Máàkù 3:1-35

3  Lẹ́ẹ̀kan sí i, ó wọ inú sínágọ́gù kan, ọkùnrin kan sì wà níbẹ̀ tí ọwọ́ rẹ̀ gbẹ hangogo.+ 2  Nítorí náà, wọ́n ń ṣọ́ ọ lójú méjèèjì láti rí i bóyá yóò wo ọkùnrin náà sàn ní sábáàtì, kí wọ́n bàa lè fẹ̀sùn kàn án.+ 3  Ó sì wí fún ọkùnrin tí ọwọ́ rẹ̀ rọ pé: “Dìde, kí o sì wá sí àárín.” 4  Lẹ́yìn náà, ó wí fún wọn pé: “Ó ha bófin mu ní sábáàtì láti ṣe iṣẹ́ rere tàbí láti ṣe iṣẹ́ búburú, láti gba ọkàn là tàbí láti pa á?”+ Ṣùgbọ́n wọ́n dákẹ́. 5  Lẹ́yìn tí ó sì ti wò wọ́n yí ká pẹ̀lú ìkannú, nítorí tí ó ní ẹ̀dùn-ọkàn gidigidi sí yíyigbì ọkàn-àyà wọn,+ ó sọ fún ọkùnrin náà pé: “Na ọwọ́ rẹ.” Ó sì nà án, a sì mú ọwọ́ rẹ̀ padà bọ̀ sípò.+ 6  Látàrí ìyẹn, àwọn Farisí jáde lọ, wọ́n sì bẹ̀rẹ̀ sí gbìmọ̀ lẹ́sẹ̀kẹsẹ̀ pẹ̀lú àjọ ẹgbẹ́ ọmọlẹ́yìn Hẹ́rọ́dù+ lòdì sí i, láti pa á run.+ 7  Ṣùgbọ́n Jésù pẹ̀lú àwọn ọmọ ẹ̀yìn rẹ̀ fi ibẹ̀ sílẹ̀ lọ sí òkun; ògìdìgbó ńlá láti Gálílì àti láti Jùdíà sì tẹ̀ lé e.+ 8  Àní láti Jerúsálẹ́mù àti láti Ídúmíà àti láti òdì-kejì Jọ́dánì àti àyíká Tírè+ àti Sídónì, ni ògìdìgbó ńlá ti wá sọ́dọ̀ rẹ̀, nígbà tí wọ́n gbọ́ nípa bí àwọn ohun tí ó ń ṣe ti pọ̀ tó. 9  Ó sì sọ fún àwọn ọmọ ẹ̀yìn rẹ̀ pé kí wọ́n jẹ́ kí ọkọ̀ ojú omi kékeré kan wà lárọ̀ọ́wọ́tó nígbà gbogbo fún ìlò òun, kí ogunlọ́gọ̀ má bàa há a gádígádí. 10  Nítorí tí ó wo ọ̀pọ̀ ènìyàn sàn, pẹ̀lú ìyọrísí náà pé gbogbo àwọn tí wọ́n ní òkùnrùn burúkú ń ṣù mọ́ ọn láti fọwọ́ kàn án.+ 11  Àwọn ẹ̀mí àìmọ́ pàápàá,+ nígbàkigbà tí wọ́n bá rí i, wọn a wólẹ̀ níwájú rẹ̀, wọn a sì ké jáde, pé: “Ìwọ ni Ọmọ Ọlọ́run.”+ 12  Ṣùgbọ́n ní ọ̀pọ̀ ìgbà, ó pàṣẹ kíkankíkan fún wọn láti má ṣe sọ òun di mímọ̀.+ 13  Ó sì gun òkè ńlá kan, ó sì fi ọlá àṣẹ pe àwọn tí ó fẹ́,+ wọ́n sì lọ sọ́dọ̀ rẹ̀.+ 14  Ó sì kó àwùjọ àwọn méjìlá jọ, àwọn tí ó pè ní “àpọ́sítélì” pẹ̀lú, kí wọ́n lè máa bá a lọ ní wíwà pẹ̀lú òun, kí ó sì lè rán wọn jáde láti wàásù+ 15  àti láti ní ọlá àṣẹ láti máa lé àwọn ẹ̀mí èṣù jáde.+ 16  Àwùjọ àwọn méjìlá tí ó kó jọ sì ni Símónì, ẹni tí ó fún ní orúkọ àpèlé náà Pétérù,+ 17  àti Jákọ́bù ọmọkùnrin Sébédè àti Jòhánù arákùnrin Jákọ́bù+ (ó tún fún àwọn wọ̀nyí ní orúkọ àpèlé náà Bóánágè, èyí tí ó túmọ̀ sí àwọn Ọmọ Ààrá), 18  àti Áńdérù àti Fílípì àti Bátólómíù àti Mátíù àti Tọ́másì àti Jákọ́bù ọmọkùnrin Áfíọ́sì àti Tádéọ́sì àti Símónì tí í ṣe Kánánéánì 19  àti Júdásì Ísíkáríótù, ẹni tí ó dà á níkẹyìn.+ Ó sì wọ ilé kan. 20  Lẹ́ẹ̀kan sí i, ogunlọ́gọ̀ náà kóra jọ, tó bẹ́ẹ̀ tí wọn kò lè jẹ oúnjẹ pàápàá.+ 21  Ṣùgbọ́n nígbà tí àwọn ẹbí+ rẹ̀ gbọ́ nípa rẹ̀, wọ́n jáde lọ láti gbá a mú, nítorí wọ́n ń wí pé: “Orí rẹ̀ ti yí.”+ 22  Pẹ̀lúpẹ̀lù, àwọn akọ̀wé òfin tí wọ́n sọ̀ kalẹ̀ wá láti Jerúsálẹ́mù ń wí pé: “Ó ní Béélísébúbù, ó sì ń lé àwọn ẹ̀mí èṣù jáde nípasẹ̀ olùṣàkóso àwọn ẹ̀mí èṣù.”+ 23  Nítorí náà, lẹ́yìn tí ó ti pè wọ́n wá sọ́dọ̀ ara rẹ̀, ó bẹ̀rẹ̀ sí fi àwọn àpèjúwe sọ fún wọn pé: “Báwo ni Sátánì ṣe lè lé Sátánì jáde? 24  Họ́wù, bí ìjọba kan bá pínyà sí ara rẹ̀, ìjọba yẹn kò ní lè dúró;+ 25  bí ilé kan bá sì pínyà sí ara rẹ̀, ilé yẹn kì yóò lè dúró.+ 26  Pẹ̀lúpẹ̀lù, bí Sátánì bá ti dìde lòdì sí ara rẹ̀, tí ó sì pínyà, kò ní lè dúró, ṣùgbọ́n ó ń bọ̀ wá sí òpin.+ 27  Ní ti tòótọ́, kò sí ẹnì kan tí ó dé inú ilé ọkùnrin alágbára kan tí ó lè piyẹ́+ àwọn ẹrù rẹ̀ tí ó ṣeé gbé, láìjẹ́ pé ó kọ́kọ́ de ọkùnrin alágbára náà, lẹ́yìn náà, yóò sì piyẹ́ ilé rẹ̀.+ 28  Lóòótọ́ ni mo wí fún yín pé ohun gbogbo ni a óò dárí ji àwọn ọmọ ènìyàn, ẹ̀ṣẹ̀ yòówù kí wọ́n dá àti ọ̀rọ̀ òdì yòówù kí wọ́n sọ lọ́nà ọ̀rọ̀ òdì.+ 29  Bí ó ti wù kí ó rí, ẹnì yòówù tí ó bá sọ̀rọ̀ òdì sí ẹ̀mí mímọ́, kò ní ìdáríjì kankan títí láé, ṣùgbọ́n ó jẹ̀bi ẹ̀ṣẹ̀ àìnípẹ̀kun.”+ 30  Èyí jẹ́, nítorí wọ́n ń wí pé: “Ó ní ẹ̀mí àìmọ́.”+ 31  Wàyí o, ìyá rẹ̀ àti àwọn arákùnrin rẹ̀+ wá, àti pé, bí wọ́n ṣe dúró lòde, wọ́n ránṣẹ́ wọlé lọ bá a láti pè é wá.+ 32  Gẹ́gẹ́ bí ó ti jẹ́, ogunlọ́gọ̀ jókòó yí i ká, nítorí náà wọ́n wí fún un pé: “Wò ó! Ìyá rẹ àti àwọn arákùnrin rẹ ń wá ọ lóde.”+ 33  Ṣùgbọ́n ní ìfèsìpadà ó wí fún wọn pé: “Ta ni ìyá mi àti àwọn arákùnrin mi?”+ 34  Lẹ́yìn tí ó sì ti wo àwọn tí wọ́n jókòó yí i ká bìrìkìtì, ó wí pé: “Wò ó, ìyá mi àti àwọn arákùnrin mi!+ 35  Ẹnì yòówù tí ó bá ń ṣe ìfẹ́ Ọlọ́run, ẹni yìí ni arákùnrin àti arábìnrin àti ìyá mi.”+

Àlàyé Ìsàlẹ̀ Ìwé