Mman ko pi n'en ni bay riy

Mman ko secondary menu

Mman ko table of contents

Pi Mich Rok Jehovah

Waab

Mang e Ri Be Fil e Bible?

Ireray e N’en nib M’agan’ Got Ngay, Fa?

Ireray e N’en nib M’agan’ Got Ngay, Fa?

GA RA beeg e shimbung, ara mu yaliy e TV, ara mmotoyil ko radio ma boor e thin riy ni be weliy murung’agen e oloboch ni be rin’ e girdi’, nge mahl, nge kireb ni be rin’ e terrorist. Mu kum lemnag e pi magawon rom. Sana ke kireban’um ni bochan e kam m’ar fa kem’ be’ nib t’uf rom. Dabisiy ni ga be lem ni bod Job ni yog ni ‘kari kireban’.’​—Job 10:15.

Mu fithem ni nge lungum:

  • Gur, ireray e n’en nib m’agan’ Got ngay ni fan ngog nge gubin e girdi’?

  • Uw e gu ra pirieg e ayuw riy ya nge yag ni gu wan u fithik’ e pi magawon rog?

  • Gur, bay ba ngiyal’ nra gapas e fayleng, fa?

Ga ra pirieg e fulweg ko pi deer ney u Bible.

 BE YOG E BIBLE NRA THILYEG GOT RAROGON E FAYLENG.

“Bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith.”​—Revelation 21:4

“Piin ni mugutgut e bay ra oggad nga lang.”​—Isaiah 35:6

“Pi malmit e bay ra guyed ban’en.”​—Isaiah 35:5

 “Gubin e yam’ ni bay u lan e low ni bayi rung’ag laman, mi yad yib u lan e low rorad nga wuru’.” ​—John 5:28, 29

“Dariy be’ ni be par u lan e nam rodad ni bay ki yog nib m’ar.”​—Isaiah 33:24

“Me par e nam nib sug ko grain; me sug daken yungi ted ko woldug.”​—Psalm 72:16

 RA YIB ANGIN E THIN NU BIBLE NGOM

Dab mu gur ngam lemnag ni fapi thin ni bay ko fagal page ni ke yan e bogi lik’ay. Ya ke micheg Got nra rin’ gubin e pi n’ey, ma be yog e Bible rogon nra rin’.

Machane gathi kemus ni be weliy e Bible rogon nra lebguy Got e tin ni ke micheg, ya ku be weliy rogon nrayog ni ngam pirieg e felfelan’ e chiney. Am lemnag e magafan’ rom nge pi magawon rom. Sana ba muun ngay e magawon ko salpiy nge magawon u tabinaw, ara m’ar, fa ke yim’ be’ nib t’uf rom. Bible e ra ayuwegem ni ngam man u fithik’ e pi magawon ni ma yib ngom, maku be pi’ e fulweg ko pi deer ni baaray ni gaar:

  • Mang fan ni gad ma gafgow?

  • Uw rogon ni ngad k’adedan’dad ko pi magafan’ rodad?

  • Uw rogon ni nge yag e felfelan’ nga lan e tabinaw rodad?

  • Mang e ma buch rodad u nap’an ni kad m’ad?

  • Ku rayog ni ngad mada’gad e piin ni kar m’ad ni yad ba t’uf rodad, fa?

  • Mang e mich riy nra lebguy Got e tin ke micheg ni fan ko gabul nge langlath?

 Dabisiy ni ga baadag ni ngam nang e n’en ni be fil e Bible ni bochan e ga be beeg e re ke babyor ney. Re ke babyor ney e ra ayuwegem. Gubin e paragraph riy ma bay e deer nib puluw ngay. Boor e girdi’ ni yad ma fil e Pi Mich Rok Jehovah e Bible u taabang e yad baadag ni ngar beeged reb e paragraph ngemu’ mar gayed e fulweg riy. Gamad be athapeg ni ku arrogon gur. Manga yigi tow’athnagem Got e chiney ni ga be fil e thin nu Bible.