Mman ko pi n'en ni bay riy

Mman ko secondary menu

Mman ko table of contents

Pi Mich Rok Jehovah

Waab

Mang e Ri Be Fil e Bible?

 YUGU BOCH E THIN

Rogon i Yog Fithingan Got nge Fan

Rogon i Yog Fithingan Got nge Fan

UW ROGON ni kan pilyeg e thin ko Psalm 83:18 ko ke rom e Bible? Baaray rogon ni kan pilyeg ko fare Bible ni New World Translation of the Holy Scriptures. Be gaar: “Nge nangem e girdi’ ni fithingam e Jehovah ni gur e Th’abi Tolang u ga’ngin yang e fayleng.” Ku aram rogon ni kan pilyeg u boch e Bible. Machane, boor e Bible ni kan pilyeg e kan chuweg fare ngachal riy ni Jehovah, kan tay e liw rok ngay ni ‘Somol’ ara ‘Got.’ Susun ni uw rogon ni ngan pilyeg fare thin u Psalm 83:18, ngan tay e liw rok Got ngay fa ngachal rok?

Fithingan Got ni Hebrew

Re thin nu Bible nem e be weliy murung’agen ba ngachal. Nap’an nni yoloy e re thin nu Bible nem, ni thin ni Hebrew ko som’on, ma bay ba ngachal riy. Rogon nni yoloy ni Hebrew e יהוה (YHWH). Ma rogon ni kan pilyeg nthin ni Meriken e “Jehovah.” Gur, kemus ni taabang u Bible e bay e re ngachal ney riy? Danga’, ya re ngachal ney e immoy ko Pi Babyor ko Bible nni Yoloy Nsom’on ni Thin ni Hebrew ni gonap’an 7,000 yay!

Uw feni ga’ fan fithingan Got? Am lemnag fare kenggin e meybil ni fil Jesus Kristus ngak pi gachalpen. Baaray rogon ni tabab: “Chitamangimad ni ga bay u tharmiy: Ngan tay fan fithingam nib thothup.” (Matthew 6:9) Boch nga tomur riy me meybil Jesus ngak Got ni gaar: “Ah Chitamag, mu ta’ fan fithingam!” Me fulweg Got u tharmiy ni gaar: “Kug ta’ fan ma bay kug rin’ bayay.” (John 12:28) Ere, rib ga’ fan fithingan Got. Machane, mang fan ni boch e girdi’ ni ur pilyeged e Bible e kar chuweged e ngachal rok Got riy kar ted e liw rok nga lon?

L’agruw i fan ni bay. Som’on e, boor e girdi’ ni ma yog ndab nog e re ngachal nem ya dariy be’ nri manang rogon ni  u nog kakrom. Yol nu Hebrew kakrom e dariy e vowel riy ni a, e, i, o, nge u. Ere, dariy be’ e chiney nrayog ni ngari yog rogon ni ma yog e girdi’ kakrom fare thal i yol ni YHWH. Machane, uw rogon u wan’um, dab u dogned fithingan Got ni bochan e dad nanged rogon i yog? Kakrom e sana un pining fithingan Jesus ni Yeshua fa Yehoshua. Dariy be’ e chiney nri manang ko uw rogon ni u nog fithingan Jesus kakrom. Machane, ngiyal’ ney e boor e girdi’ u fayleng ni yad ma yog e re ngachal nem ni Jesus, nra be’ ma rogon ni ma yog ko thin rok. Yugu aram rogon ndariy be’ ni manang rogon ni unog fithingan Jesus kakrom machane ngiyal’ ney e yima yog ni gubin ngiyal’. Ku arrogon nfaan ga ra milekag nga reb e nam ma ga ra pirieg nib thil rogon fithingam ni yira pining. Ere, dariy tapgin ni nge dab u dogned fithingan Got.

Bin l’agruw i fan ni kan chuweg fithingan Got u lan e Bible e bochan e yalen rok piyu Jew kakrom ni ku yibe fol riy e chiney. Boor i yad e ma lemnag nthingar dab unog fithingan Got. Re lem ney e sum ni bochan e de puluw rogon ni nang boch e girdi’ fan fare motochiyel nu Bible ni gaar: “Dabi un fithingan Somol ni Got rom u l’ugunam ni yugu dariy fan, ya gu ra gechignag e en nra rin’ nga fithingag.”​—Exodus 20:7.

Be yog e re motochiyel ney ndab ni darifannag fithingan Got. Machane gur, be yip’ fan ndab nog fithingan Got? Danga’, ya piin nra yoloyed e Bible nthin ni Hebrew (“Bin Kakrom e M’ag”) e yad ba yul’yul’ ngak Got ma ur folgad ko fare Motochiyel ni pi’ Got ngak piyu Israel. Gubin ngiyal’ ni yad ma yog fithingan Got. Ma boor e tang ni i yin’ e pi tapigpig rok Got kakrom ni bay fithingan Got riy. Ki motochiyelnag Jehovah Got ngak e pi tapigpig rok ni ngaur pininged fithingan, ma piin nib yul’yul’ e ur folgad riy. (Joel 2:32; Acts 2:21) Arfan ni piin Kristiano e ngiyal’ ney e yad ma machibnag fithingan Got ni bod ni i rin’ Jesus.​—John 17:26.

Kari oloboch e piin ni kar chuweged fithingan Got u Bible kar ted e liw rok nga lon. Pi girdi’ ney e kar ted Jehovah  ni gowa ir be’ ndabiyog ni ngan m’ag fager ngak ma dariy fan e girdi’ u wan’ ni yugu aram rogon ni be yog e Bible ni ir “e tafager rok e piin ni yad be fol rok.” (Psalm 25:14) Am lemnag be’ ni fager rom nrib fel’ e thin romew. Faanra dam nang fithingan ma ga be lemnag nra fel’ e tha’ u thilmew? Ku arrogon Got nfaanra dabi nang e girdi’ fithingan, ni Jehovah, ma dabiyog ni nge fel’ e tha’ u thilrad? Maku faanra dab u nog fithingan Got ma dabiyog ni nge nang e girdi’ fan e re ngachal nem, ni Jehovah. Mang e be yip’ fan e re ngachal nem?

I weliy Got fan e ngachal rok ngak Moses ni tapigpig rok nib yul’yul’. Nap’an ni fith Moses ngak Jehovah murung’agen fithingan, me fulweg ni gaar: “I gag e en ni gag.” (Exodus 3:14) Kan pilyeg e re thin ney ko Bible rok Rotherham ni gaar: “Gu Ra Mang e n’en ni gu baadag ni nggu mang.” Ere, rayog ni nge rin’ Jehovah e n’en nib t’uf ni nge rin’ ni fan e nge lebguy e tin nib m’agan’ ngay, maku rayog ni nge k’aring boch ban’en ni nge buch ni fan ko pi n’en ni ke sunmiy.

Susun ni faanra rayog ni ngam rin’ boor ban’en, ma mang e ga ra rin’ ni fan ngak e pi tafager rom? Faanra ke m’ar bagayad ma rayog ni ngam mang reb e togta ngam tafalaynag. Ma faanra ke gafgow bagayad ko salpiy, ma rayog ni ngam mang reb e yoor salpiyen ngam ayuweg ko salpiy. Machane, bin riyul’ riy e dabiyog ni ngam rin’ urngin ban’en ni ga baadag ni ngam rin’. Gad gubin ni arrogodad. Machane, nap’an ni ga ra fil e Bible ma ga ra nang ni Jehovah e demtrug e n’en nrayog ni nge rin’ ni fan e nge lebguy e tin ke micheg. Ma ri baadag ni ma fanay gelngin ni nge ayuweg e piin ni yad ma t’ufeg. (2 Kronicles 16:9) Machane, piin ndar nanged fithingan Got e dar nanged e pi fel’ngin ney ni bay rok.

Ere, ba tamilang nthingar ni tay fithingan Got nga Bible. Faan gad ra nang fan e re ngachal nem mu ud fanayed ko pigpig rodad ma rayog ni nge ayuwegdad ngad chugurgad ngak Jehovah ni Chitamangidad nu tharmiy.