Mbali 2
Aŵe Ŵakulupicika kwa Ŵamkwawo
“Yindu yayilumbikenye Mlungu pampepe, mundu jwine akayilekanganya.”—Maliko 10:9
Yehofa akusasaka kuti ‘tuŵeje ŵakulupicika.’ (Mika 6:8) Kutenda yeleyi kuli kwakusosekwa mnope mu ulombela ligongo naga mundu ali jwangakulupicika, mjakwe jwa mu ulombela ngakomboleka kumkulupilila. M’yoyo, kuti cinonyelo cikuleje ŵalombane akusosekwa kuŵa ŵakulupicika kwa jwine ni mjakwe.
Lelo jino, kuŵa jwakulupicika mu ulombela kuli kwakusawusya. Sano kuti alimbisye ulombela wawo akusosekwa kusimicisya kutenda yindu yiŵili.
1 ALIWONEJE LIŴASA LYAWO KUŴA LYAKUSOSEKWA MNOPE
YAJIKUSASALA BAIBULO: ‘Asaguleje ayo yayili yakusosekwa mnope.’ (Afilipi 1:10) Akusosekwa kuwuwonaga ulombela wawo kuŵa cindu cimo mwa yindu yakusosekwa mnope kwa wawojo.
Yehofa akusasaka kuti wawojo akoleje lung’wanu ni ŵamkwawo, soni kuti “asangalaleje ni umi” pampepe ni ŵamkwawowo. (Mlaliki 9:9) Yehofa akusasala mwangapita mumbali kuti akusosekwa kwakosya ŵamkwawo, soni kutenda yiliyose yampaka akombole kuti wosope asangalaleje. (1 Akolinto 10:24) Ŵamkwawo alipikaneje kuti ali ŵakusosekwa mnope, soni kuti akusiŵayamicila.
YAMPAKA ATENDE:
-
Akoleje ndaŵi jakungulucila pampepe, soni ŵalosyeje ŵamkwawo kuti akusiŵaganicisyaga
-
Pakutenda yindu aganisyeje kuti ali ŵaŵili ngaŵaga kuti ali jika
2 AWUCENJELEJE MTIMA WAWO
YAJIKUSASALA BAIBULO: “Mundu jwalijose jwakumlolecesya jwamkongwe ni kumkumbila, atesile najo kala cikululu mumtima mwakwe.” (Matayo 5:28) Naga mundu jwamlombele akwamba kuganisya yakulemweceka, akusaŵa mpela ali jwangakulupicika kwa ŵamkwakwe.
Yehofa akusasala kuti akusosekwa ‘kuwucenjela mtima wawo.’ (Miyambo 4:23; Yeremiya 17:9) Kuti akwanisye yeleyi akusosekwa kugacenjela meso gawo. (Matayo 5:29, 30) Akusosekwa kujigalila cisyasyo ca Yobu juŵatesile cilanga ni meso gakwe kuti ngasalola mwakumbila jwamkongwe jwine. (Yobu 31:1) Asimicisye mtima kuti ngasalolela yakuŵagula. Soni asimicisye kuŵambala kunonyelana mnope ni mundu jwine jwanganaŵa ŵamkwawo.
YAMPAKA ATENDE:
-
Atendeje yindu yakulosya kuti akusiŵanonyela mnope ŵamkwawo
-
Aganicisyeje mwakupikanila ŵamkwawo, soni naga akusakunguluka mwakupelenganya ni mundu jwanganaŵa ŵamkwawo mwati ŵamkwawo ngayikusasangalasya, amasye mkamulanowo mwacitema
