Mman ko pi n'en ni bay riy

Mman ko secondary menu

Mman ko table of contents

Pi Mich Rok Jehovah

Waab

Mang e Ri Be Fil e Bible?

 YUGU BOCH E THIN

Jesus Kristus e Ir fare Messiah ni Kan Micheg

Jesus Kristus e Ir fare Messiah ni Kan Micheg

I THAGTHAGNAG Jehovah nga laniyan’ boor e profet u Bible ni ngar yoloyed murung’agen rogon ni yira gargeleg fare Messiah, nge rogon e machib nge yam’ nra tay ni nge thapeg e girdi’ ngak Got. I rin’ Jehovah e pi n’ey ya nge yag nda nanged ko mini’ fare Messiah. Urngin e pi yiiy nu Bible ney e lebug u daken Jesus Kristus. Ri gad ra gin ngay, ya gubin e thin riy nib puluw mab tamilang. Chiney e ngad weliyed boch e yiiy nu Bible ni be weliy rogon ni yira gargeleg fare Messiah nge rogon e yafas rok u nap’an ni kab bitir.

I yiiynag Isaiah ni profet ni fare Messiah e ra yib ko tabinaw rok David ni Pilung. (Isaiah 9:7) Ma riyul’ e re n’ey ya Jesus e yib ko tabinaw rok David.​—Matthew 1:1, 6-17.

Mikah ni ku ir reb e profet rok Got e yiiynag nre tir nem nra mang pilung e yira gargeleg u “Bethlehem Efrathah.” (Mikah 5:2) Nap’an nni gargeleg Jesus ma l’agruw e binaw u Israel ni Bethlehem fithingan. Reb e gali binaw nem e bay nib chugur nga Nazareth ni bay nga lel’uch ko re mach nem, ma reb e bay nib chugur nga Jerusalem u Judah. Fare binaw nu Bethlehem nib chugur nga Jerusalem e u nog yu Efrathah ngay. Ma aram e re binaw nni gargeleg Jesus riy ni bod rogon ni yiiynag e profet!​—Matthew 2:1.

Yugu reb e profet u Bible e yiiynag ni yira pining Fak Got u “Egypt.” Nap’an ni kab achichig Jesus min fek nga Egypt. Ma tomuren ni kem’ Herod mfin ra sulod e tabinaw rok nga Israel ni bod rogon ni yiiynag e profet.​—Hosea 11:1; Matthew 2:15.

Bay boch ban’en u murung’agen fare Messiah ko fapi thin nu Bible ni bay u tan fare thin ni kenggin e “Yiiy ko Profet” ni bay ko fare chart ni kenggin e “ Yiiy u Murung’agen fare Messiah.” Wenig ngom mu beeg e pi thin nu Bible nem ma ga taarebrogonnag ko thin nu Bible ni bay u tan fare thin ni “Rogon ni Ke Lebug.” Ga ra rin’ ni aram rogon ma ra gelnag boch e michan’ rom ko Thin rok Got.

Nap’an ni ga be beeg e pi thin nu Bible ney, ma dab mu pagtalin ni tin ni yiiynag e profet e bokum e duw nra yiiynaged u m’on ko ngiyal’ nni gargeleg Jesus riy. I gaar Jesus: “Urngin ban’en  ni kan yoloy ni murung’ageg u lan babyoren e Motochiyel rok Moses nge tin ni ke yoloy e pi profet, nge tin ni kan yoloy u lan babyoren e pi Psalm ni murung’ageg e thingari yib i m’ug nib riyul’.” (Luke 24:44) Ka ga ra guy ko ke rom e Bible, ma gubin ni ke lebug ni bod rogon ni kan yiiynag u m’on riy!