Mman ko pi n'en ni bay riy

Mman ko secondary menu

Mman ko table of contents

Pi Mich Rok Jehovah

Waab

Mang e Ri Be Fil e Bible?

 GURUY NI 12

Mu Ngongol u Rogon nib M’agan’ Got Ngay

Mu Ngongol u Rogon nib M’agan’ Got Ngay
  • Uw rogon nrayog ni ngam mang fager rok Got?

  • Uw rogon ni kam l’ag ko fare togopuluw ni tay Satan nga mat’awun Got ni nge gagiyeg?

  • Mang boch e ngongol ni dabun Jehovah?

  • Uw rogon e ngongol rom nra felfelan’ Got ngay?

1, 2. Mu weliy murung’agen boch e girdi’ ni ke tayrad Jehovah ni yad e pi tafager rok.

BA MITI mang girdi’ e ga ra mel’eg ni nge mang tafager rom? Dabisiy ni ga baadag be’ ni taareb lanin’mew, ma taareb rogon e tin ni gimew baadag, ara tin nib ga’ fan u wan’mew. Ma ga baadag ni nge fel’ e thin romew be’ nib yul’yul’ mab gol.

2 Kab kakrom ni i mel’eg Got boch e girdi’ ni ngar manged fager rok. Ke yog Jehovah ni Abraham e fager rok. (Mu beeg e Isaiah 41:8; James 2:23.) I yog Got murung’agen David ni gaar: “Ir e cha’ ni gub adag.” (Acts 13:22) Ma Daniel ni profet e ir be’ nib “t’uf rok Got.”​—Daniel 9:23.

3. Mang fan ni ke mel’eg Jehovah boch e girdi’ ni ngar manged e pi tafager rok?

3 Mang fan ni tay Jehovah ni Abraham, nge David, nge Daniel e yad e fager rok? I gaar ngak Abraham: “Kam fol ko tin ni ku gog ngom ni ngam rin’.” (Genesis 22:18) Ere, ke fel’ e thin rok Jehovah nge piin nib sobut’an’rad ni yad ma fol ko tin ni ma yog ngorad. I gaar ngak piyu Israel: “Gu ning chilen ngomed ni nguum folgad rog, ni fan  e nguug par ni gag e Got romed ma gimed e girdi’ rog.” (Jeremiah 7:23) Faan ga ra fol rok Jehovah ma ku rayog ni ngam mang fager rok!

MA GELNAG JEHOVAH E PI TAFAGER ROK

4, 5. Uw rogon ni ma dag Jehovah gelngin ni fan ko girdi’ rok?

4 Am lemnag ko mang boch e flaab nra yib ngom ni faanra ke fel’ thilmew Got. Be yog e Bible ni be gay Jehovah rogon ni nge “pi’ gelngin e piin ni yad ba yul’yul’ ngak u fithik’ i gum’ircha’rad.” (2 Kronicles 16:9, BT) Uw rogon nrayog ni nge dag Jehovah gelngin ni fan ngom? Be yog e Psalm 32:8 reb e kanawo’ ni gaar: “Be gaar Somol, ‘Bay gu fil ngom e kanawo’ ni ir e ngam man riy; bay gog ngom e tin ni ngam rin’ ma bay gu fonownigem.’”

5 Re thin nem e be tamilangnag feni gel e runguy rok Jehovah! Ra gagiyegnigem ma ra matanagiyem u nap’an ni ga ra fol ko kanawo’ ni be dag ngom. Ri baadag Got ni ngam yul’yul’ u fithik’ e pi magawon nge pi skeng ni ma yib ngom. (Mu beeg e Psalm 55:22.) Faan ga ra pigpig ku Jehovah u polo’ i gum’irchaem ma rayog ni nge pagan’um ni bod rogon e en ni yoloy e psalm ni gaar: “Ba’ Somol u lanin’ug ni gubin ngiyal’; ba’ nrib chugur ngog, ma dariy ban’en nrayog ni nge rurgeg.” (Psalm 16:8; 63:8) Arrogon, rayog ni nge ayuwegem Jehovah ni ngam rin’ e tin nib m’agan’ ngay. Machane ga manang ni bay e toogor rok Got ni baadag ni nge magawonnagem ya nge dabiyog ni ngam rin’ e tin nib m’agan’ Jehovah ngay.

TOGOPULUW NI TAY SATAN

6. Mang e yog Satan u murung’agen e girdi’?

6 U lan e Guruy ni 11 ko re ke babyor ney e kad weliyed rogon ni i togopuluw Satan ni Moonyan’ nga mat’awun Got ni nge gagiyeg. Gowa i yog Satan nib malulfith l’igin  Jehovah maku ba kireb ni bochan e de pag Adam nge Efa ni ngar turguyew e n’en nib mat’aw nge n’en nib kireb. Tomuren ni denen Adam nge Efa ma be yoor pi fakrow, ma aram me togopuluw Satan nga fan ni ma pigpig e girdi’ ngak Got. I gaar Satan: ‘Der ma pigpig e girdi’ ngak Got ni bochan e ba t’uf Got rorad. Ga ra pageg ma yugu demtrug be’ ni rayog ni nggu suruy laniyan’ nge togopluw ku Got.’ Fare thin u lan e Bible u murung’agen Job e be tamilangnag ni aram rogon e thin rok Satan. Mini’ Job, ma uw rogon ni ke l’ag ko togopuluw rok Satan?

7, 8. (a) Mang fan nib lingagil Job u fithik’ e girdi’ e ngiyal’ nem? (b) Uw rogon ni ke togopuluw Satan nga fan ni i pigpig Job ngak Got?

7 Immoy Job u fayleng ni gonap’an 3,600 e duw ni ke yan. Ma ir be’ nib fel’ ya gaar Jehovah: “Dariy be’ u fayleng nib yul’yul’ mab fel’ ni bod ir. Ba’ madgug u wan’ ma ma ayuw ni nge dabi ngongliy e kireb.” (Job 1:8) Ba fel’ Job u wan’ Got.

8 I togopuluw Satan nga fan ni i pigpig Job ku Got. I gaar Moonyan’ ngak Jehovah: “Kam par ni ga be yoror rok [Job] nge girdi’ nu tabinaw rok nge urngin ban’en ni ba’ rok. Ga be fal’eg waathan u urngin e tin ni be ngongliy, ma urngin e garbaw ni kam pi’ ngak e ke yoor u daken e ted i yan. Machane ga ra fek rok urngin e tin ni ba’ rok, ma ra yog nga owchem e thin nib togopluw ngom.”​—Job 1:10, 11.

9. Mang e rin’ Jehovah ni bochan e n’en ni yog Satan, ma mang fan?

9 Ke yog Satan ni i pigpig Job ku Got ni bochan e pi n’en ni be pi’ Got ngak. Ki yog ni faan yira skengnag Job ma ra togopuluw ku Got. Ere, mang e rin’ Jehovah ni bochan e n’en ni yog Satan? I pag Jehovah Satan ni nge skengnag Job, ya i togopuluw nga rogon ni be pigpig Job  ku Got. Aram rogon nra tamilang ko ba t’uf Got rok Job fa danga’.

KAN SKENGNAG JOB

10. Mang boch e gafgow ni yib ngak Job, ma mang e rin’?

10 Boor e kanawo’ ni i skengnag Satan Job riy. Kan iring boch e gamanman rok Job, ma kan li’ boch. Kan thang e fan rok e pi tapigpig rok. Ere, ke gafgow Job ya dakuriy ban’en rok. Ki gafgow Job u nap’an ni yim’ fa ragag i bitir rok u fithik’ e yoko’. Yugu aram rogon e tin ni yib ngak, machane “de denen Job ya de yin’ e kireb riy nga daken Got.”​—Job 1:22.

11. (a) Mang e bin migid e thin ni yog Satan u murung’agen Job? Mang e rin’ Jehovah? (b) Mang e rin’ Job u nap’an ni yib e m’ar ngak nib gel e amith riy?

11 Machane de tal Satan i skengnag Job. I guy Satan ni yugu aram rogon ni i par Job ni dakuriy ban’en rok, ma dakuriy e pi tapigpig rok, miki yim’ pi fak machane ka be par nib yul’yul’ ngak Got. Ere, lemnag ni faanra m’ar Job ma rayog ni nge togopuluw ngak Got. Ere, ke pag Jehovah Satan ni nge k’aring ba mit e m’ar nib sonogor mab gel e amith riy ni nge yib ngak Job. Machane de war e michan’ rok ni yugu aram rogon ni yib e m’ar ngak nib gel. Rib mudugil e thin rok ni gaar: “Dab gu tal i yog nib fel’ e rog nge taw ko rofen ni nggum’ riy.”​—Job 27:5, BT.

Kan flaabnag Job ni bochan e i par nib yul’yul’ ku Got

12. Uw rogon ni ke dag Job ko ngongol rok nib malulfith l’igin Satan?

12 De nang Job ni Satan e ke k’aring urngin e pi gafgow nem ni nge yib ngak. Bochan nde nang Job ni be togopuluw Satan nga mat’awun Jehovah, ma i tafinaynag ni Got e ir tapgin urngin e magawon rok. (Job 6:4; 16:11-14) Machane i par nib yul’yul’ ku Jehovah. Ere, ngongol rok Job nib yul’yul’ e ke micheg nib malulfith l’igin Satan ko thin ni yog ni kemus ni i pigpig Job ku Got ni bochan e tin ni i pi’ Got ngak!

13. Mang e ke buch ni bochan e par Job nib yul’yul’ ku Got?

 13 Bochan nib yul’yul’ Job ma aram e rayog ni nge micheg Jehovah ni dariy rogon e togopuluw rok Satan. Riyul’ ni Job e ir e fager rok Jehovah, me flaabnag Got Job ni bochan e ngongol rok nib yul’yul’.​—Job 42:12-17.

ROGON NI KAM L’AG NGAY

14, 15. Mang fan nrayog ni nga dogned ni thin rok Satan e gathi kemus ni fan ngak Job ya kub muun urngin e girdi’ ngay?

14 Fare magawon ni sunumiy Satan ni murung’agen e yul’yul’ ni be tay e girdi’ ngak Got e gathi kemus ni fan ngak Job. Ya ka gab l’ag ngay. Be m’ug nib tamilang u Proverbs 27:11, BT ni gaar: “Fakag, mu gonop, ma gu ra felfelan’; ya bay e fulweg ni gu ra yog ko en be gathibthibnageg.” Kan yoloy e re thin nem ni bokum miriay e duw nga tomuren ni yim’ Job, ma be tamilangnag ni ka be moningnag Satan Jehovah ma be yin’ e kireb nga daken e pi tapigpig rok Got. Nap’an ni gad ra rin’ ban’en nib m’agan’ Jehovah ngay ma aram e gad be ayuweg ni nge micheg ni be ban Satan, maku gad be felfelan’nag gum’irchaen. Uw rogon u wan’um e re thin nem? Ga ra felfelan’ ni ngam micheg nib malulfith l’igin Moonyan’, fa? Ga ra thilyeg e ngongol rom ni bochan e ngam micheg nib malulfith l’igin Moonyan’, fa?

15 Mu tay fanam i yan riy ni gaar Satan: “Be’ nib girdi’ e ra pag urngin ban’en ni fan e nge ayuweg e pogofan rok.” (Job 2:4) Nap’an ni yog Satan e “be’ nib girdi’,” ma ke tamilangnag ni gathi kemus ni goo Job e ke yin’ e kireb nga daken ya ki yin’ e kireb nga daken urngin e girdi’. Ba ga’ fan e re thin nem. Ya be yog Satan ni dabiyog ni ngam yul’yul’ ku Got. Nap’an nra yib e magawon ngom ma baadag Moonyan’ ni nge dab kum fol rok Got ma ga pag e tin nib mat’aw ban’en. Uw rogon nra guy Satan rogon ni nge rin’ e re n’ey?

16. (a) Mang boch e kanawo’ ni ma fanay Satan ni nge togopuluw ko girdi’ ni be fol ko thin rok Got? (b) Uw rogon nra fanay Moonyan’ e pi kanawo’ ney ni nge togopuluw ngom?

 16 Kad weliyed ko Guruy ni 10 ni ma fanay Satan boor e kanawo’ ni nge chafeg e girdi’ ni ngar pied keru’rad ngak Got. Satan e “bod ba layon ni be tolul, ni be gayiy be’ ni nge longuy.” (1 Peter 5:8) Nap’an ni ga ra athamgil ni ngam fil e Bible ma aram e ra fanay Satan e pi tafager rom, nge girdi’ rom, nge yugu boch e girdi’ ni ngar togopuluwgad ngom. * (John 15:19, 20) Maku rayog ni nge “piliyeg [Satan] ir nge bod yaan ba engel ko tamilang.” (2 Korinth 11:14) Ere, rayog rok Moonyan’ ni nge bannagem me waliyem ni nge dab kum fol ko thin rok Got. Ku rayog ni nge n’igin ni nge mulan’um, ma ga lemnag nde bung rogom ni ngam felfelan’nag Got. (Proverbs 24:10) Ere, yugu demtrug rogon ko Satan e bod “ba layon ni be tolul,” ara be m’ug ni bod ba “engel ko tamilang,” ma thin rok e dabi thil: Be yog ni ga ra tal ko pigpig ngak Got u nap’an nra yib e skeng nge togopuluw ngom. Uw rogon ni ngam dag nib malulfith l’igin Satan ma ga micheg ni gab yul’yul’ ku Got, ni bod rogon ni rin’ Job?

NGAN FOL KO PI MOTOCHIYEL ROK JEHOVAH

17. Mang nrib ga’ fan ni ngad folgad ko pi motochiyel rok Jehovah?

17 Rayog ni ngam micheg nib malulfith l’igin Satan ni faan ga ra felfelan’nag Got. Mang e thingar mu rin’? Be gaar e Bible: “Ngari t’uf romed Somol ni Got romed u polo’ i gum’irchamed ngu polo’ i lanin’med, ngu polo’ i gelngimed.” (Deuteronomy 6:5) Ra i t’uf Got rom i yan  ma ga ra adag ni ngam rin’ e n’en ni ke tay chilen ni ngam rin’. I gaar apostal John: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed.” Faanra rib t’uf Jehovah u polo’ i gum’irchaem ma ga ra pirieg ni “tin ni ke yog ni ngad rin’ed e gathi rib mo’maw’.”​—1 John 5:3.

18, 19. (a) Mang boch e pi motochiyel rok Jehovah? (Mu guy fare kahol ni kenggin e “ Mu Siyeg e Pi N’en ni Dabun Jehovah.”) (b) Uw rogon ni gad manang nder ma yog Got ban’en ni ngad rin’ed ni dabiyog rodad?

18 Mang e pi motochiyel rok Jehovah? Boch e pi motochiyel  nem e be tamilangnag e pi n’en ni dab da rin’ed. Mu tay fanam i yan ko thin ni bay ko fare kahol ni kenggin e “ Mu Siyeg e Pi N’en ni Dabun Jehovah.” Ga ra pirieg riy boch e ngongol ni be tamilangnag e Bible nib kireb. Sana gathi rib gel e kireb u boch e pi ngongol nem u wan’ boch e girdi’. Machane faan ga ra fal’eg i lemnag e pi thin ko Bible ni kan yoloy u charen e pi ngongol nem ma ga ra guy ni bay e gonop u fithik’ e pi motochiyel rok Jehovah. Sana ra mo’maw’ ni ngam thilyeg e ngongol rom. Machane faan ga ra ngongol u rogon nra felfelan’ Got ngay ma ra fel’ u  wan’um ma ga ra felfelan’. (Isaiah 48:17, 18) Ireray ban’en nrayog ni ngam rin’. Uw rogon ni gad manang nrayog?

19 Dabi yog Jehovah ban’en ni ngad rin’ed ni faanra dabiyog rodad. (Mu beeg e Deuteronomy 30:11-14.) Manang e tin rayog ni ngad rin’ed nge tin ni dabiyog. (Psalms 103:14) Maku rayog ni nge gelnagdad Jehovah nguud folgad rok. I gaar apostal Paul: “Yi Got e dabi thilyeg e tin ni ke yog nra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabkiyog romed ni ngam taleged gimed riy; machane re ngiyal’ i n’em e ra pi’ gelngimed ngam k’adedan’med riy, ni aram e ke pi’ e kanawo’ ngomed ni ngam bad riy nga wuru’ e pi n’em.” (1 Korinth 10:13) Ra ngam par ni gab yul’yul’ ma rayog ni nge pi’ Jehovah “gelngin” ngom. (2 Korinth 4:7) Tomuren ni par Paul nib yul’yul’ u fithik’ e gafgow, me gaar: “Demtrug e mit i n’en ni gu ra mada’nag ma ba’ gelngig ni ke pi’ Kristus nrayog ni gu par riy.”​—Filippi 4:13.

NGE YAG PI FEL’NGIN GOT NGODAD

20. Mang boch pi fel’ngin Got ni ngam guy rogon ni nge yag ngom? Mang nib ga’ fan?

20 Faanra ngam felfelan’nag Jehovah ma gathi kemus ni ngam pi’ keruum ko pi n’en ni dabun. Ya ku thingari t’uf rom e pi n’en nib t’uf rok. (Roma 12:9) Gimew ra pach be’ nib taareban’mew, ma taareb e n’en ni gimew ba adag, ma taareb rogon e tin ni ba ga’ fan u wan’mew, fa? Ku aram rogon Jehovah. Ere, thingar mu fil rogon ni nge t’uf rom e tin nib t’uf rok Jehovah. Kan weliy murung’agen boch e pi n’ey ko Psalm 15, ni be weliy murung’agen e piin ni yad e pi tafager rok Got. (Mu beeg e Psalm 15:1-5.) Pi tafager rok Jehovah e ma m’ug e pi fel’ngin ni baaray rorad ni aram e, “t’ufeg, nge felfelan’, nge gapas laniyan’, nge gum’an’, nge gol, nge fel’ ngak e girdi’,  nge yul’yul’, nge sobut’an’, nge t’ar laniyan’.”​—Galatia 5:22, 23.

21. Mang e ra ayuwegem ni nge yag pi fel’ngin Got ngom?

21 Ra yag pi fel’ngin Got ngom ni faan ga ra beeg mag fil e Bible. Ma nap’an ni ga ra nang e pi n’en ni ke tay Got chilen ni ngan rin’ ma rayog ni ngam yal’uweg e lem rom nge puluw nga rogon e lem rok Got. (Isaiah 30:20, 21) Ma faan ga ra gelnag e t’ufeg rom ngak Jehovah ma ga ra adag ni ngam rin’ e tin nib m’agan’ ngay.

22. Mang angin nra yib ngom ni faan ga ra felfelan’nag Got?

22 Ba t’uf ni ngam athamgil ma ga rin’ e ngongol nib fel’ nra felfelan’nag Jehovah. Be yog e Bible ni ngan chuweg e bin kakrom e pangin ma non’ nga dakeney e bin beech e pangin. (Kolose 3:9, 10) I weliy e en ni yoloy e psalm rogon ni ngan fol ko pi motochiyel rok Jehovah ni gaar: “Fol ni gu be tay riy e be yib puluwon ngog.” (Psalm 19:11) Ka ga ra pirieg ni bay e flaab riy ni ngan fol min rin’ e ngongol nra felfelan’nag Got. Faan ga ra rin’ ma rayog ni ngam micheg nib malulfith l’igin Satan ma rayog ni ngam felfelan’nag Jehovah!

^ par. 16 Re n’ey e der yip’ fan ni Satan e ir e be k’aring e girdi’ ni ngar togopuluwgad ngom. Machane, ir e got ko re m’ag ney, ma be suwey e fayleng ni polo’. (2 Korinth 4:4; 1 John 5:19) Ere, gad manang ni faan gad ra fol rok Got ma bay boch e girdi’ ni yad ra togopuluw ngodad ni bochan nib thil e n’en ni gad be rin’ ko n’en ni yad be rin’.