Dáníẹ́lì 12:1-13

  • “Àkókò òpin” àti ohun tó máa ṣẹlẹ̀ lẹ́yìn náà (1-13)

    • Máíkẹ́lì máa dìde (1)

    • Àwọn tó ní ìjìnlẹ̀ òye máa tàn yinrin (3)

    • Ìmọ̀ tòótọ́ máa pọ̀ yanturu (4)

    • Dáníẹ́lì máa dìde fún ìpín rẹ̀ (13)

12  “Ní àkókò yẹn, Máíkẹ́lì*+ máa dìde, ọmọ aládé ńlá+ tó dúró nítorí àwọn èèyàn rẹ.* Àkókò wàhálà máa wáyé, èyí tí irú rẹ̀ kò wáyé rí látìgbà tí orílẹ̀-èdè ti wà títí di àkókò yẹn. Ní àkókò yẹn, àwọn èèyàn rẹ máa yè bọ́,+ gbogbo àwọn tí orúkọ wọn wà nínú ìwé.+ 2  Ọ̀pọ̀ àwọn tó ń sùn nínú erùpẹ̀ ilẹ̀ máa jí, àwọn kan sí ìyè àìnípẹ̀kun, àwọn míì sí ẹ̀gàn àti sí ìkórìíra ayérayé. 3  “Àwọn tó ní ìjìnlẹ̀ òye máa tàn yinrin bí òfúrufú, àwọn tí wọ́n sì ń mú ọ̀pọ̀lọpọ̀ wá sí òdodo máa tàn bí ìràwọ̀, títí láé àti láéláé. 4  “Ní tìrẹ, Dáníẹ́lì, ṣe àwọn ọ̀rọ̀ náà ní àṣírí, kí o sì gbé èdìdì lé ìwé náà títí di àkókò òpin.+ Ọ̀pọ̀ máa lọ káàkiri,* ìmọ̀ tòótọ́ sì máa pọ̀ yanturu.”+ 5  Èmi Dáníẹ́lì wá wò, mo sì rí àwọn méjì míì tó dúró síbẹ̀, ọ̀kan ní etí omi níbí àti ìkejì ní etí omi lọ́hùn-ún.+ 6  Ọ̀kan wá sọ fún ọkùnrin tó wọ aṣọ ọ̀gbọ̀,*+ tó wà lórí omi tó ń ṣàn pé: “Ìgbà wo ni àwọn ohun àgbàyanu yìí máa dópin?” 7  Nígbà náà, mo gbọ́ tí ọkùnrin tó wọ aṣọ ọ̀gbọ̀ náà, tó wà lórí omi tó ń ṣàn sọ̀rọ̀, bó ṣe gbé ọwọ́ ọ̀tún rẹ̀ àti ọwọ́ òsì rẹ̀ sókè ọ̀run, tó sì fi Ẹni tó wà láàyè títí láé búra pé:+ “Ó máa jẹ́ fún àkókò tí a yàn, àwọn àkókò tí a yàn àti ààbọ̀ àkókò.* Gbàrà tí fífọ́ agbára àwọn èèyàn mímọ́ túútúú bá ti dópin,+ gbogbo nǹkan yìí máa dópin.” 8  Ní tèmi, mo gbọ́, ṣùgbọ́n kò yé mi;+ mo wá sọ pé: “Olúwa mi, kí làwọn nǹkan yìí máa yọrí sí?” 9  Ó sì sọ pé: “Máa lọ, Dáníẹ́lì, torí pé ọ̀rọ̀ náà máa jẹ́ àṣírí, a sì máa gbé èdìdì lé e títí di àkókò òpin.+ 10  Ọ̀pọ̀ máa wẹ ara wọn mọ́, wọ́n máa sọ ara wọn di funfun, a sì máa yọ́ wọn mọ́.+ Àwọn ẹni burúkú máa hùwà burúkú, kò sì ní yé ìkankan nínú àwọn ẹni burúkú; ṣùgbọ́n àwọn tó ní ìjìnlẹ̀ òye máa lóye.+ 11  “Látìgbà tí a bá ti mú ohun tó ń ṣẹlẹ̀ nígbà gbogbo*+ kúrò, tí a sì ti gbé ohun ìríra tó ń fa ìsọdahoro kalẹ̀,+ ẹgbẹ̀rún kan ó lé igba àti àádọ́rùn-ún (1,290) ọjọ́ máa wà. 12  “Aláyọ̀ ni ẹni tó ń fojú sọ́nà,* tó sì dé ní ẹgbẹ̀rún kan ó lé ọgọ́rùn-ún mẹ́ta àti márùndínlógójì (1,335) ọjọ́! 13  “Àmọ́ ní tìrẹ, máa lọ sí òpin. O máa sinmi, àmọ́ wàá dìde fún ìpín rẹ* ní òpin àwọn ọjọ́.”+

Àlàyé Ìsàlẹ̀ Ìwé

^ Ó túmọ̀ sí “Ta Ló Dà Bí Ọlọ́run?”
^ Ní Héb., “àwọn ọmọ àwọn èèyàn rẹ.”
^ Tàbí “yẹ̀ ẹ́ [ìyẹn, ìwé náà] wò fínnífínní.”
^ Tàbí “aṣọ àtàtà.”
^ Ìyẹn, àkókò mẹ́ta àti ààbọ̀.
^ Tàbí “ẹbọ ìgbà gbogbo.”
^ Tàbí “tó ń retí lójú méjèèjì.”
^ Tàbí “ní ibi tí a pín ọ sí.”

Ẹ̀tọ́ tó bá ìtẹ̀jáde yìí rìn