Mátíù 21:1-46

21  Tóò, nígbà tí wọ́n sún mọ́ Jerúsálẹ́mù, tí wọ́n sì dé Bẹtifágè lórí Òkè Ńlá Ólífì, nígbà náà ni Jésù rán ọmọ ẹ̀yìn méjì jáde,+  ó wí fún wọn pé: “Ẹ mú ọ̀nà yín pọ̀n lọ sínú abúlé tí ẹ ń wò yìí, lójú-ẹsẹ̀ ni ẹ ó sì rí kẹ́tẹ́kẹ́tẹ́ kan tí a so, àti agódóńgbó kan pẹ̀lú rẹ̀; ẹ tú wọn, kí ẹ sì mú wọn wá fún mi.+  Bí ẹnì kan bá sì sọ ohunkóhun fún yín, kí ẹ sọ pé, ‘Olúwa nílò wọn.’ Látàrí ìyẹn, yóò fi wọ́n ránṣẹ́ lẹ́sẹ̀kẹsẹ̀.”  Èyí ṣẹlẹ̀ ní ti gidi kí ohun tí a sọ nípasẹ̀ wòlíì náà lè ṣẹ, pé:  “Ẹ sọ fún ọmọbìnrin Síónì pé, ‘Wò ó! Ọba rẹ ń bọ̀ lọ́dọ̀ rẹ,+ onínú tútù,+ ó sì gun kẹ́tẹ́kẹ́tẹ́, bẹ́ẹ̀ ni, lórí agódóńgbó, ọmọ ẹranko arẹrù.’”+  Nítorí náà, àwọn ọmọ ẹ̀yìn náà mú ọ̀nà wọn pọ̀n, wọ́n sì ṣe gan-an gẹ́gẹ́ bí Jésù ti pa àṣẹ ìtọ́ni fún wọn.  Wọ́n sì mú kẹ́tẹ́kẹ́tẹ́ náà àti agódóńgbó rẹ̀ wá, wọ́n sì tẹ́ ẹ̀wù àwọ̀lékè wọn sórí ìwọ̀nyí, òun fúnra rẹ̀ sì jókòó lórí wọn.+  Ọ̀pọ̀ jù lọ lára ogunlọ́gọ̀ náà tẹ́ ẹ̀wù àwọ̀lékè+ wọn sí ojú ọ̀nà, nígbà tí àwọn mìíràn bẹ̀rẹ̀ sí gé àwọn ẹ̀ka lulẹ̀ láti ara àwọn igi, tí wọ́n sì ń tẹ́ wọn sí ojú ọ̀nà.+  Ní ti àwọn ogunlọ́gọ̀ náà, àwọn tí ń lọ níwájú rẹ̀ àti àwọn tí ń tẹ̀ lé e ń ké jáde ṣáá pé: “Gba Ọmọkùnrin Dáfídì+ là, ni àwa bẹ̀bẹ̀!+ Alábùkún ni ẹni tí ń bọ̀ ní orúkọ Jèhófà!+ Gbà á là, ni àwa bẹ̀bẹ̀, ní ibi gíga lókè!”+ 10  Wàyí o, nígbà tí ó wọ Jerúsálẹ́mù,+ arukutu sọ ní gbogbo ìlú ńlá náà, wọ́n ń sọ pé: “Ta ni èyí?” 11  Àwọn ogunlọ́gọ̀ náà ń sọ ṣáá pé: “Èyí ni wòlíì+ náà Jésù, láti Násárétì ti Gálílì!” 12  Jésù sì wọ inú tẹ́ńpìlì, ó sì lé gbogbo àwọn tí ń tà, tí wọ́n sì ń rà nínú tẹ́ńpìlì síta, ó sì sojú tábìlì àwọn olùpààrọ̀ owó dé àti bẹ́ǹṣì àwọn tí ń ta àdàbà.+ 13  Ó sì wí fún wọn pé: “A ti kọ̀wé rẹ̀ pé, ‘Ilé mi ni a óò máa pè ní ilé àdúrà,’+ ṣùgbọ́n ẹ ń sọ ọ́ di hòrò àwọn ọlọ́ṣà.”+ 14  Pẹ̀lúpẹ̀lù, àwọn afọ́jú àti àwọn arọ wá sọ́dọ̀ rẹ̀ nínú tẹ́ńpìlì, ó sì wò wọ́n sàn. 15  Nígbà tí àwọn olórí àlùfáà àti àwọn akọ̀wé òfin rí àwọn ohun ìyanu tí ó ṣe+ àti àwọn ọmọdékùnrin tí ń ké jáde ní tẹ́ńpìlì, tí wọ́n sì ń sọ pé: “Gba Ọmọkùnrin Dáfídì+ là, ni àwa bẹ̀bẹ̀!”+ ìkannú wọ́n ru 16  wọ́n sì sọ fún un pé: “Ìwọ ha gbọ́ ohun tí àwọn wọ̀nyí ń sọ?” Jésù sọ fún wọn pé: “Bẹ́ẹ̀ ni. Ṣé ẹ kò tíì ka+ èyí rí pé, ‘Láti ẹnu àwọn ìkókó àti àwọn ọmọ ẹnu ọmú ni o ti mú ìyìn jáde’?”+ 17  Àti ní fífi wọ́n sílẹ̀ sẹ́yìn, ó jáde kúrò ní ìlú ńlá náà lọ sí Bẹ́tánì, ó sì sùn mọ́jú níbẹ̀.+ 18  Nígbà tí ó ń padà sí ìlú ńlá náà ní kùtùkùtù òwúrọ̀, ebi ń pa á.+ 19  Ó sì tajú kán rí igi ọ̀pọ̀tọ́ kan ní ojú ọ̀nà, ó sì lọ sí ìdí rẹ̀, ṣùgbọ́n kò rí nǹkan kan+ lórí rẹ̀ àyàfi ewé nìkan, ó sì wí fún un pé: “Kí èso kankan má ṣe so lórí rẹ mọ́ títí láé.”+ Igi ọ̀pọ̀tọ́ náà sì rọ ní ìṣẹ́jú akàn. 20  Ṣùgbọ́n nígbà tí àwọn ọmọ ẹ̀yìn rí èyí, wọ́n ṣe kàyéfì, wí pé: “Èé ti rí tí igi ọ̀pọ̀tọ́ náà fi rọ ní ìṣẹ́jú akàn?”+ 21  Ní ìdáhùn, Jésù wí fún wọn pé: “Lóòótọ́ ni mo wí fún yín, Bí ẹ bá sáà ti ní ìgbàgbọ́, tí ẹ kò sì ṣiyèméjì,+ kì í ṣe pé ẹ ó ṣe ohun ti mo ṣe sí igi ọ̀pọ̀tọ́ náà nìkan ni, ṣùgbọ́n bí ẹ bá sọ fún òkè ńlá yìí pẹ̀lú pé, ‘Gbéra sọ sínú òkun,’ yóò ṣẹlẹ̀.+ 22  Gbogbo ohun tí ẹ bá sì béèrè nínú àdúrà, pẹ̀lú ìgbàgbọ́, ni ẹ óò rí gbà.”+ 23  Wàyí o, lẹ́yìn tí ó lọ sínú tẹ́ńpìlì, àwọn olórí àlùfáà àti àwọn àgbà ọkùnrin àwọn ènìyàn náà wá sọ́dọ̀ rẹ̀ nígbà tí ó ń kọ́ni, wọ́n sì wí pé:+ “Ọlá àṣẹ wo ni ìwọ fi ń ṣe nǹkan wọ̀nyí? Ta ní sì fún ọ ní ọlá àṣẹ yìí?”+ 24  Ní ìfèsìpadà, Jésù wí fún wọn pé: “Dájúdájú, èmi, pẹ̀lú, yóò béèrè ohun kan lọ́wọ́ yín. Bí ẹ bá sọ ọ́ fún mi, dájúdájú, èmi pẹ̀lú yóò sọ ọlá àṣẹ tí mo fi ń ṣe nǹkan wọ̀nyí fún yín:+ 25  Ìbatisí láti ọwọ́ Jòhánù, láti orísun wo ni ó ti wá? Ṣé láti ọ̀run ni tàbí láti ọ̀dọ̀ ènìyàn?”+ Ṣùgbọ́n wọ́n bẹ̀rẹ̀ sí fèrò wérò láàárín ara wọn, pé: “Bí a bá sọ pé, ‘Láti ọ̀run,’ yóò sọ fún wa pé, ‘Èé ṣe, nígbà náà, tí ẹ kò gbà á gbọ́?’+ 26  Ṣùgbọ́n, bí àwa bá sọ pé, ‘Láti ọ̀dọ̀ ènìyàn,’ ẹ̀rù ogunlọ́gọ̀ yìí ń bà wá,+ nítorí gbogbo wọn ka Jòhánù sí wòlíì.”+ 27  Nítorí náà, ní dídá Jésù lóhùn, wọ́n sọ pé: “Àwa kò mọ̀.” Òun, ẹ̀wẹ̀, sọ fún wọn pé: “Bẹ́ẹ̀ ni èmi kì yóò sọ ọlá àṣẹ tí mo fi ń ṣe nǹkan wọ̀nyí fún yín.+ 28  “Kí ni ẹ̀yin rò? Ọkùnrin kan ní ọmọ méjì.+ Ní lílọ sọ́dọ̀ èyí àkọ́kọ́, ó wí pé, ‘Ọmọ, lọ ṣiṣẹ́ lónìí nínú ọgbà àjàrà.’ 29  Ní ìdáhùn, ẹni yìí wí pé, ‘Dájúdájú, èmi yóò lọ, sà,’+ ṣùgbọ́n kò jáde lọ. 30  Ní títọ èkejì lọ, ó sọ ohun kan náà. Ní ìfèsìpadà, ẹni yìí wí pé, ‘Dájúdájú, èmi kì yóò lọ.’ Lẹ́yìn ìgbà náà, ó pèrò dà,+ ó sì jáde lọ. 31  Èwo nínú àwọn méjì náà ni ó ṣe ìfẹ́ baba rẹ̀?”+ Wọ́n wí pé: “Èyí èkejì.” Jésù wí fún wọn pé: “Lóòótọ́ ni mo wí fún yín pé àwọn agbowó orí àti àwọn aṣẹ́wó ń lọ sínú ìjọba Ọlọ́run ṣáájú yín. 32  Nítorí Jòhánù wá sọ́dọ̀ yín ní ọ̀nà òdodo,+ ṣùgbọ́n ẹ kò gbà á gbọ́.+ Bí ó ti wù kí ó rí, àwọn agbowó orí àti àwọn aṣẹ́wó gbà á gbọ́,+ àti pé, bí ó tilẹ̀ jẹ́ pé ẹ rí èyí, ẹ kò pèrò dà lẹ́yìn ìgbà náà kí ẹ lè gbà á gbọ́. 33  “Ẹ gbọ́ àpèjúwe mìíràn: Ọkùnrin kan wà, baálé ilé kan,+ tí ó gbin ọgbà àjàrà kan, ó ṣe ọgbà yí i ká, ó sì gbẹ́ ibi ìfúntí wáìnì sínú rẹ̀, ó sì gbé ilé gogoro kan nà ró,+ ó sì gbé e fún àwọn aroko, ó sì rin ìrìn àjò lọ sí ìdálẹ̀.+ 34  Nígbà tí àsìkò èso dé, ó rán àwọn ẹrú rẹ̀ lọ sọ́dọ̀ àwọn aroko náà láti gba àwọn èso rẹ̀. 35  Bí ó ti wù kí ó rí, àwọn aroko náà mú àwọn ẹrú rẹ̀, wọ́n sì lu ọ̀kan ní ìlùkulù, òmíràn ni wọ́n pa, òmíràn ni wọ́n sọ lókùúta.+ 36  Ó tún rán àwọn ẹrú mìíràn lọ, tí iye wọ́n ju ti àkọ́kọ́, ṣùgbọ́n wọ́n ṣe ohun kan náà sí àwọn wọ̀nyí.+ 37  Níkẹyìn, ó rán ọmọ rẹ̀ sí wọn, ó wí pé, ‘Wọn yóò bọ̀wọ̀ fún ọmọ mi.’ 38  Nígbà tí wọ́n rí ọmọ náà, àwọn aroko náà sọ láàárín ara wọn pé, ‘Ajogún nìyí;+ ẹ wá, ẹ jẹ́ kí a pa á, kí a sì gba ogún rẹ̀!’+ 39  Nítorí náà, wọ́n mú un, wọ́n sì sọ ọ́ sóde ọgbà àjàrà náà, wọ́n sì pa á.+ 40  Nítorí náà, nígbà tí ẹni tí ó ni ọgbà àjàrà náà bá dé, kí ni yóò ṣe fún àwọn aroko wọnnì?” 41  Wọ́n wí fún un pé: “Nítorí wọ́n jẹ́ ẹni búburú, òun yóò mú ìparun búburú+ wá sórí wọn, yóò sì gbé ọgbà àjàrà náà fún àwọn aroko mìíràn, àwọn tí yóò fún un ní àwọn èso nígbà tí àkókò wọ́n bá tó.”+ 42  Jésù wí fún wọn pé: “Ṣé ẹ kò tíì kà nínú Ìwé Mímọ́ rí pé, ‘Òkúta tí àwọn akọ́lé kọ̀ tì+ ni èyí tí ó ti di olórí òkúta igun ilé.+ Ọ̀dọ̀ Jèhófà ni èyí ti wá, ó sì jẹ́ ohun ìyanu ní ojú wa’? 43  Ìdí nìyí tí mo fi wí fún yín pé, A ó gba ìjọba Ọlọ́run kúrò lọ́wọ́ yín, a ó sì fi fún orílẹ̀-èdè tí yóò máa mú èso rẹ̀ jáde.+ 44  Pẹ̀lúpẹ̀lù, ẹni tí ó bá ṣubú lu òkúta yìí ni a óò fọ́ túútúú. Ní ti ẹnikẹ́ni tí ó bá bọ́ lù, yóò lọ̀ ọ́ lúúlúú.”+ 45  Wàyí o, nígbà tí àwọn olórí àlùfáà àti àwọn Farisí ti gbọ́ àwọn àpèjúwe rẹ̀, wọ́n ṣàkíyèsí pé ó ń sọ̀rọ̀ nípa wọn.+ 46  Ṣùgbọ́n, bí ó tilẹ̀ jẹ́ pé wọ́n ń wá ọ̀nà láti gbá a mú, wọ́n bẹ̀rù àwọn ogunlọ́gọ̀, nítorí pé àwọn wọ̀nyí kà á sí wòlíì.+

Àlàyé Ìsàlẹ̀ Ìwé