Likuga Lyakulongolela kali kagulu kamwana ka Aklistu ŵakomangale mwausimu. Kaguluka kakusalongolela masengo ga Ŵamboni sya Yehofa pachilambo chosope. Masengo gakusakamulaga jemanjaji mpaka tugagaŵe paŵili:

•   Akusalolela masengo gakwakamuchisya ŵandu ni mfundo syakutyochela m’Baibulo. Akusatendaga yeleyi kupitila m’mabuku, m’misongano soni m’masukulu ga Mboni sya Yehofa.—Luka 12:42.

•   Akusalolelasoni masengo gakulalichila ga Mboni sya Yehofa pachilambo chosope soni kulolechesya kuti yakupeleka ya ŵandu yikukamula masengo mwakuŵajilwa.

 Likuga Lyakulongolela likusatenda yeleyi pakuya yiŵatendaga “ŵandumetume ni achakulungwa ku Yelusalemu,” ŵele ŵaŵakusagula yindu yakusosekwa mnope yakuti mpingo wosope wa Chiklistu ujendeleje. (Masengo 15:2) Mwakulandana ni ŵandumetumeŵa, nombe nawo abale ŵa mu Likuga Lyakulongolela nganaŵa mpela mwamwenye wa gulu jetu. Jemanjaji akusadalilaga mnope Baibulo kuti jalongoleleje, soni akusamanyilila kuti Yehofa Mlungu amsagwile Yesu Klistu kuŵa Mtwe wa mpingo.—1 Akolinto 11:3; Aefeso 5:23.

Ana mu Likuga Lyakulongolela Mwana Ŵani?

 Mu likugali mwana Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, soni Jeffrey Winder. Jemanjaji akusatumichila ku likulu lya Mboni sya Yehofa sya pachilambo chosope ku Warwick mumsinda wa New York ku United States.

Ana Likuga Lyakulongolela Likusakamulaga Masengo Chamtuli?

 Likuga Lyakulongolela lyatamilikasisye makomiti gakwana 6 kuti galoleje masengo gakulekanganalekangana ga Mboni sya Yehofa. Myoyo m’bale jwalijose jwa mu Likuga Lyakulongolela akusatumichila mu komiti jimo kapena kupunda.

•   Komiti ja Ŵakulondesya Masengo: Jikusalolela ngani syakwayana ni magambo soni kukamuchisyapo kumalo kwasitendekwe ngosi syachilengedwe. Jikusakamuchisyagasoni ngani syakwayana ni kulagasika kwa Mboni sya Yehofa ligongo yindu yakusakulupilila soni ngani sine syasikusosechela chikamuchisyo chachitema syakwayana ni Mboni sya Yehofa.

•   Komiti jakulola ya Ŵakutumichila pa Beteli: Jikusalolela yindu yakwayana ni ŵandu ŵakutumichila pa Beteli.

•   Komiti Jakulolela Masengo Gakuwandisya Mabuku: Jikusalolela masengo gakupulinta soni kutumisya mabuku kugakusosechela. Jikusalolesoni masengo gakutaŵa malo gakutendela misongano, maofesi gagopolela mabuku soni nyumba sya pa ofesi ja nyambi.

•   Komiti ja Utumiki: Jikusalolela masengo gakulalichila “ngani syambone . . . sya Uchimwene.”—Mateyu 24:14.

•   Komiti Jakwiganya: Jikusalolela masengo gakwiganya ya Mlungu kupitila m’misongano, m’masukulu, m’mafidiyo soni m’yindu yakupikanila.

•   Komiti Jakulemba: Jikusalolela masengo gakwiganya ya Mlungu kupitila m’mabuku, mungani sya pa webusayiti. Jikusalolesoni masengo gagopolela.

 Konjechesya pa masengo gelega, ŵa mu Likuga Lyakulongolelaŵa akusasimanikwasoni wiki jilijose kuti akambilane yindu yine yakusosechela ya gulu jetu. Pa misongano mpela jeleji abaleŵa akusakambilana yajikusasala Baibulo, soni jemanjaji akusakunda kulongoleledwa ni msimu wa Mlungu, yayikusayakamuchisya kuti asagule yindu mwalunda.—Masengo 15:25.

Ana ŵani ŵakusiŵakamuchisyaga ŵa mu Likuga Lyakulongolela?

 Pana Aklistu ŵane ŵakulupichika ŵakusakamuchisya pa masengo ga makomiti ga Likuga Lyakulongolela. (1 Akolinto 4:2) Jemanjaji akusamanyilila chenene masengo ga komiti jakutumichila. Konjechesya pelepa akusasimanikwasoni pa msongano wa mukomiti jalijo wawukusatendekwa wiki jilijose. Atamose kuti jemanjaji ŵangasagula yakutenda, nambope akusapeleka nganisyo syawo soni kulolechesya kuti yajisagwile komitijo akuyikuya. Akusalolasoni yakuyichisya yayikupagwa ligongo lya yakusagulayo. Likuga Lyakulongolela likusilyatumisyaga jemanjaji ku madela gakulekanganalekangana pachilambopa kuti akalole mwagakwendela masengo getu. Akusaŵechetegasoni ngani pa misongano ja pachaka kapena pa lisiku lyakumalisya Sukulu ja Giliyadi.