MUNDU jwali jwakulupichika mu ulombela mpaka yimpweteche ligongo lya ungakulupichika wa ŵamkwakwe. Ŵandu ŵane ŵali pa ulombela ayiweni kuti mpaka akombole kumkululuchila mundu jwangakulupichika jwapitikwiche mtima ni kupitilisyagape ulombela wawo. * Chinga ulombelawo ukupitililape kapena ukumala, nambo mundu jwayikopochele kuti ŵamkwakwe ngakwenda chenene akusalagasika mnope nganisyo. Ana ŵandu ŵakulagasika nganisyo ligongo lya ungakulupichika wa ŵamkwawo mpaka amalane nako chamtuli?

Atamose kuti yikusaŵa yakupweteka mnope kwa ŵandu ŵajinji ŵali ŵakulupichika mu ulombela, nambope pana Malemba gagakusakamuchisya kupilila. Ŵandu ŵane mwa ŵeleŵa, alijiganyisye kuti Mlungu akusapikana kulila kwawo soni kuti akusatendela chanasa.—Malaki 2:13-16.

“Pasikundupila nganisyo mumtima mwangu ŵalakwe akusawutulusya [kapena kuti kuwutamika pasi] umi wangu ni kusangalasya.”—Salimo 94:19.

Bill jwatite, “Panaŵalangaga lilembali naganichisyaga Yehofa ali mkundamika mtima pasi mwakusangalasya mpela mwakusatendela mtati jwa chanasa.”

“Ŵalakwe ali ŵakulupichika kwa ŵandu ŵali ŵakulupichika kwa ŵalakwe.”—Salimo 18:25.

Carmen, jwele ŵamkwakwe aŵele ŵangakulupichika kwa miyesi, jwatite, “Ŵamkwangu nganakulupichikaga nambo nakulupililaga kuti Yehofa ali jwakulupichikape kwa une. Jwalakwe nganandeka ndili mkulagasika.”

“Akadandawulaga ni chilichose, nambo pachilichose kupitila mu lipopelo soni kuyamichila . . . , yakuŵenda yawo yimanyiche kwa Mlungu soni mtendele wa Mlungu wawukusapunda kuganisya mwakusokoka kulikose, uchichenjela mitima jawo.”—Afilipi 4:6, 7, NWT.

Sasha jwatite, “Naŵalasile lilemba lyeleli mwakuwilisyawilisya soni ligongo lyakuti napopelaga mnope, Mlungu ŵambele mtendele wa mumtima.”

Ŵandu wosope ŵatwakolasileŵa ŵayiwonaga kuti nganaŵa akombwele kupilila yakusawusya yaŵasimanaga nayo. Jemanjaji ŵamkulupililaga Yehofa Mlungu soni ŵalijiganyaga Maloŵe ga Mlungu gagalimbikasyaga. Bill jwasasile kuti, “Chikulupi changu changamuchisye kuwuwona umi kuŵa wakusosekwa mwangasamala kandu kuti yindu yosope yatwaganisyaga nganiyitendekwa. Atamose kuti najendaga ‘m’chiŵata cha chipi’ nambo Mlungu jwangamuchisyaga.”—Salimo 23:4.