Mang e N’en ni Be Yog e Bible?
Ma fulweg Got taban urngin e meybil, fa?
GA BE LEMNAG NI MA FULWEG TABAN E MEYBIL ROK . . .
Urngin e girdi’
Boch e girdi’
Dariy be’
N’EN NI BE YOG E BIBLE
“Ba chugur ngak urngin e piin . . . ni yad be non ngak u fithik’ e yul’yul’.”—Psalm 145:18.
MANG E KU RAYOG NI NGAD FILED U LAN E BIBLE?
Der ma motoyil Got ko meybil rok e piin ni yad ma togopuluw ngak. (Isaiah 1:15) Machane, be yog e Bible nrayog ni nga ranod ngak ngar “puruy’gad” ni aram e ngar thilyeged e ngongol rorad.—Isaiah 1:18.
Faanra nge fulweg Got taban e meybil ku be’ ma thingari puluw e meybil rok ko n’en ni be yog e Bible.—1 John 5:14.
Gur, ri bay rogon ni ngad pared u nap’an ni ngad meybilgad?
BOCH E GIRDI’ E YAD MA LEMNAG nthingar ra ragbuggad, ara ngar sapgad nga but’, ara ngar uchumiyed pa’rad nga taabang u nap’an ni ngar meybilgad. Me gur, uw rogon u wan’um?
N’EN NI BE YOG E BIBLE
Demtrug rogon ni gad ra par ngad meybilgad ma ra motoyil Got ngay. Rayog ni ngad meybilgad ni gad ba “par nga but’,” ara gad ba “palpal,” ara gad ba “sak’iy,” ara gad ba “ragbug.” (1 Kronicles 17:16, BT; Ezra 10:1, NW; Mark 11:25; Acts 9:40) Gathi ri bay rogon ni ke yog Got ni ngad pared u nap’an ni gad be meybil.
MANG E KU RAYOG NI NGAD FILED U LAN E BIBLE?
Ma motoyil Got ngak e piin nib sobut’an’rad.—Psalm 138:6.
Demtrug e re thin nrayog ni ngam meybil riy, maku rayog ni ngam meybil u lanin’um.—2 Kronicles 6:32, 33; Nehemiah 2:1-6.
