Ŵandu ŵajinji akusati pakusajigala masiku 21 kuti mundu asyoŵelele kutenda yine yakwe. Nambo, yisyesyene yakwe yili yakuti, ŵandu ŵane mpaka yajigalile ndaŵi jamnono kuti ayisyoŵelele yinduyo, soni ŵane ndaŵi jelewu. Ana yeleyi yagwisyeje ulesi?

Iyayi. Aganicisye ayi: Tuwanicisye kuti wawojo akwete cakulinga cakuti atendeje maseŵela gakulimbisya cilu katatu pa cijuma cilicose.

• Cijuma candanda, akukwanilisya cakulinga cawo.

• Cijuma caŵili, akulepela lisiku limope.

• Cijuma catatu, akukwanilisya cakulinga cawo.

• Cijuma ca mcece, akombwele lisiku limpepe.

• Cijuma ca msano, yikamwile msewu, mwati kutyocela pelepo mpaka msogolo, akwanilisya cakulinga cawoco cijuma cilicose.

Pelepa yikulosya kuti yajigalile yijuma msano kuti asyoŵelele ndamo jasambano. Yeleyi mpaka yiwonece mpela ndaŵi jelewu. Nambo pakwanilisye cakulinga cawo, mpaka asangalaleje ligongo sano asyoŵelele ndamo jine jakwe jambone.

Baibulo jikusatulimbikasya kuti tukajasaga mtima patulepele kutenda cine cakwe. Cakusosekwa cili kuganicisya mnope yakuti twajimwice kalingwa patwagwile, ngaŵaga kuti twagwile kalingwa.

• Akaganisyaga kuti palepele kutenda yine yakwe ni kuti basi ali ŵakulepela mpaka kalakala. Pakulingalinga kwanilisya yakulinga yawo casimaneje ni yakwalepelekasya.

• Aganicisyeje ya ndaŵi jaŵatesile cenene yine yakwe. Mwambone, naga akulingalinga kupata matala gakwakamucisya kuti aŵecetaneje cenene ni ŵanace ŵawo, akusosekwa kuliwusya kuti, ‘Ana cakaci panasakaga kwakalipila ŵanace ŵangu ligongo lyakuti ŵalemwisye yine yakwe, nambo nganindenda yeleyo? Ana nakamucisye mwatuli? Ana mpaka njendelecele mwatuli kutenda yeleyi?’ Yiwusyo yeleyi mpaka yakamucisye kwendelecela ganicisya ya yindu yakusakombola kutenda mmalo mwaganicisya ya yindu yayikusiyalema.

Naga akusaka kumanyilila mwampaka Baibulo jakamucisye paumi wawo pangani mpela kumalana ni yakusawusya, kola liŵasa lyakusangalala soni kola umi wambone, aŵecetane ni Ŵamboni sya Yehofa, kapena alole pa webusayiti ja jw.org/yao.