CILAMBO ca Kyrgyzstan cisyungulilidwe ni matumbi gelewu gele penani pakwe pakusaŵa mesi gekamulane. Cilamboci cili pasikati pa Asia, soni catesile malile ni yilambo ya Kazakhstan, Uzbekistan, Tajikistan, soni China. Ciŵandika 90 pelesenti ja cilamboco gali matumbi. Litumbi lyelewu mnope m’cilambo ca Kyrgyzstan lili lya Tian Shan. Litumbili lili lyelewu mamita 7,439. Ciŵandika 4 pelesenti ja cilamboco jili ukweti. Yili yakutesya lung’wanu kuti umo mwa migunda jekulungwakulungwa jajikusimanikwa pacilambo cosope ja mtesa wine wakwe wakolanjikwa kuti walnut ukusasimanikwa ku Kyrgyzstan.

Ŵandu ŵa ku Kyrgyzstan ali ŵakungulucika soni akusiŵacimbicisya ŵane. Acakulungwakulungwa akusaŵecetana nawo mwakwacimbicisya, soni akusanonyela kwapa malo gakutama m’galimoto kapena kwa malo pa cakulya pakulosya kwacimbicisya.

Maŵasa gejinji gakusakola ŵanace ŵatatu kapena kupunda. Mwanace jwamlume jwamnandi, ndaŵi syosope  akusatama ni acinangolo ŵakwe atamose palombele, kuti ciŵasamalileje acinangolowo pacacikalambala.

Kutandila ali ŵanace, asikana akusalijiganya masengo ga pamlango kuti ciyakamucisye mu ulombela. Pakwikanaga pakula msingu, akusaŵa ali ayice pakuti mpaka asamalile nyumba jawo. Ndaŵi syosope ŵakucikongwe akusapeleka yindu kwa jwamlume jwakusaka kumjigala mwanagwawojo. Yindu yakwe mpela yagonela ni yakuliwunicila, yakuwala, nambosoni yakutandika m’nyumba. Acalume akusapeleka mbiya ni yilango kucikongwe.

Payindimba ni pamalilo akusawulaga ngondolo kapena mbunda. Ciŵalo cilicose ca nyama jakwejo apali mundu jwacitamile jwakusajigala. Mlendo jwalijose akusampa nyamajo mwakamulana ni msingu wakwe kapena masengo gakwe m’musimo. Pelepasoni ŵangaliŵalila kulosya kwacimbicisya ŵane. Kaneko akusalya cakulya cakusacinonyela mnope lina lyakwe beshbarmak. Cakulyaci akusalya ni yala.