MUNDAŴI ja Baibulo, jwakulolela jwakwete udindo wakulolela yindu ya mundu jwine. Maloŵe ga Chihebeli soni ga Chigiliki gaŵagagopolele kuti “jwakulolela” ndaŵi sine gakusagopolela jwakulongolela kapena jwakulolela panyumba.

Pandaŵi jele Yosefe mwanache jwa Yakobo ŵaliji ku ukapolo ku Iguputo, jwalakwe jwaliji jwakulolela yindu m’nyumba ja abwana ŵakwe. Konjechesya pelepa, abwana ŵakwe ŵa ku Iguputo “ŵayiŵisile yindu yosope yaŵakwete m’myala mwa Yosefe.” (Gen. 39:2-6) Kaneko, Yosefe paŵakwete udindo wekulungwa ku Iguputo, jwasagwile jwakulolela yindu panyumba jakwe.—Gen. 44:4.

Mundaŵi ja Yesu, achimsyene migunda ŵatamaga mmisinda kwakutalikangana ni migunda jawo. Myoyo ŵasagulaga ŵakulolela kuti aloleleje masengo gakumigundago.

Ana mundu kuti aŵe jwakulolela jwasosekwaga kuŵa jwamtuli? Jwakulemba jwine jwa Chiloma jwa m’yaka 100 yandanda lina lyakwe Columella jwasasile yakwamba nganiji. Jwalakwe jwatite, kapolo juŵasagulidwaga kuti aŵe jwakulongolela kapena jwakulolela jwasosekwakwaga “kugamanyilila chenene masengogo.” Jwalakwe jwasosekwaga kuŵa mundu “jwampaka akombole kwalolela chenene ŵandu nambo ngaŵa mwangasa.” Jwasasilesoni kuti chindu chakusosekwa mnope kwa jwakulolela chili ngaganisyaga kuti akumanyilila yosope soni akusosekwa kola mtima wakulijiganya yindu yasambano.

Maloŵe ga Mlungu gakusakamulichisya masengo chisyasyo cha jwakulolela soni masengo gakwe pakusala yayikusatendekwa mumpingo wa Chiklistu. Mwachisyasyo, ndumetume Petulo jwalimbikasisye Aklistu kuti akamulichisyeje masengo lunda lwaŵapele Mlungu “pakutumichilana mpela ŵakulolela ŵambone ŵapochele umbone mtima wa Mlungu.”—1 Pet. 4:10, NW.

Yesu jwakamulichisye masengo chisyasyo cha jwakulolela pa chiwanichisyo chachikusasimanikwa pa Luka 16:1-8. Konjechesya pelepa, pa yakulochesya yakwamba chimanyilo cha kwika kwakwe mpela Mwenye, Yesu jwasimichisye ŵakumkuya ŵakwe kuti chachisagula “kapolo jwakulupichika ni jwalunda” kapena kuti “jwakulolela jwakulupichika.” Masengo gekulungwa ga jwakulolelaju gachiŵa kupeleka chakulya chausimu kwa Aklistu achimjakwe m’masiku gambesi. (Mat. 24:45-47; Luk. 12:42) Tuli ŵakusangalala kuŵa mu gulu ja ŵandu ŵakusapochela mabuku gagakusasimanikwa pachilambo chosope gakulimbikasya chikulupi gakutyochela kwa jwakulolela jwakulupichika.