Jeremáyà 1:1-19

  • Ọlọ́run yan Jeremáyà láti jẹ́ wòlíì (1-10)

  • Ìran nípa igi álímọ́ńdì (11, 12)

  • Ìran nípa ìkòkò ìsebẹ̀ (13-16)

  • Ọlọ́run fún Jeremáyà lágbára kó lè jẹ́ iṣẹ́ tó rán an (17-19)

1  Ìwọ̀nyí ni ọ̀rọ̀ Jeremáyà,* ọmọ Hilikáyà, ọ̀kan lára àwọn àlùfáà tó wà ní Ánátótì,+ ní ilẹ̀ Bẹ́ńjámínì.  Jèhófà bá a sọ̀rọ̀ nígbà ayé Jòsáyà+ ọmọ Ámọ́nì,+ ọba Júdà, ní ọdún kẹtàlá tó ti ń jọba.  Ó tún bá a sọ̀rọ̀ nígbà ayé Jèhóákímù+ ọmọ Jòsáyà, ọba Júdà, títí di òpin ọdún kọkànlá ìjọba Sedekáyà,+ ọmọ Jòsáyà, ọba Júdà, títí Jerúsálẹ́mù fi lọ sí ìgbèkùn ní oṣù karùn-ún.+  Jèhófà bá mi sọ̀rọ̀, ó ní:   “Kí n tó dá ọ nínú ìyá rẹ ni mo ti mọ̀* ọ́,+Kí wọ́n sì tó bí ọ* ni mo ti sọ ọ́ di mímọ́.*+ Mo fi ọ́ ṣe wòlíì àwọn orílẹ̀-èdè.”   Ṣùgbọ́n mo sọ pé: “Áà, Jèhófà Olúwa Ọba Aláṣẹ! Mi ò mọ ọ̀rọ̀ sọ,+ ọmọdé* lásán ni mí.”+   Ni Jèhófà bá sọ fún mi pé: “Má sọ pé ‘ọmọdé lásán’ ni ọ́. Torí o gbọ́dọ̀ lọ sọ́dọ̀ gbogbo àwọn tí mo bá rán ọ sí,Kí o sì sọ gbogbo ohun tí mo bá pa láṣẹ fún ọ.+   Má ṣe jẹ́ kí ìrísí wọn dẹ́rù bà ọ́,+Nítorí ‘mo wà pẹ̀lú rẹ láti gbà ọ́,’+ ni Jèhófà wí.”  Jèhófà wá na ọwọ́ rẹ̀, ó sì fi kan ẹnu mi.+ Jèhófà sì sọ fún mi pé: “Mo ti fi ọ̀rọ̀ mi sí ẹnu rẹ.+ 10  Wò ó, mo ti fàṣẹ yàn ọ́ lónìí lórí àwọn orílẹ̀-èdè àti lórí àwọn ìjọba, láti fà tu àti láti bì wó, láti pa run àti láti ya lulẹ̀, láti kọ́ àti láti gbìn.”+ 11  Jèhófà tún bá mi sọ̀rọ̀, ó ní: “Jeremáyà, kí lo rí?” Mo sọ pé: “Ẹ̀ka igi álímọ́ńdì.”* 12  Jèhófà sọ fún mi pé: “Òótọ́ ni, òun ni, nítorí mo máa ń wà lójúfò láti mú ọ̀rọ̀ mi ṣẹ.” 13  Jèhófà tún bá mi sọ̀rọ̀ lẹ́ẹ̀kejì pé: “Kí lo rí?” Torí náà, mo sọ pé: “Mo rí ìkòkò* tí ohun tó wà nínú rẹ̀ ń hó,* tí wọ́n da ẹnu rẹ̀ sẹ́gbẹ̀ẹ́ kí ó lè kọ ìdí sí àríwá.” 14  Ni Jèhófà bá sọ fún mi pé: “Ìyọnu máa tú jáde láti àríwáSára gbogbo àwọn tó ń gbé ilẹ̀ náà.+ 15  Nítorí ‘mò ń pe gbogbo ìdílé àwọn ìjọba àríwá,’ ni Jèhófà wí,+‘Wọ́n á wá, kálukú wọn á sì ṣe ìtẹ́ rẹ̀Sí àwọn ẹnubodè Jerúsálẹ́mù,+Wọ́n á gbé e ti gbogbo ògiri tó yí i káWọ́n á sì gbé e ti gbogbo ìlú tó wà ní Júdà.+ 16  Màá kéde ìdájọ́ mi lé wọn lórí nítorí gbogbo ìwà ibi wọn,Torí pé wọ́n ti fi mí sílẹ̀,+Wọ́n ń fi ẹbọ rú èéfín sí àwọn ọlọ́run mìíràn+Wọ́n sì ń forí balẹ̀ fún iṣẹ́ ọwọ́ ara wọn.’+ 17  Àmọ́, gbára dì,*Kí o sì dìde láti bá wọn sọ gbogbo ohun tí mo bá pa láṣẹ fún ọ. Má ṣe jẹ́ kí ẹ̀rù wọn bà ọ́,+Kí n má bàa jẹ́ kí ẹ̀rù bà ọ́ níwájú wọn. 18  Lónìí, mo ti sọ ọ́ di ìlú olódi,Òpó irin àti ògiri bàbà láti kojú gbogbo ilẹ̀ náà,+Láti kojú àwọn ọba Júdà àti àwọn ìjòyè rẹ̀,Láti kojú àwọn àlùfáà rẹ̀ àti àwọn èèyàn ilẹ̀ náà.+ 19  Ó sì dájú pé wọ́n á bá ọ jà,Ṣùgbọ́n wọn kò ní borí* rẹ,Nítorí ‘mo wà pẹ̀lú rẹ + láti gbà ọ́’ ni Jèhófà wí.”

Àlàyé Ìsàlẹ̀ Ìwé

Ó ṣeé ṣe kó túmọ̀ sí “Jèhófà Ń Gbéni Ga.”
Ní Héb., “Kí o tó jáde láti inú ilé ọmọ.”
Tàbí “yà ọ́ sọ́tọ̀.”
Tàbí “yàn.”
Tàbí “ọ̀dọ́.”
Ní Héb., “ẹni tó ń tètè jí.”
Tàbí “ìkòkò ìsebẹ̀ ẹlẹ́nu fífẹ̀.”
Ní Héb., “tí wọ́n fẹ́ atẹ́gùn sí,” èyí tó fi hàn pé iná ń jó lala lábẹ́ rẹ̀.
Ní Héb., “de àmùrè mọ́ ìbàdí rẹ.”
Tàbí “ṣẹ́gun.”