Mman ko pi n'en ni bay riy

Mman ko secondary menu

Mman ko table of contents

Pi Mich Rok Jehovah

Waab

Mang e Ri Be Fil e Bible?

 GURUY NI 19

Um Par ni Gab T’uf rok Got

Um Par ni Gab T’uf rok Got
  • Mang e be yip’ fan ni nge t’uf Got rom?

  • Uw rogon nrayog ni ngaud pared ni gad ba t’uf rok Got?

  • Uw rogon nra tow’athnag Jehovah e piin ni yad be par ni yad ba t’uf rok?

Ga ra tay ni Jehovah e ir e manaf rom e ngiyal’ ney ni boor e magawon, fa?

1, 2. Uw e rayog ni ngad pirieged e ayuw riy e ngiyal’ ney?

SUSUN e ga be yan u kanawo’ reb e rran nib kireb e lang. Be mat e uluch ma be chub e dirra’ ma be aw e n’uw nib gel. Ba mudugil ni ga ra gay bang ni ngam naf ngay. Faan mu sap mag guy reb e koyeng u charen e kanawo’ nrayog nim naf ngay, ma sana karim felfelan’.

2 Gad be par u ba ngiyal’ ni gowa ba kireb e lang. Be gel e kireb i yan ko pi n’en ni be buch u fayleng. Machane bay bang nrayog ni ngad nafgad ngay, ni bang ndabi buch ban’en rodad riy. Uw e gin’em nrayog ni ngad nafgad ngay? Be gaar e Bible: “I gur e ga be yoror rog me gur e gu be naf ngom! I gur e Got rog; ni gur e ke pagan’ug ngom.”​—Psalm 91:2.

3. Uw rogon ni nge mang Jehovah e manaf rodad?

3 Rayog ni nge mang Jehovah e manaf  rodad ya ir e En ni Tasunmiy ma ir e Pilung ko gubin ban’en. Rayog ni nge yororiydad ya ba gel gelngin maku rayog ni nge ayuwegdad u gubin mit e riya’ nra yib ngodad. Demtrug e gafgow nra yib ngodad, ma rayog rok Jehovah ni nge chuweg. Uw rogon nrayog ni ngad nafgad ngak Jehovah? Thingar da pagedan’dad ngak. Be yog e Bible ni gaar: “Um pired ni gimed ba t’uf rok Got.” (Jude 21) Arrogon, thingar ud pared ni gad ba t’uf rok Got mab fel’ thildad ya ir e Chitamangidad nu tharmiy. Aram rogon nrayog ni nge mich u wun’dad ni ir e manaf rodad. Machane uw rogon ni nge fel’ thildad Got?

NGAM NANG ME M’UG E T’UFEG ROK GOT ROM

4, 5. Mang boch e kanawo’ ni ke dag Jehovah riy ni gad ba t’uf rok?

4 Thingari tamilang u wun’dad rogon ni ke t’ufegdad Jehovah ya nge yag ni ngad pared ni gad ba t’uf rok. Am lemnag boch e machib nu Bible ni kam fil u lan e re ke babyor ney. Jehovah ni ir e En ni Tasunmiy e ke pi’ e re fayleng ney ngodad ni nge mang tafedad. Ke suguy e re fayleng ney ko ggan nge ran nge tin ni nge yag ngodad, ma bay e gamanman riy nib fel’ nge binaw nib fel’ yaan. Bay e thin rok Got u lan e Bible ni ke tamilangnag e ngachal rok nge pi fel’ngin ngodad. Ku be tamilangnag e Bible ni ke l’og Got Fak nga fayleng ni nge gafgow me yim’ ni fan ngodad. (John 3:16) Mang e ra yag ngodad ni bochan e re tow’ath nem? Rayog ni ngad athapeged boch e flaab ni ka bay nga m’on.

5 Maku bay ban’en ni ke rin’ Got ni fan e ngad athapeged ban’en nib fel’ ko gabul nge langlath. Ke ngongliy Jehovah ba am u tharmiy ni  aram Gil’ilungun  fare Messiah. Dabki n’uw nap’an ma ra chuweg urngin e gafgow me paradisnag e fayleng. Ma rayog ni ngad pared u paradis u fithik’ e gapas nge felfelan’ ni manemus. (Psalm 37:29) Machane be pow’iydad Got e chiney ya ngad rin’ed e tin nib mat’aw ban’en. Ke pi’ e tow’ath ngodad nrayog ni ngad meybilgad ngak ma rayog ni ngad nonad ngak ni yugu demtrug e ngiyal’ nge gin gad bay riy. Ereray boch e kanawo’ ni ke dag Jehovah nib t’uf gubin e girdi’ nu fayleng rok.

6. Mang e ngam rin’ ni bochan e gab t’uf rok Jehovah?

6 Baaray reb e deer nib ga’ fan nrayog ni ngam fithem riy: Uw rogon ni nge m’ug e t’ufeg rok Jehovah rog? Boor e girdi’ e yad ra fulweg ni lungurad, “Thingari t’uf Jehovah rog.” Aram rogon u wan’um, fa? Ke yog Jesus ni ereray e bin th’abi ga’ fan e motochiyel: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.” (Matthew 22:37) Boor fan ni nge t’uf Jehovah Got rom. Machane ga be lemnag mab gaman ni kemus ni ngaum lemnag nib t’uf Jehovah rom u polo’ i gum’irchaem, ngu polo’ lanin’um, ngu polo’ i lem rom, fa?

7. Ka bay boch ban’en ni ngam rin’ ko t’ufeg rom ngak Got fa kemus ni ngaum lemnag? Mu weliy rogon.

7 Be tamilangnag e Bible ni gathi kemus ni ngaum lemnag nib t’uf Jehovah rom. Riyul’ nib ga’ fan e t’ufeg rom ngak Jehovah, machane ireray tabolngin e t’ufeg ni riyul’ ngak Got. Bod awochngin e arfath ni kemus ni bang ko arfath, ere faanra mu lemnag nib t’uf Jehovah rom ma kemus ni bochi yang fare t’ufeg ngak Got e bay  rom. Be gaar e Bible: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.” (1 John 5:3) Faanra riyul’ e t’ufeg rodad ngak Got ma thingari yib wom’engin nib fel’, me m’ug ko ngongol rodad.​—Mu beeg e Matthew 7:16-20.

8, 9. Uw rogon ni ngad daged nib t’uf Got rodad ma gad be pining e magar ngak?

8 Gad ra dag nib t’uf Got rodad u nap’an ni gad be fil e pi motochiyel rok ma gad be fol riy. De mo’maw’ ni ngan rin’ e re n’ey. Ya pi motochiyel rok Jehovah e ma ayuwegdad ni nge fel’ rogon e yafas rodad ma gad felfelan’. (Isaiah 48:17, 18) Nap’an ni gad ra fol ko fonow rok Jehovah ma aram e gad be dag ngak e Chitamangidad nu tharmiy nri gad be tayfan ma gad be pining e magar ko pi n’en ni ke rin’ ni fan ngodad. Ri buchuuw e girdi’ nu fayleng ni ma pining e magar ni aram rogon. Dubdad ni ngad boded e girdi’ kakrom u  nap’an Jesus nda ur pininged e magar. I golnag Jesus ragag e girdi’ ni bay e daraw rorad, machane kemus ni taa bagayad e sul nge pining e magar ngak. (Luke 17:12-17) Dabisiy ni gad baadag ni ngad boded faanem ni ke pining e magar ma gathi ngad boded fa mereb nem ndar pininged e magar!

9 Ere, mang boch e pi motochiyel rok Jehovah ni ngad folgad riy? Kad weliyed boch e pi motochiyel nem u lan e re ke babyor ney, machane ngad sulod nga daken boch e pi motochiyel nem. Ya faan gad ra fol ko pi motochiyel rok Got ma rayog ni nguud pared ni gad ba t’uf rok.

MU CHUCHUGUR NGAK JEHOVAH

10. Mu weliy ko mang nib ga’ fan ni nguud filed murung’agen Jehovah Got.

10 Ngan fil murung’agen Jehovah e aram reb e kanawo’ ni ngan chugur ngak. Ma susun e dab da talgad i fil murung’agen Jehovah. Faanra ga bay u wen nnep’ u ba ngiyal’ nrib gel e ulum ma ga be ror ko nifiy, ma ga ra pag ni nge achig fare nifiy nge math, fa? Danga’. Ya ga ra tay e l’ud ngay ni fan e nge gel e gowel riy. Ga ra rin’ ya yafas rom e be yan u rogon gowelngin fare nifiy! L’ud e ma gelnag e nifiy, ere faanra mu nang “murung’agen Got” nib fel’ rogon ma ra gel e t’ufeg rom ngak.​—Proverbs 2:1-5, BT.

T’ufeg rom ngak Jehovah e bod ba nifiy nib t’uf e l’ud ngay ya nge par ni be yik’

11. Mang angin e machib rok Jesus ni yib ngak l’agruw i gachalpen?

11 Baadag Jesus ni nge gel e t’ufeg rok pi gachalpen, mi yad t’ufeg Jehovah nge Thin rok. Tomuren ni fas Jesus ko yam’ me fil ngak l’agruw i gachalpen fapi thin ko profet u lan e Bible nyoloy nthin ni Hebrew ni ke lebug. Mang angin e machib rok? I lungurow: “Gathi da thamiyew rodow  ni bod ba nifiy ni be yik’ u ngorongordow ni faani i welthin ngodow u daken e kanawo’ me weliy fan fapi thin nu babyor nib thothup ngodow?”​—Luke 24:32.

12, 13. (a) Uw rogon u wan’ boor e girdi’ e t’ufeg ngak Got nge Bible e ngiyal’ ney? (b) Uw rogon ni nge dabi war e t’ufeg rodad?

12 Nap’an ni ka fin mu un i fil e Bible, ma gathi kam pirieg ni gowa be yik’ u ngorongorem ni bochan e felfelan’ ma ke pasig lanin’um, ma ga baadag ni ngam t’ufeg Got? Dabisiy ni arrogon. Ku arrogon laniyan’ bokum e girdi’. Chiney e rib ga’ fan ni ngki par e re t’ufeg nem nib gel. Dubdad ni ngad boded e girdi’ nu fayleng. I gaar Jesus: “Ma aram gelngin ni bayi wer ko girdi’ e tin nib kireb ni aram e rogon nib t’uf be’ rok be’ e bayi meewar.” (Matthew 24:12) Uw rogon nrayog ni ngam ayuw ni nge dabi war e t’ufeg rom ngak Jehovah nge machib nu Bible?

13 Mu ulul ngam fil murung’agen Jehovah Got nge Jesus Kristus. (John 17:3) Am fal’eg i lemnag fapi machib ni kam fil ko Thin rok Got ma ga fithem: ‘Mang e be fil e re machib ney ngog u murung’agen Jehovah Got? Mang ko re machib ney e be ayuwegeg ni ngki t’uf Got rog u polo’ i gum’irchaeg, ngu polo’ i lanin’ug, ngu polo’ e yafos rog?’ (Mu beeg e 1 Timothy 4:15.) Ga ra fal’eg i lemnag e machib ni kam fil ma ra gel e t’ufeg rom ngak Jehovah.

14. Uw rogon nra ayuwegdad e meybil ni ngi i par nib t’uf Jehovah rodad?

14 Ku reb e kanawo’ ni ngki par nib t’uf Jehovah rodad e ngad meybilgad ngak ni gubin ngiyal’. (1 Thessalonika 5:17) U lan e Guruy ni 17 ko re ke babyor ney e kad filed riy ni meybil e aram reb e tow’ath nrib ga’ fan ni yib rok Got. Bod rogon nra fel’ thilin e girdi’ ni faan  yad ra sabethin nib puf e thin rorad, ere ku arrogon nra fel’ i yan thildad Jehovah ni faan gad ra meybil ngak ni gubin ngiyal’. Rib ga’ fan ni ngad yibilayed e pi n’en ni bay u lanin’dad ma dab ud sulod u daken taab bugithin ni boor yay. Thingar da nonad ngak Jehovah ni bod rogon reb e bitir ni ma non ngak e chitamangin nib t’uf rok. Thingar da nonad ngak u fithik’ e tayfan nge yul’yul’ ma ngad weliyed e tin ni ke yib u gum’ircha’dad. (Psalm 62:8) Arrogon, fol Bible nge meybil ni sum u gum’ircha’dad e bang ko liyor rodad ngak Got ma ra ayuwegdad ni nguud pared ni gad ba t’uf rok.

MU FELFELAN’ KO LIYOR NI GA BE TAY

15, 16. Mang fan nrayog ni ngad ted ni fare maruwel ni ngan machibnag Gil’ilungun Got e ba tow’ath nib tolang puluwon?

15 Fol Bible nge meybil e aram rogon ni ga ma liyor ngak Got u bang ni goo gur. Chiney e ngad weliyed rogon ni gad ma liyor ku Got u fithik’ e girdi’. Gad ma rin’ e re n’ey u nap’an ni gad be weliy ko girdi’ e pi n’en ni ke mich u wun’dad. Gur, kam weliy boch e machib nu Bible ngak yugu boch e girdi’? Faanra kam rin’ ma ireram reb e tow’ath ni ngam felfelan’ ngay. (Luke 1:74) Nap’an ni gad ra weliy e machib nriyul’ ni kad filed u murung’agen Jehovah Got, ma gad be un nga reb e maruwel nrib ga’ fan ni kan pi’ ngak urngin e tin riyul’ e Kristiano ni aram e ngan machibnag fare thin nib fel’ u murung’agen Gil’ilungun Got.​—Mu beeg e Matthew 24:14; 28:19, 20.

16 I tay apostal Paul nrib fel’ fare maruwel ni kan pi’ ngak ni nge machib, me yog nre maruwel nem e bod ba machaf nib tolang puluwon. (2 Korinth 4:7) Ngan weliy murung’agen Jehovah Got nge tin nib m’agan’ ngay  e aram e bin th’abi fel’ e maruwel nrayog ni ngam un ngay, ya ga be pigpig ko bin th’abi fel’ e Masta, ma ra yag e bin th’abi fel’ e tow’ath ngom riy. Nap’an ni ga ra un ko re maruwel nem ma aram e ga be ayuweg yugu boch e girdi’ ni yad ba yul’yul’ ni nge fel’ thilrad e Chitamangidad nu tharmiy mi yad lek fare kanawo’ ni yan ko yafas ni manemus! Mang maruwel e kab fel’ ko re maruwel nem? Ra gel e michan’ nge t’ufeg rom ngak Got u nap’an ni ga ra machibnag murung’agen Jehovah nge Thin rok. Ma ra felfelan’ Jehovah ko maruwel ni kam tay. (Hebrews 6:10) Ga ra tiyan’um ko re maruwel nem ma ga ra par ni gab t’uf rok Got.​—Mu beeg e 1 Korinth 15:58.

17. Mang nrib ga’ fan e maruwel rok e pi Kristiano ni ngar machibnaged e girdi’?

17 Dab da paged talin nre maruwel ney ni ngan machibnag murung’agen Gil’ilungun Got e rib ga’ fan. Be gaar e Bible: “Ngam machibnag e thin rok Got ko girdi’ ndemtrug ko kari mab e kanawo’ ngom fa dawor.” (2 Timothy 4:2) Mang nrib ga’ fan e re maruwel ney e ngiyal’ ney? Be gaar e Thin rok Got: “Fare rran ni bayi par Somol nga tagil’ e pufthin e be chugur nrib pey!” (Zefaniah 1:14, BT) Arrogon, dabki n’uw nap’an ma ra chuweg Jehovah e re m’ag ney. Thingar ni ginang e girdi’! Ba t’uf ni ngar nanged ni ereray e ngiyal’ ni ngar turguyed ni nge mang Jehovah e Pilung rorad. “Dabi sowath” e ngiyal’ ko tomur.​—Habakkuk 2:3.

18. Mang fan ni thingar da liyorgad e pi Kristiano ngak Jehovah u taabang?

18 Baadag Jehovah ni nge liyor e tin riyul’ e Kristiano ngak u taabang. Aram fan ni be yog e Thin rok ni be gaar: “Ere nge bagadad ma ngi i lemnag bagadad, ma  nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndab da paged e muulung rodad, ni bod rogon ni be rin’ boch e girdi’. Ma nge bagadad me pi’ e athamgil  nga laniyan’ bagadad, ngari gel ni fan e gimed be guy ni Chirofen ni bay yib Somol riy e be chugur.” (Hebrews 10:24, 25) Nap’an ni gad ra chag ngak e girdi’ rodad ni yad e Kristiano u nap’an e muulung ma rayog ni ngad pininged e sorok ngak Got ma gad liyor ngak. Ku rayog ni nge bagadad me gelnag e michan’ rok bagadad ma nge bagadad me pi’ e athamgil nga laniyan’ bagadad.

19. Mang e rayog ni ngad rin’ed ya nge gel i yan e t’ufeg u lan e ulung ni Kristiano?

19 Nap’an ni gad ra chag ngak e piin ni yad ma liyor ngak Jehovah ma ra gel e t’ufeg me fel’ e thin ko girdi’ u lan e ulung. Ra bagadad ma thingari yaliy e tin nib fel’ ko ngongol rok bagadad ni bod rogon ni ma yaliy Jehovah e tin nib fel’ ni gad ma rin’. Dab mu lemnag nib flont girdien e ulung. Dab mu pagtalin nib thilthil gelngin e michan’ rok be’ nge be’ ma gad gubin ni gad ma oloboch. (Mu beeg e Kolose 3:13.) Faan ga ra guy rogon ni nge fel’ e thin romed e piin nrib t’uf Jehovah rorad ma ga ra pirieg nra gel e michan’ rom i yan. Arrogon, ga ra chag ngak e piin ni be liyor ku Jehovah ma yad ra ayuwegem ni nguum par ni gab t’uf rok Got. Uw rogon ni ma tow’athnag Jehovah e piin nib yul’yul’ ni yad ma liyor ngak ni yad ba t’uf rok?

MU ATHAMGIL NI NGE YAG E “BIN RIYUL’ E YAFOS” NGOM

20, 21. Mang e “bin riyul’ e yafos,” ma mang fan ni aram e athap nrib fel’?

20 Ke pi’ Jehovah e yafas nib tow’ath ngak e pi tapigpig rok ni yad ba yul’yul’. Uw rogon e re yafas nem? Gab fas e chiney, fa? Sana gad ra yog ni gad ba fas. Ya gad ma pogofan, ma gad ma abich, ma gad ma garbod. Ere, rayog ni nga dogned ni gad ba fas. Ma nap’an ni gad ra  felfelan’ ma gad ma yog nri, “Ereray e yafos!” Machane be tamilangnag e Bible ni bin riyul’ riy e dariy be’ nrib fas e chiney.

Baadag Jehovah ni ngam felfelan’ ko “bin riyul’ e yafos.” Ga ra felfelan’ ngay, fa?

21 Be yog e Thin rok Got ni nge “yog ngodad e yafos ni ir e bin riyul’ e yafos.” (1 Timothy 6:19) Re thin ney e be yip’ fan ni “bin riyul’ e yafos” e ban’en ni gad be athapeg ni ka bay boch nga m’on. Arrogon, nap’an ni gad ra flont ma aram e ngiyal’ nrayog ni nga nog nriyul’ ni gad ba fas, ya yafas rodad e ke yan i par ni bod rogon ni lemnag Got aram ko som’on. Nap’an ni gad ra par u paradis u fayleng ni ke fel’ fithik’ i dowdad, ma gad be par u fithik’ e gapas nge felfelan’, ma aram e ke yag ngodad e “yafos ni ir e bin riyul’ e yafos” ni aram e yafas ni manemus. (1 Timothy 6:12) Aram e athap nrib fel’, fa?

22. Uw rogon nra yag e “yafos ni ir e bin riyul’ e yafos” ngom?

22 Uw rogon ni nge “yog e yafos ni ir e bin riyul’ e yafos” ngodad? U lan e re thin nem e i yog Paul ngak e pi Kristiano ni “ngar ngongliyed e tin nib fel’” ma “ngongol nib fel’ e nge yoor ni ngar ngongliyed.” (1 Timothy 6:18) Ere, ba tamilang ni yafos nra yag ngodad e ra yan u rogon ko gad be fol ko machib ni kad filed u lan e Bible fa danga’. Ere gur, be yip’ Paul fan ni faan gad ra ngongliy e ngongol nib fel’ ma aram e ra yag puluwon ngodad ni “bin riyul’ e yafos”? Danga’, ya ra yag e pi flaab ney ngodad ni faan gad ra fol ko “runguy rok Got.” (Roma 5:15) Ma felfelan’ Jehovah ngay ni nge pi’ e tow’ath ngak e piin ni yad ma pigpig ngak u fithik’ e yul’yul’. Baadag ni nge yag e “bin riyul’ e yafos” ngom. Re yafas ni manemus nem u fithik’ e felfelan’ nge gapas e ra yag ngak e piin ni yad ma par ni yad ba t’uf rok Got.

23. Mang fan ni thingar mu par ni gab t’uf rok Got?

 23 Ere, susun ni ngad fithed gadad ni nge lungudad, ‘Gu be liyor ku Got u rogon ni ke yog u lan e Bible, fa?’ Faan gad ra micheg ni gad be liyor ngak Got u gubin e rran ma aram e gad bay ko bin nib mat’aw e kanawo’. Rayog ni nge pagan’dad ngay ni Jehovah e ir e manaf rodad. Ra yororiy e girdi’ rok ni yad ba yul’yul’ u fithik’ e pi magawon ko re m’ag nib kireb ney. Ma ra thapegdad Jehovah nga lan e re m’ag nib beech nem ni ke chugur. Ri gad ba felfelan’ ngay ni gad ra guy e ngiyal’ nem! Ma ngiyal’ nem e gad ra felfelan’ ngay ni kad mel’eged e tin nib fel’ u nap’an e tin tomuren e rran! Faan ga ra mel’eg e tin nib mat’aw e chiney ma ra yag ngom e “yafos ni ir e bin riyul’ e yafos,” ni aram e yafos ni manemus nib m’agan’ Jehovah Got ngay!