù lọ láyé.+ 33  “‘Àwọn tí Jèhófà máa pa ní ọjọ́ yẹn máa pọ̀ láti ìkángun kan ayé títí dé ìkángun kejì. A ò ní ṣọ̀fọ̀ wọn, a ò ní kó wọn jọ, bẹ́ẹ̀ ni a ò ní sin wọ́n. Wọ́n á dà bí ajílẹ̀ lórí ilẹ̀.’ 34  Ẹ pohùn réré ẹkún, ẹ̀yin olùṣọ́ àgùntàn, kí ẹ sì ké! Ẹ yíràá, ẹ̀yin ọlọ́lá inú agbo ẹran,Nítorí ọjọ́ tí wọ́n á pa yín, tí wọ́n á sì tú yín ká ti pé,Ẹ ó sì bọ́ lulẹ̀ bí ìgbà tí ohun èlò tó ṣeyebíye bá bọ́ lulẹ̀! 35  Àwọn olùṣọ́ àgùntàn kò rí ibì kankan sá sí,Kò sì sí ọ̀nà láti sá àsálà fún àwọn ọlọ́lá inú agbo ẹran. 36  Ẹ fetí sílẹ̀! Ẹ gbọ́ igbe àwọn olùṣọ́ àgùntànÀti ìpohùnréré ẹkún àwọn ọlọ́lá inú agbo ẹran,Nítorí Jèhófà ń ba ibi ìjẹko wọn jẹ́. 37  Ibi gbígbé tó ní àlàáfíà sì ti di aláìlẹ́mìíNítorí ìbínú Jèhófà tó ń jó fòfò. 38  Ó ti fi ibùgbé rẹ̀ sílẹ̀ bí ọmọ kìnnìún,*+Torí ilẹ̀ wọn ti di ohun àríbẹ̀rùNítorí idà tó ń hanni léèmọ̀Àti nítorí ìbínú rẹ̀ tó ń jó fòfò.”

Àlàyé Ìsàlẹ̀ Ìwé

Ní Héb., “Nebukadirésárì,” ọ̀nà míì tí wọ́n ń gbà kọ orúkọ yìí.
Tàbí “sí.”
Ní Héb., “mò ń dìde ní kùtùkùtù, mo sì ń sọ̀rọ̀.”
Ní Héb., “ó ń dìde ní kùtùkùtù, ó sì ń rán wọn.”
Ní Héb., “Nebukadirésárì,” ọ̀nà míì tí wọ́n ń gbà kọ orúkọ yìí.
Tàbí “fìyà jẹ ọba Bábílónì àti orílẹ̀-èdè yẹn.”
Ó ṣeé ṣe kó jẹ́ orúkọ àṣírí tí wọ́n fi ń pe Bábélì (Bábílónì).
Ní Héb., “gbogbo ẹlẹ́ran ara.”
Tàbí “ọmọ kìnnìún tó tó ọdẹ ṣe (onígọ̀gọ̀).”