YAKUSAŴECHETA ŴANDU

Ŵandu ŵajinji akusaganisya kuti kuchesa juga kuli kwakusangalasya soni nganikukola chakusawusya chilichose. Akusaganisya myoyo naga malamusi ga mchilambo chakutamacho gangalekasya. Akusati naga jugajo jikwakamuchisya kupata mbiya nikuti basi yili chenene.

YAJIKUSASALA BAIBULO

M’Baibulo mwangali maloŵe gakuti kuchesa juga. Nambope mfundo sine sya m’Baibulo mpaka situkamuchisye kumanyilila mwele Mlungu akusajiwonela nganiji.

Ŵandu pakuchesa juga, akusapata mbiya ligongo lyakuti achimjawo alusile. Yeleyi yili yakutindana ni Maloŵe ga m’Baibulo gakuti: “mkalamuche nikukumbila yindu yiliyose.” (Luka 12:15) Mundu jwakuchesa juga akusaŵaga jwakusachilila kuti ŵane alepele, jwalakwejo awine. Makampani ga mpikisano gakusagulusya yampaka ŵandu atende kuti apate mbiya syejinji. Ligongo pagakutenda yeleyi gakusamanyilila kuti ŵandu akusasaka kusichila mwachitema. M’malo mwakulimbikasya ŵandu kuŵambala mtima wakutunduka, kuchesa juga kukusamtendekasya mundu kukola mtima wakusachilila kupata mbiya mwachitema.

Ŵandu ŵakusachesa juga akusagamba kuganichisya mbiya syampaka apate basi. Nambotu Baibulo jikusaŵecheta kuti mundu “akagambaga kulisosela jikape yambone, nambo mnopemnope ŵasoseleje achimjakwe yambone.” (1 Akolinto 10:24) Nambosoni pa Malamusi 10 ga Mlungu, line likusasala kuti: “Mkakumbila . . . chilichose cha mjenu.” (Ekisodo 20:17) Mundu jwakusachesa juga akusaganisya kuti ni jwachawine mwa kujigala mbiya sya ŵanewo.

Baibulo jikusatukalamusyasoni kuti tukaganisyaga kuti pana machili ganegakwe gagakusatendekasya mundu kupata upile. Mwachisyasyo, ku Isalaeli jwakala, kwaliji ŵandu ŵane ŵaŵalesile kukulupilila Mlungu, mwamti ŵatandite “kupanganya tebulo ja mlungu jwaunami jwaupile, NWT” Nambo Mlungu nganasangalala ni yaŵatesileyi mwamti ŵasalile kuti, “Mwatesile yakusakala pameso pangu. Mwasagwile kutenda yakusakala m’malo mwakutenda yambone.”—Yesaya 65:11, 12.

Kusala yisyene, yilambo yine pachilambopa mbiya syagakusapata makampani gakutendesya mpikisano wakuchesa juga, akusasikamulichisya masengo pakwalipilila ŵandu sukulu, kutendekasya kuti chipanje cha m’chilambo chijawule pasogolo ni yine yejinji. Nambo yeleyi yangatendekasya kuti kuchesa juga kuŵe kwambone. Mpela mwatuyiwonele, yikusalimbikasya umbombo soni kulinonyela. Mwamti jwakuchesa juga akusasachilila kuti jwine aluse ni chakulinga chakuti jwalakwejo awine.

“Mkakumbila . . . chindu chilichose cha mjenu.”—Ekisodo 20:17.

YAJIKUSASALA BAIBULO

Baibulo jikusatukalamusya kuti “ŵandu ŵakusaka kusichila akusagwaga mkulingwa, akusasimanikwa kuti atanjile mu lwawu lya yakusaka yejinji yakuloŵela nambosoni yakonanga. Yakusaka yeleyi yikusayatiŵisya ŵandu mu chonasiko chakogoya.” (1 Timoteo 6:9) Mitulo ni jajikusijatendekasya ŵandu kuti acheseje juga. Nambotu ndamoji jili jakusakala mnope mwamti tukusosekwa kujiŵambalaga—Aefeso 5:3.

Ligongo lyakuti ŵandu ŵakusachesa juga akusapata mbiya mwangakoposya chitukuta, ndamoji jikusalimbikasya kunonyela mbiya. Nambo atamose yili myoyo, Baibulo jikusasala kuti “kunonyela mbiya uli mchiga wa yakusakala yosope.” Yeleyi mpaka yitendekasye mundu kuti aŵeje jwakudandawula nambosoni kuti akakulupililaga Mlungu. Baibulo jikusati ŵandu ŵakunonyela mbiya “akusalijigalila yipwetesi m’mitima mwawo.”—1 Timoteo 6:10.

Umbombo ukusamtendekasya mundu kuti akajikutilaga ni yindu yakwete soni yeleyi yikusamtendekasya kuti akaŵaga jwakusangalala. Baibulo jikusati “Jwalijose jwakusanonyela mbiya jwangajikutila ni mbiyasyo, yalumo soni jwalijose jwakusanonyela yipanje jwangajikutila ni chongola yala.”—Jwakulalichila 5:10.

Ŵandu ŵajinji patandite juga, akusasyoŵelela mnope mwamti akusalepela kujileka ndamoji. Juga chili chakusawusya cha ŵandu ŵajinji pachilambo chosope, mwamti kuwungunya kukwatendekwe mchilambo cha United States kwalosisye kuti ŵandu mamiliyoni gejinji kweleko akusatenda juga.

Msyungu wine wa m’Baibulo ukusati: “Chipanje chakuchipata mwachitema pandanda, pambesi pakwe ngasichiŵa chana upile.” (Misyungu 20:21) Ŵandu ŵaŵasyoŵelele kutenda ya juga mwamti akusalepela kuti aleche, akusaŵaga ŵana ngongole soni ŵangasangalalaga. Ndamoji jikusatendekasyasoni kumala maŵasa, kutyosedwa pamasengo soni kuŵengana ni ŵane. Mundu pakukuya mfundo sya m’Baibulo, akusaŵaga jwakusangalala nambosoni akusaŵambala yakusawusya yayikusayika ligongo lyakutenda juga.

“Ŵandu ŵakusaka kusichila akusagwaga mkulingwa, akusasimanikwa kuti atanjile mu lwawu lwa yakusaka yejinji yakuloŵela nambosoni yakonanga. Yakusaka yeleyi yikusayatiŵisya ŵandu mu chonasiko chakogoya.”—1 Timoteo 6:9.